Գեղարքունիքում մեկնարկել են անասունների գարնանային պատվաստումները

Գեղարքունիքի մարզում պետպատվերի շրջանակում մարտի սկզբից մեկնարկել են անասունների տարբեր հիվանդությունների դեմ պատվաստումները եւ հակահամաճարակային միջոցառումները:Ինչպես «Արմենպրես»-ին տեղեկացրեց ՀՀ գյուղատնտեսության նախարարության  «Անասնաբուժսանիտարիայի եւ բուսասանիտարիայի ծառայություններ ի կենտրոն» ՊՈԱԿ Գեղարքունիքի մարզային կենտրոնի տնօրեն Սարգիս Ավագյանը, միջոցառումներն իրականացվում են ՀՀ գյուղատնտեսության նախարարության «Գյուղկենդանիների պատվաստում» ծրագրի շրջանակում: Անասուններին տարբեր հիվանդություններից զերծ պահելու նպատակով տարվա կտրվածքով կատարվում են 9 միջոցառումներ: «Մարտին մարզում պատվաստումներ կիարականացվեն սիբիրախտ, խշխշան պալար հիվանդությունների դեմ: Բրուցելյոզ հիվանդությության ախտորոշման համար կկատարվեն անասունների արյան նմուշառումներ, իսկ  ապրիլին կմեկնարկի դաբաղի դեմ պատվաստան գործընթացը: Պատվաստանյութերի եւ անասնաբույժների ծախսերը հոգում է պետությունը:

Յուրաքանչյուր անասնաբույժ օրական հասցնում է պատվաստել 450-500 կենդանու»,-նշեց Սարգիս Ավագյանը:  Գեղարքունիքում հակահամաճարակային միջոցառումների ժամանակացույցին եւ ընթացքին հետեւում է ՀՀ գյուղնախարարության սննդամթերքի անվտանգության պետական ծառայության Գեղարքունիքի մարզային կենտրոնը:

Վերահսկողությունն իրականացնող անասնաբույժ-տեսուչներն այս ընթացքում անասնաբույժների կողմից թերացումներ կամ  անասունների հիվանդության բռնկման դեպքեր չեն գրանցել: Գեղարքունիքի մարզում այսօր գրանցված են 124.700 խոշոր եւ 111.000 մանր եղջերավոր անասուններ, 333459 թեւ թռչուն: Անասնահամաճարակների դեմ պայքարի միջոցառումների ժամանակացույցի համաձայն, թռչունների եւ խոզերի ժանտախտ հիվանդության դեմ պատվաստումները կիրականացվեն երկրորդ եւ երրորդ եռամսյակների ընթացքում:  Գարնանը եւ աշնանը կատարվում է արյան նմուշառում խոշոր եղջերավորների մայրաան կազմից՝ շուրջ 80.000 կենդանուց: Գործընթացը կատարվում է նաեւ մանր գյուղկենդանիների 60.000 մայրական կազմի համար, սակայն այս դեպքում տարվա մեջ մեկ անգամ` ամռան ամիսներին: Նմուշառումների շնորհիվ անասունների շրջանում կանխվում է բրուցելյոզի բռնկումը: «Անասունների արոտի շրջանը մեզանում սկսվում է ապրիլի վերջերից եւ մայիսի սկզբներից: Արվում է հնարավորը, որ  անասուններն արոտ դուրս գան առողջ վիճակում»,-հավաստեց Սարգիս Ավագյանը:

Խոսրով Խլղաթյան