Ժնևում կայանալիք ԱՀԿ 69-րդ վեհաժողովի փոխնախագահի պաշտոնում կառաջադրվի Արմեն Մուրադյանի թեկնածությունը

«Հանրային առողջության նոր մարտահրավերները» խորագրով միջազգային նախարարական համաժողովին մասնակցելու նպատակով Հայաստան ժամանած հյուրերից ՀՀ առողջապահության նախարար Արմեն Մուրադյանն առաջինն ընդունել է Առողջապահության համաշխարհային կազմակերպության եվրոպական տարածաշրջանային գրասենյակի քաղաքականության վարչության ղեկավար Պիրոժկա Օստլինին։ Ինչպես «Արմենպրես»-ին տեղեկացրին ՀՀ առողջապահության նախարարությունից, Պիրոժկա Օստլինն Արմեն Մուրադյանին է փոխանցել ԱՀԿ եվրոպական գրասենյակի տնրօրեն Ժուժաննա Յակաբի ողջույններն ու շնորհավորանքները նման կարևոր խնդրի շուրջ տարբեր երկրներին համախմբելու համար։ «Տնօրենը խնդրեց իր մեծ ափսոսանքը փոխանցել համաժողովին մասնակցելու հնարավորություն չունենալու համար։ Նա իր համաձայնությունն է տվել առաջիկայում պաշտոնական այցով Հայաստան գալու առթիվ»,-ասել է Պիրոժկա Օստլինը։

«Հանրային առողջապահական խնդիրները  բազմիցս քննարկել ենք Ժուժաննա Յակաբի հետ։  Հուսով ենք, որ Ձեր մասնակցությամբ միջպետական մակարդակով վերլուծությունները հնարավորություն կտան ընդհանրացնելու մեր մոտեցումները»,-ասել է նախարարը` շեշտադրելով, որ չնայած համատեղ ջանքերին, հանրային առողջապահական խնդիրները շարունակում են մնալ խիստ արդիական։

Քննարկման ընթացքում Արմեն Մուրադյանը նշել է, որ Հայաստանում մեծապես կարևորվում  է ոչ միայն արհեստավարժությունը, այլև բնակչության շրջանում վարքագծային փոփոխության ապահովումը և այդ նպատակով հանրության տարբեր խմբերի հետ արդյունավետ համագործակցությունը։ Նախարարը նշել է, որ այսօր աշխարհի առջև լուրջ մարտահրավեր է ոչ վարակիչ հիվանդություններով պայմանավորված մահացությունը։

«Ոչ վարակիչ հիվանդությունների հետևանքով աշխարհում տարեկան արձանագրվող 40 մլն մահերի 18 մլն-ը վաղաժամ է»։ Համեմատություններ կատարելով` նախարարը նշել է, որ Առաջին և Երկրորդ համաշխարհային պատերազմներն ավելի քան 10տարվա ընթացքում շուրջ 100 մլն մարդկային կյանքեր են խլել։ «Այնպես է ստացվել, որ ոչ վարակիչ հիվանդությունները ոչ պակաս պատերազմ են հայտարարել մարդկությանը»,-ասել է Արմեն Մուրադյանը` շեշտադրելով համատեղ, համակարգված քայլերի անհրաժեշտությունը։

Արմեն Մուրադյանը տեղեկացրել է, որ համաժողովի մասնակից երկրների հետ մոտեցնելով դիրքորոշումները` հանդես կգան համատեղ հայտարարությամբ:

ԱՀԿ ներկայացուցիչը` բարձր գնահատելով Հայաստանի Հանրապետության առողջապահության նախարարության այս նախաձեռնությունը` իրենց կազմակերպության կողմից համակողմանի աջակցության պատրաստակամություն է հայտնել:

Նախարարն իր հյուրին ծանոթացրել է մեր երկրում հանրային առողջապահական մի շարք ծրագրերի, մասնավորապես, անդրադարձ կատարելով 2005թ. մեկնարկած «Հիվանդությունների կանխարգելում և վերահսկում» ծրագրով ոչ վարակիչ հիվանդությունների (դիաբետի, հիպերթենզիայի և արգանդի պարանոցի քաղցկեղի) կանխարգելմանն ու վաղ հայտնաբերմանն ուղղված սկրինինգային, ինչպես նաև  սոցիալական փաթեթի շահառուների պարտադիր կանխարգելիչ բժշկական հետազոտությունների, այսպես կոչված` «CHECK-UP» ծրագրերը։ «Ունենալով բազմաթիվ խնդիրներ երկրորդային օղակում` մենք բազմաթիվ ծրագրեր ենք իրականացնում առաջնային օղակում, որպեսզի հանրային առողջապահական խնդիրներն ավելի կառավարելի լինեն, որպեսզի խուսափենք առողջապահական դեֆոլտից»,-շեշտել է նախարարը:

Պիրոժկա Օստլինն Արմեն Մուրադյանին է ներկայացրել Առողջապահության Համաշխարհային կազմակերպությունում մշակվող կրթական և քարոզչական աշխատանքների կազմակերպմանն ուղղված ծրագրերը` հանրային առողջապահական ոլորտում կարևորելով ողջ հասարակության և կառավարությունների ակտիվ մասնակցությունը։  Նա նշել է, որ 2016թ. մայիսին Ժնևում կայանալու է ԱՀԿ հերթական` 69-րդ վեհաժողովը։ «Ժուժաննա Յակաբը ցանկանում է Ձեր թեկնածությունն առաջադրել այդ վեհաժողովում փոխնախագահի պաշտոնում։ Մեզ համար մեծ պատիվ կլինի, եթե Դ ուք ընդունեք այս առաջարկությունը»,-ասել է ԱՀԿ ներկայացուցիչը` հավելելով, որ առաջարկն ընդունելու դեպքում Արմեն Մուրադյանը վեհաժողովի ընթացքում պետք է նախագահի հետ միասին առանձին պլենար նիստեր վարի։

Նախարարը շնորհակալություն է հայտնել ԱՀԿ եվրոպական տարածաշրջանային գրասենյակի ղեկավարին նման պատվաբեր և պատասխանատու առաջարկի համար։