«Զանգեզուր» կենսոլորտային համալիրում որսագողության դեպքեր կան

Վայրի ֆաունայի եւ ֆլորայի հարցերով հանրության տեղեկացվածության մակարդակը բարձրացնելու նպատակով ՄԱԿ-ի գլխավոր վեհաժողովը մարտի 3-ը հռչակել էր Վայրի բնության համաշխարհային օր:

Հայաստանի «Օրհուս» կենտրոնների տեղեկատվության պատասխանատու Մարի Չաքրյանը Past.am-ին տեղեկացրեց, որ քաջատեղյակ լինելով այս ուղղությամբ ամբողջ աշխարհում տարվող մեծածավալ աշխատանքներին եւ գիտակցելով վայրի բնության պահպանության կարևորությունը՝ քաղաքացիական հանրութունն իր անհանգստությունն է հայտնում եւ մեկ անգամ եւս ուշադրություն հրավիրում «Զանգեզուր» կենսոլորտային համալիրի տարածքում վերջին շրջանում տեղի ունեցող ապօրինություններին:

Մասնավորապես, նա նշեց, որ 2015թ. աշնանը կենսոլորտային համալիրի տարածքում արձանագրվել էին ապօրինի ծառահատման դեպքեր: Այսօր էլ հասանելի են որսագողության մասին փաստող լուսանկարները:

Հիշեցնենք, որ «Զանգեզուր» կենսոլորտային համալիր ՊՈԱԿ-ը կառավարության 2013թ. դեկտեմբերի 19-ի որոշմամբ միավորում է Սյունիքի մարզում գտնվող «Շիկահող» պետական արգելոցը, «Արեւիկ» ազգային պարկը, «Սոսու պուրակ», «Զանգեզուր», «Խուստուփ», «Բողաքար» և «Սեւ լիճ» պետական արգելավայրերը:

Մարի Չաքրյանը նաեւ հայտնեց, որ Գերմանիայի ֆինանսական համագործակցության շրջանակում գործող «Պահպանվող տարածքների աջակցություն» ծրագրի իրականացման նպատակով KfW գերմանական զարգացման բանկը «Զանգեզուր» կենսոլորտային համալիրին տրամադրել է 8 միլիոն 250 հազար եվրո:

Միաժամանակ, սկսած 2003-ից՝ WWF Հայաստանի գրասենյակը Բնապահպանության նախարարության հետ համատեղ իրականացրել է ներկայում «Զանգեզուր» կենսոլորտային համալիրի մեջ ներառված բնության հատուկ պահպանվող տարածքների հզորությունների զարգացման ծրագրեր՝ վայրի բնության վտանգված տեսակների պահպանության նպատակով ներդնելով հսկայական գումարներ ու ջանքեր:

Քրիստինա Տեր-Մաթեւոսյան