Իտալիայի վարչապետ Ջորջիա Մելոնիի կառավարությունը ռեկորդ է սահմանել իշխանության ղեկին գտնվելու տևողությամբ

Իտալիայի վարչապետ Ջորջիա Մելոնիի՝ նախարարների կաբինետը գլխավորած առաջին կնոջ կառավարությունը ռեկորդ է սահմանել իշխանության ղեկին առանց ճգնաժամերի գտնվելու տևողությամբ: Այն գերազանցել է Սիլվիո Բերլուսկոնիի թվով երկրորդ կառավարության նախորդ ձեռքբերումը (1,412 օր), սակայն ինքը՝ Մելոնին, դեռևս չի գերազանցել իր նախորդին, ով ժամանակին նրան դուրս բերեց քաղաքական ուղեծիր, հայտնում է ANSA գործակալությունը:

2001 թվականին ընտրված կոալիցիան պաշտոնավարման ավարտից մեկ տարի առաջ փոքր ճգնաժամ ապրեց, սակայն, վերախմբավորվելով, Բերլուսկոնիի գլխավորությամբ աշխատեց մինչև հնգամյա ժամկետի ավարտը: Այսպիսով, նա հանդիսացավ միակ վարչապետը, ով աշխատեց ողջ սահմանված ժամկետը: Նրա ռեկորդը այժմ կարող է կրկնել Մելոնին, ում լիազորությունների ժամկետն ավարտվում է մեկ տարուց փոքր-ինչ ավելի ժամանակահատվածում: Սակայն տեղական մամուլում ենթադրություններ են հայտնվում, որ հերթական խորհրդարանական ընտրությունները կարող են անցկացվել արտահերթ՝ Մելոնիի հրաժարականից հետո, ոչ թե 2027 թվականի աշնանը, այլ գարնանը:

Մելոնին, ով գլխավորում է «Իտալիայի եղբայրներ» կուսակցությունը, դաշնակից «Առաջ, Իտալիա» և «Լիգա» կուսակցությունների աջակցությամբ, հույս ունի վերընտրվել: Ընդ որում, ԶԼՄ-ներում ենթադրվում է նաև, որ Իտալիայի Հանրապետության պատմության մեջ առաջին կին վարչապետը հավակնում է նախագահի՝ պետության ղեկավարի աթոռին: Այդ պաշտոնում ընտրվելու համար նրան անհրաժեշտ է հուսալի մեծամասնություն խորհրդարանում:

Ներկայիս կառավարությունն իր աշխատանքի արդյունքները լիովին բավարար է համարում, հատկապես աշխարհաքաղաքական ճգնաժամերի՝ Ուկրաինայի հակամարտության և Իրանի դեմ ԱՄՆ-ի ու Իսրայելի պատերազմի ամենաբարդ պայմաններում, էներգակիրների թանկացման, աճող գնաճի և բավականին համեստ բյուջետային հնարավորությունների ֆոնին:

Ընդդիմությունը մեղադրում է իշխող կոալիցիային նրանում, որ նա չի կատարել նախընտրական խոստումներից և ոչ մեկը և չի իրականացրել և ոչ մի բարեփոխում: Բացի այդ, Մելոնիի կառավարությունը պարտվել է արդարադատության բարեփոխման հարցով հանրաքվեում: Սակայն դա չի խարխլել Մելոնիի իշխող կուսակցության վարկանիշը, որը մնում է 30%-ից փոքր-ինչ ցածր մակարդակի վրա: Մի փոքր ավելի վատ է վարկանիշների վիճակը դաշնակիցների՝ «Լիգայի» և «Առաջ, Իտալիայի» մոտ, որոնք չեն գերազանցում 9-10%-ը:

Ընդ որում, համատեղության մեջ ընդդիմադիր ձախակենտրոն կուսակցությունները կկարողանային հավաքել մոտավորապես նույնքան ձայն, որքան իշխող աջակենտրոն կոալիցիան, սակայն դաշինքի հարցը բաց է մնում ինչպես ներքին, այնպես էլ արտաքին քաղաքականության տարբեր հարցերի նկատմամբ մոտեցումների տարբերության պատճառով: Ամեն դեպքում, աշնանից սկսած երկիրը և նրա քաղաքական ուժերը մտնում են նախընտրական փուլ, և այս ընտրարշավի առանցքային հարցերից մեկը դառնալու են ուկրաինական ճգնաժամը և Եվրոպայի վերազինումը, նշում են տեղական վերլուծաբանները: