Բժիշկը նշել է՝ որ մթերքներն են օգնում պայքարել սթրեսի դեմ

Սթրեսի դեմ արդյունավետ պայքարում կարևոր դեր ունի նաև սննդակարգը։ Որոշ մթերքներ կարող են նպաստել սթրեսի հորմոնի նվազեցմանը, ինչպես նաև օրգանիզմում անհրաժեշտ նեյրոմիջնորդների արտադրությանը։ Այս մասին «Sputnik» ռադիոկայանի հետ զրույցում հայտնել է բժիշկ-դիետոլոգ, ֆիտոթերապիայի և սննդային աջակցության մասնագետ Տատյանա Զալետովան։

Մասնագետի խոսքով՝ առաջին հերթին սննդակարգում անհրաժեշտ է ներառել բարդ ածխաջրերով հարուստ մթերքներ։ Դրանք օգնում են կայունացնել արյան մեջ գլյուկոզայի մակարդակը և նպաստում են տրամադրության վրա ազդող նեյրոմիջնորդների արտադրությանը։

Որպես օրինակ՝ բժիշկը նշել է հացահատիկային մթերքները՝ վարսակի փաթիլները, քինոան, շագանակագույն բրինձը, ինչպես նաև լոբազգիներն ու ոչ օսլայավոր բանջարեղենը։

Բացի բարդ ածխաջրերից, կարևոր է պարբերաբար օգտագործել օմեգա-3 ճարպաթթուներով հարուստ մթերքներ։ Դրանց թվում են յուղոտ ձկները՝ հատկապես սաղմոնը, սարդինան, սկումբրիան, կապելինը և ծովատառեխը, ինչպես նաև կտավատի և չիայի սերմերը և որոշ տեսակի ընկույզներ։

Բժշկի խոսքով՝ օմեգա-3 ճարպաթթուներն ունեն հակաբորբոքային ազդեցություն, օգնում են պաշտպանել անոթները և աջակցում են ուղեղի ու նյարդային համակարգի առողջությանը։

Անհանգստության մակարդակը նվազեցնելու համար օրգանիզմին անհրաժեշտ է նաև բավարար քանակությամբ մագնեզիում։ Այն պարունակվում է կանաչ տերևավոր բանջարեղենում, ավոկադոյում, ընկույզներում և սերմերում, բանանում ու մուգ շոկոլադում։ Մասնագետը խորհուրդ է տալիս այս մթերքները ներառել նաև որպես առողջարար խորտիկ։

Որոշ մթերքներ օրգանիզմին ապահովում են նաև տրիպտոֆանով՝ ամինաթթվով, որն անհրաժեշտ է սերոտոնինի և մելատոնինի արտադրության համար։ Դրանք կարևոր դեր ունեն ինչպես տրամադրության, այնպես էլ քնի կարգավորման գործում։ Տրիպտոֆանի աղբյուրներից են ընկույզները, միսը և թռչնամիսը։

Դիետոլոգը խորհուրդ է տվել նաև պարբերաբար օգտագործել մրգեր, հատկապես ցիտրուսային մրգեր և կիվի, հատապտուղներ, քաղցր պղպեղ, պրոբիոտիկներով և պրեբիոտիկներով հարուստ կաթնամթերք, ինչպես նաև ֆերմենտացված մթերքներ, օրինակ՝ կիմչի և թթու կաղամբ։

Այս մթերքները օրգանիզմին ապահովում են կարևոր հակաօքսիդանտներով և նպաստում են աղիքային միկրոֆլորայի առողջության պահպանմանը։

Ինչպես տեղեկանում է Past.am-ը, մասնագետները միաժամանակ խորհուրդ են տալիս սթրեսի դեմ պայքարի շրջանակում չփորձել կտրուկ անցնել «իդեալական» սննդակարգի։ Ավելի արդյունավետ կարող է լինել փոքր, բայց կանոնավոր սովորությունների ներդրումը՝ չբաց թողնել սննդի ընդունումները և ձեռքի տակ ունենալ օգտակար խորտիկներ։