Ռուս պատգամավորն առաջարկում է հայկական կոնյակի նման սիրել վրացական բորժոմին և բարելավել տնտեսական կապերը Վրաստանի հետ

 Ռուսաստան-Վրաստան-Հայաստան տնտեսական համագործակցության հեռանկարը քննարկող ռուսաստանյան փորձագետները կարծում են, որ պետք է առաջնորդվել շահերով և բարելավել գործարար կապերը Վրաստանի հետ:«Արմենպրես»-ի փոխանցմամբ` եռակողմ տեսակամուրջի ժամանակ Ռուսաստանի Դաշնության Պետդումայի պատգամավորՎիտալի Զոլոչևսկին նկատեց, որ ժամանակակից զարգացած երկրներում բիզնեսն է բոլոր հարաբերությունների ձևավորման հիմքը: «Ակնհայտ է, որ առաջին հարցը գործարար կապերի զարգացումն է: Հայաստանի հետ լավ հարաբերություններ արդեն առկա են, Վրաստանի հետ դրանք պետք է թարմացնել: Չեմ կասկածում, որ գործարարությամբ զբաղվողները քաղաքականությունից դուրս են, նրանց համար միշտ պետք է գոյություն ունենան  ֆինանսական հետաքրքրություններ»,-ասաց Պետդումայի պատգամավորը` հավելելով, որ ինչպես հայկական կոնյակն են սիրում, նույն ձևով կարող են սիրել վրացական բորժոմին:

ԱՊՀ երկրների ինստիտուտի տնտեսագիտության բաժնի ղեկավար, ՌԳԱ տնտեսագիտության ինստիտուտիառաջատար գիտաշխատող Ազա Միհրանյանն էլ նկատեց, որ եթե Ռուսաստան-Հայաստան հարաբերությունները բնականոն զարգանում են, ապա Վրաստանի հետ կապերում խզում կա, և վրացական տնտեսվարողները պետք է որոշակի ջանքեր գործադրեն ռուսական շուկան կրկին գրավելու համար: «Դրան զուգահեռ ռուսական «բրենդին հավատարիմ» մի տեսակ կա, ում մոտ որոշակի նոստալգիա կա վրացական ապանքների նկատմամբ, այս իմաստով` կարծում եմ, որ վրացական արտադրողների մոտ դեռ կան շանսեր»,-ասաց տնտեսագետը: Նրա խոսքով` վրացական կողմը պետք է հաղթահարի այն փոփոխությունները, որոնք գրանցվել են այս ընթացքում, մասնավորապես, ԵԱՏՄ նոր տեխնիկական կանոնակարգերի կիրառումը, վրացական ապրանքների` ԵԱՏՄ շուկայի պահանջներին համապատասխանեցումը:

Անդրադառնալով Հայաստանի ու ԵԱՏՄ հարաբերություններին`Ազա Միհրանյանը նկատեց, որ Հայաստանի խնդիրը ներկայում նրանում է, որ ամբողջությամբ չեն լուծվել ԵԱՏՄ երկրների հետ առևտրի փաստաթղթաշրջանառության կարգավորման հարցը: «Դեռևս սուր է տրանսպորտային շրջափակումը, ու հենց այստեղ է, որ Վրաստանի դերակատարումը շատ կարևորվում է որպես տարանցիկ երկիր»,-ասաց Միհրանյանը` հույս հայտնելով, որ արտադրողների ու սպառողների շահերը մաքսիմալ կերպով հաշվի կառնվեն ու մոտ հեռանկարում ակնհայտ կլինի հարաբերությունների խորացում:

Տեսակամուջին հայկական կողմից մասնակցող Տեղեկատվության անվտանգության մասնագետ, բլոգեր Տիգրան Քոչարյանը նշեց, որ բացարձակապես համաձայն չէ մտքի հետ, որ բիզնես շահերն են պայմանավորում մնացած բոլոր հարաբերությունները: «Այդ դեպքում աշխարհում կտիրեր քաոսային իրավիճակ: Ես կարող եմ ասել, որ Հայաստանն իր բարեկամների հետ իրեն այդպես չի պահում, ու մաքսիմում ազնիվ է գործում, նույնիսկ եթե այդպես իր համար շահավետ չէ: Ներկայում Ռուսաստանում ռուբլու փոխարժեքի անկումը Հայաստանի համար ոչ բարենպաստ տնտեսական իրավիճակ է ստեղծվել, բնակչություն ը դա լավ է հասկանում, բայց չի ասում, որ վիճակը վատացել է, պետք է շրջվենք Եվրամիության կողմ: Հայերը ռուսների հետ բարեկամությունը կարևորում են ու փորձում են միասին հաղթահարել այդ ժամանակավոր դժվարությունները»,-ասաց Քոչարյանը:

Վրացական կողմը ներկայացնող Եվրասիայի ինստիտուտի ղեկավար Գուլբաաթ Ռցխիլաձեի խոսքով էլ`չնայած Վրաստանի պաշտոնական դիրքորոշմամբ Ռուսաստանը չի դիտարկվում թշնամի, բայց գործընկեր էլ չի ընկալվում: Ըստ փորձագետի` ի հակադրություն դրա` վրաց ժողովրդի մեծամասնությունը կողմ է Ռուսաստանի հետ հարաբերությունների բարելավմանը: «Վրաստանում անցկացված հարցումները վկայում են, որ հասարակությունը արմատական է տրամադրված` հօգուտ երկկողմ հարաբերությունների զարգացմանը: Մեր բնակչությունն ասում է, որ Ռուսաստանի հետ պե տք է ունենանք եթե ոչ բարեկամական հարաբերություններ, ապա գոնե գործընկերային կապեր»,-ասաց Գուլբաաթ Ռցխիլաձեն:

Ինչ վերաբերում է հայ-վրացական տնտեսական հարաբերություններին, ապա վրաց մասնագետը կարևոր է համարում, որ այդ հարցում Հայաստանն ու Ռուսաստանի հայկական համայնքը նախաձեռնող լինեն: