Հայաստանում գիտեն, թե ինչպես Նովրուզին հյուրընկալեն իրանցիներին

Իրանական նոր տարվա` Նովրուզ Բայրամի օրերին Հայաստան այցելող իրանցիների հոսքն ավելանում է: «Արմենպրես»-ի հետ զրույցում ՀՀ էկոնոմիկայի նախարարության Զբոսաշրջության զարգացման քաղաքականության վարչության պետ Մեխակ Ապրեսյանը թեև դժվարացավ թվեÖ € նշել, բայց նկատեց, որ 2013 թվականից ի վեր տարվա կտրվածքով դեպի Հայաստան իրանցի զբոսաշրջիկների աճ է արձանագրվում: Իսկ մարտյան այս օրերին, բնականաբար, այցելությունների թիվն ավելանում է: «Իրանից Հայաստան այցելություններն ընդհանրապես ամբողջ տարվա ընթացքում են ակտիվ, ոչ միայն այս օրերին, բայց այս օրերին առավել ակտիվ են, որովհետև նրանց համար տոն է: Թվերը ցույց են տալիս, որ 2015-ին Իրանից Հայաստան այցելությունները 2014-ի համեմատ աճել են շուրջ 24 տոկոսով. մոտ 140 հազար այցելություններով ավելի է եղել 2015-ը»,-ասաց Մեխակ Ապրեսյանը:

Նա հիշեց, որ 2012-2013 թթ. գրանցվել էր Իրանից Հայաստան զբոսաշրջության զգալի անկում, ինչը պայմանավորված էր Իրանում ազգային արժույթի արժեզրկմամբ: «Նրանց դրամի արժեզրկումն ազդեց Իրանից արտագնա զբոսաշրջության վրա, մեզ մոտ էլ նվազեցին թվերը, բայց հետո կամաց-կամաց փոխվեց իրավիճակն, ու մենք արդեն աճ ունենք»,-շեշտեց պաշտոնյան:

Հարցին ի պատասխան` արդյոք իրացիները Հայաստան են գալիս ավելի շատ ժամանցի և զվարճանքի նպատակով` Մեխակ Ապրեսյանը նշեց, որ նրանք համատեղում են զբոսաշրջության բոլոր բաղադրիչները. գալիս են և հետաքրքիր ժամանակ անցկացնելու, և պատմամշակութային վայրեր այցելելու նպատակով:

Մեխակ Ապրեսյանը նկատեց, որ հյուրանոցների, զբոսաշրջային ընկերությունների հետ իրականացրած հարցման արդյունքում պարզ է դարձել, որ իրանցիները մեծամասամբ (70 տոկոս) գալիս են ընտանիքներով:

Ինչ վերաբերում է իրանցի զբոսաշրջիկների համար կարևոր ծառայությունների մատուցմանը, ինչպիսին է օրինակ ռեստորաններում, սննդի կետերում հալալ մորթով մսի օգտագործումը, ապա Մեխակ Ապրեսյանն ընդգծեց, որ մասնավորը հասկացել է պահանջարկն, ու արդեն երևանյան շատ խանութներում կարելի է գտնել հալալ մորթով միս: «Մենք էլ մտածում ենք, որ ավանդական փառատոնների ժամանակ, որտեղ սնունդ կմատուցվի, հաշվի առնել նաև այս հանգամանքը»,-ասաց Ապրեսյանը` շեշտելով, որ ժամանակ առ ժամանակ խորհրդակցություններ են իրականցնում ոլորտի շահագրգիռ կողմերի հետ` փորձելով մ շակել ուղիներ ոլորտն առավել գրավիչ, իսկ ծառայությունները` որակյալ, դարձնելու ուղղությամբ: «Ձգտում ենք այնպես անել, որ մեզ մոտ այցելող զբոսաշրջիկներն` անկախ ազգությունից, սեռից, տարիքից, դավանանքից, իրենց հավասարապես լավ զգան ու ընդունված: Փորձը ցույց է տալիս, որ առ այսօր այդպես է եղել»,-հավելեց Մեխակ Ապրեսյանը:

Անի Նազարյան