PayPal վճարային համակարգի գործարկումը անհրաժեշտ է մանր ու միջին բիզնեսով զբաղվող քաղաքացիներին. Կոնստանտին Ամիրաքյան

Համացանցում ստորագրահավաք է կազմակերպվել Հայաստանում PayPal վճարային համակարգի ամբողջական գործարկման նպատակով: Ստորագրահավաքի կազմակերպիչները նախատեսում են դիմել Հայաստանի կառավարությանը, Կենտրոնական բանկին, Ֆինանսների եւ Էկոնոմիկայի նախարարություններին:

Այս վճարային համակարգի մասին ավելի լայն պատկերացում կազմելու համար զրուցեցինք ստորագրահավաքի կազմակերպիչ Կոնստանտին Ամիրաքյանի հետ:

-Ինչո՞ւ եք հենց դուք նախաձեռնել այս ստորագրահավաքը:

- Ստորագրահավաքի իմ նախաձեռնությունը եզակի չէ, նախկինում եւս այս հարցով եղել են ստորագրահավաքներ: Ես վեբ-մարքեթինգով զբաղվում եմ արդեն մոտ 7 տարի, ծանոթ եմ էլեկտրոնային գլոբալ վճարային համակարգերին եւ ինձ համար պարզ է, որ Հայաստանում PayPal-ի ոչ ամբողջական աշխատանքը մեծ կորուստ է անհատ ձեռներեցների, փոքր ու միջին բիզնեսի համար:

Ցավում եմ, որ մեր պատկան մարմինները դա չեն հասկանում: Նրանք մինչեւ այսօր չեն էլ փորձել հասկանալ, թե ինչ օգուտ կարող է ներկայացնել PayPal-ի ամբողջական գործարկումը Հայաստանի համար: Մինչ օրս պետական որեւէ համապատասխան մարմին արժեքավոր հետազոտություն չի արել պարզելու, թե Հայաստանը շրջանառության որքան ներուժ ունի PayPal-ում:

Ըստ երեւույթին, դա հանդիսացել է պատճառներից մեկը, որ PayPal-ի ներկայացուցիչները լուրջ չեն ընկալել առաջարկը: Այդ պատճառով կազմակերպեցի այս ստորագրահավաքը, որը կօգնի հասկանալ PayPal-ի գործարկմամբ հետաքրքված մարդկանց թիվը:

Այս ստորագրահավաքով թեմայի շուրջ նաեւ տարբեր քննարկումներ սկսվեցին, որոնք հետագայում հնարավոր է՝ նպաստեն ավելի մանրամասն ու հանգամանալից հետազոտության: Այս պահին ես միայնակ եմ հետազոտություն իրականացնում, բայց վստահ եմ, որ խնդրով մտահոգ մարդիկ կօգնեն, որպեսզի ի վերջո աշխարհում ամենալայն տարածում գտած էլեկտրոնային վճարային միջոցը Հայաստանում գործի ամբողջությամբ:

-Ըստ ձեզ՝ Հայաստանում որքա՞ն է PayPal-ի պահանջարկը եւ դրա բացակայությունն ի՞նչ խնդիրներ է ստեղծում:

-Ես հստակ չեմ կարող ասել, թե որքան է PayPal-ով շահագրգիռ անձանց թիվը, որովհետեւ չկա նման հետազոտություն, բայց կարելի է նշել ըստ ոլորտների եւ պատկերացում կազմել: Այդ ոլորտներից են տեղեկատվական տեխնոլոգիաներով զբաղվող բոլոր ընկերություններն ու անհատները, այսինքն՝ ֆրիլանսերները, ձեռագործ արտադրանք ստեղծողները՝ արծաթագործները, որոշ դեպքերում՝ ոսկերիչները, զարդագործները, բարեգործական կազմակերպությունները (քրաուդֆանդինգ), օնլայն վաճառք իրականացնող հայկական կայքերը:

