Հանրային դեմքերի շնորհավորական ուղերձը Մարտի 8-ի կապակցությամբ

Մարտի 8-ի կապակցությամբ այսօր մի շարք հանրային դեմքեր իրենց ֆեյսբուքյան էջում գրառում են արել եւ շնորհավորել Կանանց միջազգային տոնը:

Ստորեւ ներկայացնում ենք դրանցից առավել ուշագրավները:

Լրագրող Արմեն Դուլյան

«Բացարձակ ոչ մի խտրականություն տղամարդկանց եւ կանանց միջեւ Հայաստանում չկա... էլ ստից բաներ մի հորինեք... Շնորհավորում ենք, որովհետեւ, այո, խոստովանում ենք, մեզանից ավելի լավն եք...»:

ՀՀ կրթության և գիտության նախարար Լևոն Մկրտչյան

«Սիրելի կանայք, ընդունեք իմ շնորհավորանքներն ու բարեմաղթանքները Կանանց միջազգային տոնի կապակցությամբ:

Առանձնակի ջերմությամբ շնորհավորում եմ կրթության և գիտության ոլորտի բոլոր կանանց: Դուք ստանձնել եք սերունդների կրթման, դաստիարակման և որակյալ կադրերի պատրաստման առաքելությունը, որը կատարում եք հայ կնոջը բնորոշ անմնացորդ նվիրումով և պատասխանատվությամբ»:

Սպորտի եւ երիտասարդության հարցերի նախարար Գաբրիել Ղազարյան

«Սիրելի կանայք և աղջիկներ, մայրեր և քույրեր, սիրով շնորհավորում եմ գարնանային ամենագեղեցիկ տոնի՝ Մարտի 8-ի կապակցությամբ, մաղթում եմ բոլորիդ ամենայն բարիք, հաջողություններ և իհարկե՝ կանացի անսահման երջանկություն: Հայ կինն իրավամբ եղել և մնում է մեր ընտանիքների հենասյունը, որն իր համբերատարությամբ, հեզությամբ, հոգու ջերմությամբ և հատկապես սիրով պահել պահպանել է մեր օջախների կայանությունը և համերաշխությունը: Եվ եթե մենք՝ ձեր ամուսինները, որդիներն ու եղբայրները, ամեն օր ձեզ չեք ասում մեր սիրո մասին, ապա վստահեցնում եմ, որ դա սոսկ հայ տղամարդու զուսպ հոգատարության դրսևորում է»:

Բանաստեղծ Կարեն Անթաշյան

«Շնորհավոր բռնակալ, կապիտալիստ, կղերական, քյառթու, ռազմատենչ ու ծույլ տղամարդկանց իշխանությունից, բայց ոչ սեփական բնությունից ազատվել ուզեցող կանանց տոնը: Միայն ծաղիկ-մաղիկով չխաբվեք, մինչև վերջ ստացեք ձեր հասանելիքը, այսինքն՝ տղամարդկանց տոտալ զինաթափումն ու կապիտուլյացիան»:

Հաղորդավար, լրագրող Վարդան Անանյան

«Մարտի 8-ը հրեական Փուրիմ տոնն է: Այդ օրը՝ 2400 տարի առաջ, Պարսկաստանում նենգաբար սպանվեց 75000 պարսիկ: Ի պատիվ իրենց դավադիր հաղթանակի՝ հրեաներն ամեն տարի նշել են, իսկ 1910-ից հրեա Ռոզայի ու Կլարայի միջոցով փորձել փաթաթել աշխարհի վզին...

Շնորհավորե՞նք ջհուդական տոնը: Չե՞ք նեղանա սիրելի կանայք»:

ԱԻՆ փրկարար ծառայության տնօրենի տեղակալ Նիկոլայ Գրիգորյան

«Մեր շատ սիրելի կանայք ու աղջիկներ Հայոց աշխարհի, Թող այսուհետ երկինքը ձեր սրտով կապույտ լինի կամ շառագունած, անձրևը մեղմ մաղի կամ հորդառատ, զեփյուռը խաղա թփերում կամ հողմը մեգով երկինքն առնի, եթե սրտներովդ անցնի, թող մի քիչ էլ` գալարի բուքը ձյան:

Թող դոլարի կուրսը համընկնի ձեր երազների նավի կուրսին: Աստված ձեզ հեռու պահի շառ ու փորձանքից, թունահրդեհապայթունավտանգ նյութերից, համաճարակներից, ճանապարհատրանսպորտային պատահարներից, դժբախտ դեպքերից, սառցալուլաներից ու մերկասառույցից, ձնաբքից ու գլոբալ տաքացումներից, խալխի համար փորած փոսից, բանանի կճեպից ու ոտքի տակ նետված օճառից, սառն ու օտարոտի հայացքից, թթու խոսքից, բռի ու գծուծ, անալի, անհամ ու անհումոր մարդկանցից, կատաղած շներից, առնետներից, ստորաքարշներից, անտարբերներից, թրաֆիքինգից, տեռորիզմից ու կոռուպցիայից»:

Քրիստինա Տեր-Մաթեւոսյան