Հանրապետությունում սպասվում է ցրտահարություն

Հանրապետությունում առաջիկա օրերին կնկատվի ջերմաստիճանի նվազում:Հիդրոմետ ծառայության օդերևութաբանությանկենտրոնի պետի տեղակալ Գագիկ Սուրենյանըլրագրողների հետ հանդիպմանը նշեց, որ մարտի 15-ից սկսած հանրապետության տարածք սկանդինավյան շրջանից բավականին ցուրտ արկտիկական օդային զանգվածներ են ներթափանցել:

«Արդեն երեկ ցերեկն օդի ջերմաստիճանը հանրապետության տարածքում նվազել է 10-13 աստիճանով: Հովտային շրջաններում գիշերը գրանցվել է բացասական` -1-2 աստիճան: Հանրապետության մի շարք շրջաններում, նույնիսկ Սյունիքի նախալեռնային և հովտային գոտում առատ ձյուն է տեղացել»,- նշեց Գագիկ Սուրենյանը:

Նրա խոսքով` ակնկալվում է, որ առկա ամպամածությունը առաջիկա գիշերը զգալիորեն կնոսրանա:

«Մարտի 17-ի լույս 18-ի գիշերը հանրապետության տարածքին անտիցիկլոն կմոտենա: Նման պայմաններում սովորաբար նկատվում է եղանակի լիարժեք պարզեցում: Մարտի 18-ի գիշերը օդի ջերմաստիճանի նվազումը կշարունակվի: Ջերմային ֆոնը կպահպանվի մարտի 19-ի գիշերը: Երեք օր` մարտի 17-19-ը, ակնկալվում է ցրտահարություն: Թե որքանով ինտենսիվ կլինի այն, կախված է ամպամածության պատկերից»,-շեշտեց նա:

Գագիկ Սուրենյանի տեղեկացմամբ` հանրապետության տարածքին մարտի 20-ին կմոտենա հաջորդ ցիկլոնը, որը կրկին սառն է:

«Մարտի 20-ին կսկսվեն տեղումներ, առատ ձյուն կտեղա, ցածրադիր հատվածներում տեղումները կլինեն անձրևի և ձնախառն անձրևի տեսքով»,-հավելեց նա: Չի բացառվում, որ մարտի 21-ին ցրտահարությունը կրկնվի:

ՀՀ գյուղատնտեսության նախարարի տեղակալ Գառնիկ Պետրոսյանի տեղեկացմամբ` ծիրանենու ծաղկումը շարունակվում է, իսկ Արարատյան դաշտում առանձին հատվածներում այն ավարտին է մոտենում:

«Կան եղանակներ, որոնք հնարավոր է օգտագործել, նվազեցնել ցրտահարության հետևանքները: Այգեգործները պետք է պատրաստ լինեն, պատրաստեն ծխակույտեր, բացասական ջերմաստիճանի ընթացքում օգտագործեն դրանք, այգիները ոռոգեն, եթե կա հնարավորություն»,-նշեց նա:

Գառնիկ Պետրոսյանի խոսքով` նախարարությունում թեժ գիծ է գործելու, անհրաժեշտության դեպքում քաղաքացիներին լրացուցիչ խորհուրդներ և ցուցումներ կտրվեն: