Իրանում միջազգային չափորոշիչներով արտադրվող դեղերը մեկ ամսվա ընթացքում կգրանցվեն Հայաստանում

ОБЩЕСТВО 29 Февраль, 2016 20:55

Իրանի առողջապահության և բժշկական կրթության նախարար Հասան Հաշեմին և ՀՀ առողջապահության նախարար Արմեն Մուրադյանը պայմանավորվածություն են ձեռք բերել ԻԻՀ-ում միջազգային չափորոշիչներով արտադրվող դեղերը մեկ ամսվա ընթացքում Հայաստանում գրանցելու մասին։ Քննարկվել են նաև դեղերի ներմուծման և արտահանման խթանմանը, փորձի փոխանակմանը, ինչպես նաև գիտության և կրթության ոլորտներում համագործակցության շրջանակներ։

Ինչպես «Արմենպրես»-ին տեղեկացրին ՀՀ առողջապահության նախարարության հասարակայնության հետ կապերի բաժնից, «Հանրային առողջության նոր մարտահրավերները» խորագրով միջազգային նախարարական համաժողովին մասնակցելու նպատակով Հայաստան է ժամանել նաև Իրանի Իսլամական Հանրապետության առողջապահության և բժշկական կրթության նախարար Հասան Հաշեմիի գլխավորած պատվիրակությունը: ՀՀ առողջապահության նախարարությունում հանդիպման ժամանակ երկու երկրի նախարարները հանգամանալից քննարկել են հետագա համագործակցության ուղղություները։

«Վերջին երկու տարում բավական աշխուժացել է Հայաստանի և Իրանի Իսլամական Հանրապետությանհամագործակցությունն առողջապահության ոլորտում»,- ասել է Հասան Հաշեմին։

Նախարարները երկուստեք հաստատել են, որ երկու երկրի համագործակցության զարգացման ուղղությամբ պետությունների ղեկավարների հաստատակամությունն առողջապահության ոլորտում ևս գործնական քայլեր իրականացնելու լավ հիմք է։

Արմեն Մուրադյանը նշել է, որ վերջերս Մեղրիում բացված արդիական սարքավորումներով հագեցած բժշկական կենտրոնը պատրաստ է ժամանակակից, բարձրակարգ բժշկական սպասարկում մատուցելու նաև Իրանի հյուսիսային շրջանների բնակչությանը։

Հասան Հաշեմին բարձր է գնահատել հայկական կողմի պատրաստակամությունը բազմակողմանի համագործակցության համար։

Այնուհետև ստորագրվել է առողջապահության բնագավառում գործողությունների ծրագիր:

Նախարարները պատասխանել են նաև լրագրողների հարցերին: «Մենք ունենք համագործակցության հետագաընդլայնման հստակ պայմանավորվածություններ՝ հաշվի առնելով, որ բուժական և դեղագործական բնագավառումնոր հեռանկարներ են բացվում»,- նշել է Արմեն Մուրադյանը: Նրա խոսքով՝ Հայաստանի և Իրանի առողջապահության փոխնախարարների գլխավորությամբ դեռևս 2015թ. դեկտեմբերին ձևավորված աշխատանքային խմբերն արդեն ունեն հա մատեղ գործունեության անցած ճանապարհ և համագործակցության մատնանշած ուղղություններ:

Անդրադառնալով հայ-իրանական համատեղ բժշկական հաստատություն հիմնելու նախաձեռնությանը, Արմեն Մուրադյանն ասել է, որ Իրանի առաջարկը երկկողմ հետաքրքրություն է ներկայացնում և դրա տեղայնացումն, ինչպես նաև այլ մանրամասներ այժմ քննարկման փուլում են:

«Երկու երկրի հարաբերությունները զարգացնելու և էլ ավելի բարձր մակարդակի հասցնելու մեծ ցանկությունունենք: Բուժական և դեղագործական ոլորտները մեծ հետաքրքրություն են ներկայացնում: Առհասարակ,առողջապահության ոլորտում համագործակցության զարգացման բազմաթիվ հնարավորություններ կան»,- ասել է Իրանի Իսլամական Հան րապետության առողջապահության և բժշկական կրթության նախարար Հասան Հաշեմին: Նա խոսել է նաև իրենց երկրում հանրային առողջապահական ծրագրերի մասին, մասնավորապես, նշելով, որ Իրանում հաջողությամբ իրականացվում է միկրոտարրերով՝ վիտամին Դ-ով և ֆոլաթթվով ցորենի ալյուրի 100 տոկոսով հարստացման ծրագիր: Իրանի Իսլամական Հանրապետության առողջապահության և բժշկական կրթության նախարարն անդրադարձել է նաև իմունականխարգելման ծրագրերին, նշեց պատվաստումների կարևորության մասին: