Life.panorama.am-ը գրում է.
Երիտասարդ երգչուհի Կարինա Առուստամյանին շատերը կհիշեն «Հայաստանի ձայնը 3» նախագծից, ով չնայած նրան, որ արժանացել էր մրցավարների բարձր գնահատականին, այնուամենայնիվ, չանցավ կիսաեզրափակչի շեմը: Life.panorama.am-ի հետ զրույցում երգչուհին առաջին անգամ պատմում է «Հայաստանի Ձայնը» նախագծից դուրս գալու իրական պատճառների եւ շատ մոտ ապագայում «The Band» խմբի առաջին տեսահոլովակի մասին:
Մեզ հետ զրույցում Կարինան նախ պատմեց այս ոլորտ հայտնվելու մասին.
«Երաժշտությամբ զբաղվելն իմ վաղեմի երազանքն է եղել, հենց երազանքիս հետեւից գնալով էլ մասնագիտություն ընտրելու տարիներին ընտրեցի երգն ու ավարտեցի Երեւանի Կոմիտասի անվան պետական կոնսերվատորիայի ասպիրանտուրայի ջազ-վոկալ բաժինը: Իսկ հիմա էլ շարունակում եմ առաքելությունս՝ զբաղվում եմ իմ սիրած գործով»,- պատմեց երգչուհին:
.png)
Կարինա Առուստամյանն արդեն երկար ժամանակ է միայնակ չի գործում. «Տարիներ առաջ հասկացա, որ ուզում եմ երգել կենդանի նվագակցությամբ ու Հովսեփ Երեմյանի հետ միասին ստեղծեցինք մեր խումբը՝ «The Band»-ը: Մենք արդեն 2.5 տարի է գործում ենք ու երեւանյան տարբեր ակումբներում ներկայացնում ենք մեր արվեստը»,- նշեց Կարինան ու տեղեկացրեց, որ շատ շուտով կկայանա «The Band»-ի առաջին տեսահոլովակի պրեմիերան.
«Մեր խմբի առաջին տեսահոլովակը շատ շուտով կներկայացնենք: Նպատակ ենք մեր առաջ դրել՝ ուզում ենք մեր երիտասրադությունը քավեր կատարումներից բացի ակումբներում լսի հայկականը: Մեր նոր երգն էլ հենց այդ նպատակին է միտված՝ պահել ենք քավերը, բայց հայկական ժողովրդական երգի հենքի վրա: Այն կոչվում է «Նարե, նարե», երգը միքսված է համաշխարհային ճանաչում ունեցող երգչուհի Բեյոնսեի երկու երգերի հետ. կարծում եմ՝ արդյունքը կգոհացնի: Տեսահոլովակի պրեմիերայի օրը կկայանա նաեւ մեր ծրագրի շնորհանդեսը, որը կոչվորմ է «Ethno-funk experimental project»: Ծրագրի էությունը կայանում է համաշխարհային հիթերը հայկական էլեմենտներով ներկայացնելու մեջ»,- նկատեց երգչուհին ու ավելացրեց,- ի դեպ՝ տեսահոլովակի ռեժիսորն է Արսեն Երեմյանը, իսկ օպերատորը՝ Սուրեն Թադեւոսյանը: Տեսահոլովակը նկարահանվել է Մեգեյան կարպետում, հագուստը տրամադրել է Տերյան մշակությային կենտրոնը, ինչպես նաեւ համագործակցել ենք «Pregomesh» ապրանքանիշի հետ: Տեսահոլովակում կա նաեւ պարային հատվածներ, որը բեմադրել է Հովհաննես Սարսգյանը իր «Swag dance»-ով: Բավականին ծավալուն աշխատանքն ենք իրականացրել, հուսանք կսիրվի»:
«The Band»-ը շուտով կներկայացնի նաեւ առաջին ձայնասկավառակը, որում ներգրավված կլինեն էթնիկ եւ համաշխարահային կատարումների միքսեր:
«Առաջիկայում այս աշխատնքներն իրականացնելուց հետո ես եւ Հովսեփը կաշխատենք մեր հեղինակային երգերի վրա: Քանի որ խմբի երգիչները մենք երկուսս ենք, ուզում ենք երկուսս էլ ունենանք մեր հեղինակային երգերը, որպեսզի մեզ լսողներին բազմաժանրություն ապահովենք»,- հավելեց նա:
Անդրադառնալով «Հայաստանի ձայնը» նախագծին՝ Կարինա Առուստամյանը մեզ հետ զրույցում մի գաղտնիք բացահայտեց.
«Այս մասին շատ քիչ մարդ գիտի ու քանի որ արդեն երկար ժամանակ է անցել, կարծում եմ, կարող եմ պատմել. «Հայաստանի ձայնը» նախագծին մասնակցությանս ժամանակ, մեր խումբը ըստ նախապես ստացած հրավերի պետք է մեկներ Քաթար: Քանի որ հրավերը մինչեւ իմ մասնակցությունն էինք ստացել, ուստի հրաժարվել չէինք կարող: Արդյունքում մեծ ափսոսանքով խնդրեցի մրցավարիս ինձ հեռացնել նախագծից, որի մասին հեռուստադիտողը չիմացավ: Իհարկե, մեծ ցանկություն ունեի շարունակել երգել նախագծում, բայց այդ ժամանակ ես կանգնած էի երկընտրանքի առաջ՝ կամ ինքս իմ մասին պետք է մտածեի, կամ մեր խմբի, իսկ ես չէի կարող միայն իմ մասին մտածել: «The Band»-ը ինձ համար ընտանիքի նման է, չէ որ նրանց հետ եմ այս ճանապարհը սկսել եւ անցել: Հիմա էլ կրկին ուզում եմ շնորհակալություն հայտնել նախագծի կազմակերպիչներին, ովքեր հասկացան ինձ եւ ընդառաջեցին»:
Երգչուհին պատմեց, որ «The Band»-ը հասցրել է զարմացնել նաեւ Քաթարի բնակիչներին. «Մենք Քաթարի շատ շքեղ հյուրանոցներից մեկի կողմից առաջարկ ունեինք երեք ամիս ամեն օր համերգներ տալ, բայց մեզ այնտեղ այնքան հավանեցին, որ մեր պայմանագիրը երկարաձգվեց ու 6.5 ամիս մենք այնտեղ մնացինք: Այդ հյուրանոցը նման ոճով է աշխատում՝ պարբերաբար տարբեր երկրներից երկարաժամկետ պայմանագրերով խմբերի է հրավիրում: Մենք մեծ հպարտությամբ էինք նշում, որ Հայաստանից ենք, ավելին ասեմ՝ մենք այնտեղ հիմնականում մատուցում էինք հայկական երաժշտություն, ինչը մեծ ոգեւորությամբ ու հետաքրքրությամբ էր ընդունվում: Նրանցից շատերը ձայնագրում էին մեր երգերը, հետո մոտենում էին ու խնդրում կրկնել դրանք, անգամ մեր երգերից բառեր էին սովորել ու կրկնելով հասկացնում էին, որ էլի են ուզում լսել: Հենց Քաթարում էլ հասկացանք, որ ինչքան էլ մենք սիրում ենք քավեր կատարումներ երգել, բայց մենք հայ ենք եւ պետք է մեր երաժշտությամբ եւս ներկայանանք»,- պատմեց Կարինան:
Ի դեպ՝ Կարինա Առուստամյանը նաեւ դասավանդում է. «Արդեն երկար ժամանակ է դասավանդում եմ Նոր Նորքի Հայկանուշ Դանիելյանի անվան արվեստի դպրոցում, աշխատում եմ 5-17 տարեկան երեխաների հետ: Պետք է ասեմ, որ սա իմ կյանքի մյուս կողմն է, որը չափից ավելի եմ սիրում: Նկատեմ, որ 17 տարեկանից սկսած դասավանդում եմ, հիմա 10 տարվա փորձ ունեմ, ուստի դժվարություններ չկան, հիմա միայն Աստծուն շնորհակալ եմ, որ զբաղվում եմ իմ սիրած գործով»,- ավարտեց երգչուհին:
Հեղինակ՝ Անուշիկ Մելքոնյան
