Իրանը հավասարակշռված քաղաքականություն է վարում հարևանների հետ. իրանագետներ

Հայաստան-Իրան հարաբերությունները հեռանկարի առումով կշահեն փետրվարի 26-ին կայացած Իրանի խորհրդարանական ընտրությունների արդյունքից: Մարտի 4-ին կայացած «Իրանի Իսլամական Հանրապետությունում փետրվարի 26-ին տեղի ունեցած խորհրդարանի և Փորձագետների խորհրդի ընտրությունները. արդյունքներ և գնահատականներ» թեմայով քննարկման ժամանակ նշեց ԵՊՀ իրանագիտության ամբիոնի վարիչ Վարդան Ոսկանյանը:

Ըստ իրանագետի՝ միևնույն ժամանակ Իրանի տարածաշրջանային քաղաքականության համատեքստում, ընդհանուր առմամբ, էական փոփոխություններ չեն լինի, քանի որ Իրանը ավանդաբար հավասարակշռված քաղաքականություն է վարում, մասնավորապես Հայաստանի ու Ադրբեջանի հետ: «Հայաստանի ու Ադրբեջանի հետ հարաբերությունների համատեքստում Իրանը մշտապես պահում է հավասարակշռությունը, չի թողնում, որ Ադրբեջանը շահարկի կրոնական գործոնը, և դա արդեն մեծ հաջողություն է մեզ համար»,- նշեց Վարդան Ոսկանյանը:

Իրանագետ Գոհար Իսկանդարյանը ևս ընդգծեց, որ անկախ ընտրությունների արդյունքից, Իրանը մշտապես հավասարակշռված ու այլընտրանքները հաշվի առնող քաղաքականություն է վարում իր հարևանների հետ: «Իրանը երբևիցե իր հարաբերությունները Հայաստանի հետ չի նվազեցնի ի հաշիվ Ադրբեջանի, կամ հակառակը: Եվ եթե նույնիսկ Իրան-Ադրբեջան հարաբերությունները լինեն ամենաբարձր մակարդակի, դա ևս չի վնասի իրանահայ պատգամավորների գործունեությանը»,- ասաց նա:

Ընդգծելով, որ Իրանի քաղաքական դաշտի բաժանումն ըստ պահպանողականների և բարեփոխիչների շատ հարաբերական է՝ Վարդան Ոսկանյանը նշեց, որ ընտրությունների արդյունքում ըստ էության որևէ կտրուկ փոփոխություն տեղի չի ունեցել: Արձանագրված արդյունքը պարզապես քաղաքական անհրաժեշտ ուժերին անհրաժեշտ պահին առաջ քաշելու օրինակ է: «Ուշագրավ է, որ Իրանում կարողանում են նաև քաղաքական տեսանելի գործընթացներն ու դրանց արդյունքները հավուր պատշաճի ներկայացնել արտաքին աշխարհին ու միջազգային ԶԼՄ-ներին»,- հավելեց բանախոսը:

Ըստ Վարդան Ոսկանյանի՝ Իրանում այդ տեսանկյունից չափազանց կարևոր է նաև հայ պատգամավորների ներկայությունը խորհրդարանում: Հայերն Իրանի կյանքում ունեցել են այնպիսի դերակատարություն, որպիսին չեն ունեցել այդ երկրում ապրող շատ մահմեդական ազգություններ: Ներկայում էլ իրանահայերի ներքին կյանքում ու նրանց քաղաքական ներկայացվածության առումով շատ ուժեղ են Հայ հեղափոխական դաշնակցության դիրքերը, որոնց թեկնածուներն էլ ավանդաբար շահում են հայ համայնքին հատկացված պատգամավորական տեղերը:

Գոհար Իսկանդարյանի համոզմամբ՝  Իրանի խորհրդարանում ընտրված հայ պատգամավորները գերազանցապես բաձրացնելու են իրանահայերին առնչվող խնդիրներ և ՀՀ-ԻԻՀ հարաբերություններում նրանք էական դերակատարություն չեն ունենա: «Հայ պատգամավորները նախևառաջ Իրանի քաղաքացիներ են, և Հայաստան-Իրան հարաբերություններում նրանց կողմից որևէ ակնառու ներդրում, որևէ էական փոփոխություն չենք կարող ակնկալել: Թեև նրանք ընդգրկված են հայ-իրանական խորհրդարանական բարեկամության խմբում, սակայն այդ խումբն էլ հիմնականում ճանաչողական բնույթի խնդիրներ է լուծել» ,- ասաց Գոհար Իսկանդարյանը:

Փետրվարի 26-ին Իրանում անցկացվել են Մեջլիսի և Փորձագետների խորհրդի ընտրությունները: Խորհրդարանական ընտրություններիարդյունքների համաձայն՝ նախագահ Հասան Ռոհանիի կողմնակիցներն ստացել են տեղերի հարաբերական մեծամասնությունը, ինչպես նաևբացարձակ հաղթանակ են տարել Թեհրանում: ԻԻՀ Մեջլիսի ընտրո ւթյունների արդյունքում հայ համայնքին հատկացված երկուպատգամավորական տեղի համար ընտրվել են՝ Կարեն Խանլարյանը և Ժորժ Աբրահամյանը՝ համապատասխանաբար Հյուսիսային և Հարավայինընտրատարածքներից: