Երիտասարդին առանց հիմնավոր պատճառների հեռացրել են ԵՊՀ-ից

Երեւանի պետական համալսարանի ուսանող Հովհաննես Եսայանը բաց նամակով դիմել է ՀՀ կրթության եւ գիտության նախարար Լեւոն Մկրտչյանին՝ իրեն համալսարանից անհիմն հեռացնելու փաստի առնչությամբ: Նամակի մեջ ԵՊՀ նախկին ուսանողը նշել է. «Ես ԵՊՀ հայ բանասիրության ֆակուլտետի վերջին՝ չորրորդ կուրսի ուսանող Հովհաննես Եսայանն եմ, ում ժամեր առաջ հեռացրել են համալսարանից ֆիզպատրաստություն առարկայից լուծարք ունենալու պատճառաբանությամբ։

Ինձնից ձերբազատվելու հերթական անփույթ կազմակերպված օպերացիան կանխելու համար այսօր ամբողջ օրը ԵՊՀ կենտրոնական մասնաշենքի ուսումնական վարչության այս կաբինետից այն կաբինետն եմ գնացել եւ այդպես էլ ոչ մի հիմնավորում չեմ ստացել։ Ինձ ոչ ոք չընդունեց՝ ո՛չ բաժնի պետերը, ո՛չ պրոռեկտորները, ո՛չ էլ ռեկտորը՝ Արամ Սիմոնյանը»։ Երիտասարդն իր նամակում նշել է, որ դեռ ուսումնական առաջին տարիներից ԵՊՀ հայ բանասիրության ֆակուլտետի դեկան Արծրուն Ավագյանի եւ մյուս կենտրոնահակ դասախոսների ջանքերով ենթարկվել է տարատեսակ ճնշումների՝ իր ազատ խոսքի իրավունքը պաշտպանելու եւ քաղաքական հայացքների համար։

Նրա խոսքով՝ այսպիսի իրավիճակ ստեղծվել էր նաև մոտ վեց ամիս առաջ, երբ իր ազատ խոսքը համացանցային հարթակում հնչեցնելու հետեւանքով մի խումբ դասախոսներ որոշեցին իր դեմ հեռացման դիմում ներկայացնել։

«Բոլորովին գաղնտիք չէ, որ ԵՊՀ-ն իր բոլոր ենթակառույցներով, այդ թվում՝ թե՛ ուսանողական, թե՛ դասախոսական, ամբողջովին պատկանում է իշխող կուսակցությանը, որն էլ ոչ մի կերպ չի հանդուրժում այլախոհությունը, բայց, հուսով եմ, Դուք՝ որպես ոլորտի լավագույն մասնագետ, չեք թույլատրի քողարկված քաղաքական ռեպրեսիաներով երիտասարդ ուսանողի ճակատագրի խեղաթյուրումը»,- գրել է Հովհանննես Եսայանը։

Երիտասարդը նամակում նաեւ գրել էր, եթե ավարտական աշխատանքի վրա խանդավառությամբ աշխատող բանասերին հեռացնում են համալսարանից ուսումնական վերջին տարվա վերջին ամիսներին, այն էլ ֆիզկուլտուրայի լուծարքի պատճառաբանությամբ, ապա պետք է ուշադրություն դարձնել այս ամենաթողությանը եւ գոնե նորմալ, մարդկային, հասկանալի պարզաբանումներ ներկայացնել՝ հղում անելով օրենքներին ու կանոնադրություններին։

Քրիստինա Տեր-Մաթեւոսյան