Պերմյակովի ծառայակիցները չէին ներկայացել դատավարությանը

Գյումրիում տեղակայված 102-րդ ռուսական ռազմաբազայի տարածքում մարտի 11-ին 30 րոպե ուշացումով մեկնարկեց Ավետիսյանների ընտանիքի յոթ անդամների սպանության մեջ մեղադրվող ռուս զինծառայող Վալերի Պերմյակովի գործով հերթական դատական նիստը: Դատարանում առաջինը վկայություն տվեց սահմանապահ ջոկատի վարորդ Ռոմիկ Խաչատրյանը: Նա նշեց, որ իրենք տարվա մեջ երկու անգամ պլանային աշխատանքներ են իրականացնում ուղեկալի տարածքում`  ուղեկալի տարածքի վնասված փշալարերի վերականգնման ուղղությամբ:

Ըստ առաջադրված մեղադրանքի, Պերմյակովն ուղեկալի տարածքի ինժեներատեխնիկական համակարգի վնասված փշալարի հատվածից անցել, ապա հետ է վերադարձել: Ռոմիկ Խաչատրյանը նշեց, որ չի կարող տեղեկացնել, թե երբ է այդ հատվածը վնասվել, նաև չի կարող հստակ նշել, թե ինչ չափերի է եղել այդ վնասված հատվածը: Սակայն նշեց, որ եթե վնասված հատվածն այնքան մեծ լիներ, որ դրա միջով կարողանար մարդ անցնել, ապա վերջինս չէր կարող անցնել առանց թրջվելու կամ շորերը պատառոտելու:

Սպասվում էր, որ դատարան կներկայանան նաև Պերմյակովի ծառայակիցները: Դատարանի նախագահ Հարություն Մովսիսյանը նշեց, որ իրենք դիմել էին 102-րդ ռազմաբազայի հրամանատարությանը` Պերմյակովի ծառայակիցների գտնվելու վայրի ու հասցեների մասին տեղեկություններ ստանալու նպատակով: Սակայն դատարանը ռազմաբազայից ծանուցում է ստացել, որ Պերմյակովի 7 ծառայակիցները, ինչպես նաև անմիջական հրամանատաար Նիկիշինն այլևս ռազմաբազայում չեն և իրենք չենք կարող ասել, թե որտեղ են:

Ելնելով իրավիճակից` դատախազ Գևորգ Գևորգյանը միջնորդություն երկայացրեց` փոխելու ապացույցների հետազոտման կարգը և անցնելու փաստաթղթերի հրապարակման գործընթացին, Ավետիսյանների իրավահաջորդների ներկայացուցիչները չառարկեցին. այս պահին ընթացքի մեջ է փաստաթղթերի հրապարակման գործընթացը:  

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին  մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրման համար օգոստոսի 12-ին դատապարտվել է 10 տարվա ազատազրկման: