Ապարանում պապը մեքենայից իջել է, որ թոռան «պամպերսները» հանի, տեղնուտեղը վրաերթի է ենթարկվել

Վերաքննիչ քրեական դատարանի վարույթում է Ահմադ Սարոյանի գործով բերված վերաքննիչ բողոքի քննությունը:

Գործը քննվել է Արագածոտնի մարզի ընդհանուր իրավասության դատարանում Սերգեյ Մարաբյանի նախագահությամբ:

43-ամյա Ահմադը մեղադրվել է վրաերթ կատարելու, տուժողի առողջությանը անզգուշությամբ ծանր վնաս հասցնելու, ինչպես նաև ճանապարհատրանսպորտային պատահարի վայրից փախուստի դիմելու համար՝ ՀՀ քրեական օրենսգրքի 242 հոդվածի 1-ին և 244 հոդվածներով:

Ըստ մեղադրանքի՝ 2015 թվականի մարտի 29-ին Ահմադ Սարոյանն  «Աուդի» մեքենայով Արագածոտնի մարզի Միրաք գյուղից ուղևորվել է Ապարան:

Ժամը 20-ն անց 30-ի սահմաններում նա մեքենան վարել է Ապարանի Բաղրամյան փողոցով՝ 50-60 կմ/ժամ արագությամբ, մոտակա լույսերով:

Նրա մեքենայի ընթացքի ուղղությամբ՝ ուղեմասի աջ կողմում կանգնած է եղել «ՎԱԶ-2106» մեքենա, որից իջել ու դեպի մեքենայի հետնամաս է շարժվել այդ մեքենայի վարորդ, 58-ամյա Գագիկ Մ.-ն:

Ահմադ Սարոյանը խախտել է երթևեկության անվտանգությունն ապահովող կանոնները, կատարել է դրանց հակասող գործողություններ ու վրաերթի է ենթարկել Գագիկ Մ.-ին՝ նրա առողջության անզգուշությամբ պատճառելով ծանր վնաս: Ապա, տեսնելով, որ վրաերթ է կատարել, տուժողն ընկել է, Ահմադ Սարոյանը պատահարի վայրից դիմել է փախուստի՝ տուժողին թողնելով դեպքի վայրում:

Ամբաստանյալ Ահմադ Սարոյանն իրեն լիովին մեղավոր է ճանաչել: Հայտնել է, որ մեքենա է վարում 2013  թվականից:

Դեպքի օրը, երթևեկելով Ապարանի Բաղրամյան փողոցով, նկատել է, որ փողոցի աջ մասում կայանված մեքենաներ կան: Մի պահ հանդիպակաց ուղեմասում բեռնատար է հայտնվել: Ինքն ուշադրությունը կենտրոնացրել է այդ բեռնատարի վրա, որ հավասարվելու դեպքում անվտանգ անցնի կողքով, քանի որ ճանապարհի աջ կողմում կայանված մեքենաներ կային, երթևեկելի մասը նեղացել էր:

Եվ հանկարծ իր մեքենայի առջևի աջ կողմից հարվածի ձայն է լսել: Դեպի աջ է նայել ու տեսել է, որ աջ կողմում մարդ է ընկել: Մեքենայով 8-10 մետր առաջ է ընթացել, կողային հայելիով նայել ու տեսել է, որ վրաերթ է կատարել, մարդիկ են հավաքվել:

Շփոթված լինելով ու վախենալով, որ հավաքվածներն իրեն կարող են վնասել, կանգ չի առել, թողել է դեպքի վայրն ու փախել է, գնացել է տուն:

Երկու-երեք ժամ անց իրեն զանգել են ոստիկանությունից ու պահանջել են ներկայանալ բաժին: Ինքը ներկայացել է:

Ինքը վրաերթից առաջ չի արգելակել, քանի որ հետիոտնին չի նկատել:

Ամբաստանյալը զղջացել է կատարածի համար: Հայտնել է, որ հիվանդանոցում այցելել է տուժողին, հոգացել է նրա հիվանդանոցային ծախսերի մի մասը՝ 430 հազար դրամի չափով: Պարտավորվել է որոշակի նյութական օգնություն էլ ցուցաբերել, սակայն տուժողի ներկայացրած՝ 5 միլիոն 54 հազար 787 դրամ հայցի դեմ առարկել է՝ պատճառաբանելով, թե ինքն ընտանիքի միակ կերակրողն է, նման գումարներ չունի, խնդրել է հայցը թողնել առանց քննության:

Տուժող Գագիկ Մ.-ն հայտնել է, որ դեպքի օրը ինքն ընտանիքով հրավիրված էր հարսի քրոջ հարսանիքին: Իր մեքենան կանգնեցրել էր հարսանյաց սրահի դիմաց՝ Ապարան-Երևան ավտոճանապարհի աջ եզրին: Իր մեքենայի առջևի ու հետևի մասերում էլ մեքենաներ կային կանգնած:

Ժամը 20-ն անց 20-ի սահմաններում կնոջ ու հարսի հետ դուրս են եկել սրահից ու նստել են մեքենայի մեջ՝ երեխայի շորերը փոխելու նպատակով: Ինքը դուրս է եկել մեքենայից՝ բեռնախցից երեխայի «պամպերսները» հանելու, ապա ծխելու նպատակով:

Իջել է մեքենայի առջևի ձախ դռնից, մեքենայի կողքով քայլել է դեպի հետ՝ բեռնախցիկը: Այդ ընթացքում մոտ տասը մետրից նկատել է ավտոմեքենայի լույսեր, որոնք մոտեցել են:

Ինքն անսպասելի հարված է զգացել, առաջ է գնացել ու ընկել աջ կողմի վրա: Վրաերթ կատարած մեքենան հեռացել է: Ինքը դեմքով դեպի վրաերթ կատարած մեքենան էր: Ճանապարհն անցնելու ցանկություն չի ունեցել:

Տուժողը հայտնել է, որ ամբաստանյալը երկու անգամ այցելել է իրեն հիվանդանոցում: Նա իր բուժման համար վճարել է 430 հազար դրամ, բայց դրանից հետո այլևս իր որպիսությամբ չի հետաքրքրվել: Չի հոգացել իր բուժման մնացած ծախսերը: Ինքը դեռ շարունակում է բուժվել: Ստացել է ծանր վնասվածքներ: Իր ընտանիքը զրկվել է կերակրող ուժից՝ ինքը չի կարողանում արդեն հողագործությամբ զբաղվել կամ մեկնել Ռուսաստան՝ արտագնա աշխատանքի: Վնասվել է իր տեսողությունը, բուժման կարիք ունի:

Դատարանը հաստատված է գնահատել Ահմադ Սարոյանին մեղսագրված արարքները:

Դատարանը հաշվի է առել, որ դատավճիռ կայացնելու պահին ամբաստանյալ Ահմադ Սարոյանի խնամքին է եղել մինչև ութ տարեկան երեխա: Ընդհանրապես՝ Սարոյանի խնամքին են հինգ երեխաները, չորսը՝ անչափահաս, նաև՝ երկու մանկահասակ թոռները, քանի որ դուստրը ամուսնալուծվել և ապրում է հայրական տանը: Վրաերթին նախորդած պահին տուժողը գտնվել է ճանապարհի երթևեկելի հատվածում և՝ աննշան հարբածության վիճակում:

Ամբաստանյալը նախկինում դատապարտված չի եղել: Նա հատուցել է տուժողի հիվանդանոցային ծախսերի մի մասը: Դեպքից հետո ներկայացել է ոստիկանություն:

Դատարանը եզրակացրել է, որ տուժողի ներկայացրած հայցի առարկայի մեջ մտցված՝ փաստաբանին վճարվելիք գումարը, տուժողի չստացած աշխատավարձը, որ կստանար, եթե արտագնա աշխատանքի մեկներ Ռուսաստան, նրա սննդի և ճանապարհի վրա կատարած ծախսերը չեն հանդիսանում հանցագործությամբ անմիջականորեն պատճառված վնաս ու դուրս են քրեական դատավարության կարգով «հատուցման ենթակա վնաս» հասկացության սահմաններից: Այդ հարցերը կարող են քննվել քաղաքացիական դատավարության կարգով:

Դատարանն արձանագրել է նաև տուժողի հակասական պահանջները. մի դեպքում նա խնդրել է ամբաստանյալից բռնագանձել 865 հազար դրամ, մեկ այլ դեպքում՝ 1 միլիոն 300 հազար դրամ, վերջում էլ նորից փոխել է դիրքորոշումը և պահանջել է իր հայցը բավարարել ամբողջությամբ՝ 5 միլիոն 54 հազար 787 դրամի չափով:

Դատարանը հարկ է համարել նաև արձանագրել, որ «Գյումրի բժշկական կենտրոնում» տուժողի բուժման ծախսերը հատուցելու պարտականությունը ապահովագրական ընկերությունը վերցրել է իր վրա և պետք է բժշկական կենտրոնին փոխանցի 479 հազար դրամ:

Ամբաստանյալը, որպես իր պատճառած վնասի հատուցում՝ տուժողին տվել է 430 հազար դրամ: Այս գումարները տուժողը չի նվազեցրել իր ներկայացրած քաղհայցի առարկայի մեջ ու դատարանին «չի ներկայացրել որևէ ողջամիտ պատճառաբանություն՝ այդ հանգամանքի հետ կապված»: Դատարանի համար առանց պարզաբանման է մնացել, թե 1 միլիոն 300 հազար դրամ վնասը ինչ գումարներից է բաղկացած, եթե դրանում ներառված չեն տուժողի բուժման ծախսերը՝ 479 հազար դրամի չափով, որը ապահովագրական ընկերությունը վերցրել է իր վրա, և՝ արդեն իսկ տուժողի կողմից հատուցված 430 հազար դրամը…

Ահմադ Սարոյանը մեղավոր է ճանաչվել ՀՀ քրեական օրենսգրքի 242 հոդվածի 1-ին մասով և 244 հոդվածով, վերջին հաշվով դատապարտվել է 1 տարի ազատազրկման՝ 2 տարով զրկվելով տրանսպորտային միջոցներ վարելու իրավունքից:

Ահմադ Սարոյանի նկատմամբ՝ հիմնական պատժի մասով, պայմանական դատապարտություն է կիրառվել, սահմանվել է 2 տարի փորձաշրջան:

Տուժողի ներկայացրած քաղհայցի պահանջը թողնվել է առանց քննության:

Դատավճռի դեմ վերաքննիչ բողոք է ներկայացրել տուժողը՝ խնդրելով խստացնել ամբաստանյալի պատիժը և իր ներկայացրած քաղհայցը բավարարել ամբողջությամբ: