Կրակովի կենտրոնում հրաձգություն իրականացրած տղամարդու տանը երեք դի է հայտնաբերվել․ ենթադրաբար՝ նրա ընտանիքի անդամներինը

Լեհաստանի Կրակով քաղաքում հրաձգություն իրականացրած 24-ամյա տղամարդու տանը հայտնաբերվել է երեք մարդու՝ երկու կնոջ և մեկ տղամարդու դի, հայտնում են Polsat News և Interia հեռուստաալիքները՝ հղում անելով աղբյուրներին։

Նախնական տվյալներով, զոհերը կարող են լինել կասկածյալի հարազատները։

Հայտնաբերվածի մասին ավելի վաղ հայտնել էր Լեհաստանի վարչապետ Դոնալդ Տուսկը՝ Կրակովում արտակարգ ծառայությունների խորհրդակցության ժամանակ։

Ըստ նրա, անօդաչու թռչող սարքից ստացված պատկերը վկայում էր այն մասին, որ տանը կարող են զոհեր լինել։ Կառավարության ղեկավարը շեշտել է, որ այդ տեղեկությունը պետք է հաստատել։

«Շատ բան վկայում է այն մասին, որ այս ողբերգությունը կարող է նոր դրվագներ ունենալ», — հայտարարել է Տուսկը։

Տեղի բնակիչների վկայությամբ, ընտանիքը սովորական և հանգիստ էր համարվում։ Միաժամանակ, ինչպես պատմել է Polsat News-ի լրագրողը, հարևանները հիշատակել են երիտասարդ տղամարդու մտահոգիչ վարքագծի մասին, սակայն նախկինում այդ կապակցությամբ իրավապահ մարմիններին չեն դիմել։

Շաբաթ երեկոյան իշխանությունները տարհանել են Օստրովեց Սվենտոկշիսկիի կենտրոնում գտնվող բազմաբնակարան շենքի բնակիչներին, որտեղ ապրում էր կասկածյալը։ Ուժայինները, այդ թվում՝ հակաահաբեկչական ստորաբաժանման աշխատակիցները, խուզարկություն են իրականացրել։ Ավելի ուշ տարհանումն ավարտվել է, և շաբաթ օրը՝ տեղական ժամանակով ժամը 23։00-ից հետո, բնակիչներին թույլատրվել է տուն վերադառնալ։

Տուսկը քաղաքացիներին կոչ է արել չտարածել չստուգված տեղեկություններ և առաջնորդվել միայն ոստիկանության, հրշեջ ծառայության և տեղական իշխանությունների հաղորդագրություններով։ Նա նախազգուշացրել է, որ ողբերգության պայմաններում միտումնավոր ապատեղեկատվությունը հատկապես վտանգավոր է։

Օստրովեց Սվենտոկշիսկիի քաղաքապետ Արթուր Լակոմեցը ցավակցություն է հայտնել զոհերի ընտանիքներին և տեղեկացրել, որ քաղաքը հոգեբանական օգնություն է կազմակերպել բնակիչների համար, ինչպես նաև աջակցություն է տրամադրել տարհանվածներին և արտակարգ ծառայությունների աշխատակիցներին։