Արա Բաբլոյանը՝ մեծ ունեցվածքի տեր

Բարձրաստիճան պաշտոնատար անձանց էթիկայի հանձնաժողովը հրապարակել է Ազգային ժողովի պատգամավոր Արա Բաբլոյանի 2015թ. տարեկան հայտարարագիրը:

Ըստ հայտարարագրի՝ Արա Բաբլոյանը նախորդ տարի 33 միլիոն 196 հազար դրամի եւ 30 հազար ԱՄՆ դոլարի չափով փոխառություններ է հանձնել: Պատգամավորի դրամական միջոցները նախորդ տարի կազմել են 37 միլիոն 775 հազար 146 դրամ, 27 հազար 250 ԱՄՆ դոլար, ինը հազար 500 եվրո եւ յոթ հազար շվեյցարական ֆրանկ: Բաբլոյանի եկամուտը գոյացել է հինգ տարբեր աշխատավարձերից եւ միասին կազմել 36 միլիոն 820 հազար դրամ: Բացի այդ՝ փոխառությունների դիմաց ստացված տոկոսների արժեքը կազմել է 2 միլիոն 426 հազար 593 դրամ:

Նրա կինը՝ Մանուշակ Երիցյանը, իր հայտարարագրում նշել է 688 միլիոն 770 հազար 641 դրամի չափով արժեթղթեր, 334 միլիոն 400 հազար դրամի չափով փոխառություններ: Պատգամավորի կնոջ դրամական միջոցները նախորդ տարվա սկզբին կազմել են 323 միլիոն 286 հազար 889 դրամ եւ 12 հազար ամերիկյան դոլար, իսկ տարեվերջին նվազել գրեթե յոթակի՝ կազմելով 47 միլիոն 320 հազար դրամ, իսկ դոլարը մնացել է անփոփոխ: Բաբլոյանի կինը որպես եկամուտի աղբյուր է նշել երեք տարբեր աշխատանքներից ստացված աշխատավարձ՝ ընդհանուր 11 միլիոն 130 հազար 977 դրամի չափով, վարձակալության դիմաց ստացված վճար՝ չորս միլիոն 200 հազար դրամի չափով, փոխառությունների դիմաց ստացված տոկոս՝ 38 միլիոն 821 հազար դրամի չափով եւ շահաբաժին՝ 33 միլիոն 434 հազար 115 դրամի չափով:

Նշենք նաեւ, որ Արա Բաբլոյանը բժշկական գիտությունների դոկտոր է, մանկական վիրաբույժ-ուրոլոգ, երեք գյուտի, 160-ից ավելի գիտական հոդվածների հեղինակ, արժանացել է մի շարք պարգեւների, ինչպես օրինակ՝ Մխիթար Հերացու մեդալի, ՀՀ նախագահի մրցանակի, ինչպես նաեւ Արաբկիր բժշկական համալիրի գիտական ղեկավարն է:

Քրիստինա Տեր-Մաթեւոսյան