Ընդ որում, պետք չէ այստեղ միայն մթերք ու հագուստ պատկերացնել: Կայքերում կարող է վաճառվել նաեւ երաժշտություն, լուսանկարներ, էլեկտրոնային եւ տպագիր գրքեր:

Հայաստանն ունի մեծ ներուժ, որովհետեւ այստեղի մասնագետներն են պատրաստել Shadowmatic-ի ու PicsArt-ի պես մոբայլ հավելվածները ու կան էլի տաղանդավոր մարդիկ, ովքեր ցանկանում են արարել եւ գումար վաստակել՝ գտնվելով Հայաստանում:

Սակայն PayPal-ի նման համակարգերի բացակայությունը նրանց մրցակցությունից դուրս է թողնում: Նշեմ միայն մի հանգամանք՝ մեր հարեւան Վրաստանում պատկան մարմինները կարողացել են ստեղծել այնպիսի պայմաններ, որ PayPal-ը Վրաստանին գումարի ստացման ու դրա կանխիկացման համար ավելի լայն հնարավորություններ է տվել, քան նույն ԱՄՆ-ին:

Վստահեցնում եմ, որ եթե Հայաստանը քայլեր չձեռնարկի PayPal-ի ամբողջական գործարկման համար, շատ ընկերություններ ու անհատներ բիզնես հաշիվներ կբացեն Վրաստանում: Եւ այն միլիոնավոր դոլարների հոսքը, որ կարելի է Հայաստան բերել, կգնա Վրաստան: Վրացիները ի տարբերություն մեր չինովնիկների, հասկանում են, թե ինչպես կարելի է իրական ներդրումներ կամ պարզապես գումար բերել Վրաստան, իսկ մերոնք Արժույթի միջազգային հիմնադրամից, Համաշխարհային բանկից այն կողմ ոչինչ չեն տեսնում:

PayPal-ի ամբողջական գործարկումը կօգնի Վրաստանին, որպեսզի մեծացնի փողի մուտքի ֆիզիկական ծավալն իր երկիր, իսկ դա իր հերթին կբարձրացնի բարեկեցությունը: Այ սա է, որ տարիներ շարունակ չենք կարողանում բացատրել մեր չինովնիկներին: Պարտադիր չէ ԱՄՀ-ից կամ ՀԲ-ից վարկ խնդրել, այսօր ինտերնետով էլ կարելի է այդքան աշխատել, մարդիկ փողն իրենց ներքնակների տակ չեն պահելու, ծախսելու են, բնականաբար, դա ազդելու է բոլորի բարեկեցության վրա:

-Արդյո՞ք Հայաստանում չկա այս վճարային համակարգին համարժեք այլ ծառայություն:

-PayPal-ը օնլայն վճարային միջոց է ու նման միջոցներ կան ինչպես ամբողջ աշխարհում, այնպես էլ Հայաստանում: Բայց այստեղ կարեւորը ոչ թե աշխատելու համարժեքությունն է, այլ դրա տարածվածությունը: PayPal-ը 2015թ. տվյալներով ունի 179 մլն ակտիվ օգտատեր, որոնք մեկ տարվա ընթացքում ապահովել են 282 մլրդ դոլարի շրջանառություն: Այս թվերով դատելիս կարելի է ասել, որ Հայաստանում, բնականաբար, չկա PayPal-ին համարժեք համակարգ:

Որպեսզի ստորագրահավաքն իր ավարտին հասնի անհրաժեշտ է եւս 130 ձայն (5000-ից 4870-ն արդեն կա): Ստորագրահավաքին մասնակցելու համար պետք այցելել հետեւյալ հղումով՝ https://www.change.org/p/հայաստանի-կառավարություն-հայաստանում-paypal-ի-ամբողջական-գործարկման-ստորագրահավաք:

Քրիստինա Տեր-Մաթեւոսյան