Եվրոպային պետք է լրացուցիչ անվտանգություն, որպեսզի պաշտպանի իր արժեքային համակարգը. Անուշ Սեդրակյան

Պատուհաս դարձած ահաբեկչության դեմ ինչպիսի՞ հետևություն կամ հակազդեցություն պետք է լինի Եվրոպայի կողմից: Հարցի շուրջ Past.am-ը զրուցեց «Ազատ դեմոկրատներ» կուսակցության ներկայացուցիչ, վերլուծաբան Անուշ Սեդրակյանի հետ: Վերջինս մասնավորապես նշեց. «Գերմանիայի դեսպանին ասացի,որ սա քաղաքակրթական ճգնաժամ է, իսկ քաղաքակրթական ճգնաժամի համար պետք են լիովին այլ մեխանիզմներ: Այս մեխանիզմների թվում պետք է լինի ֆիլտրացիան: Այսինքն՝ պետք է իմանալ, թե ով է մուտք գործում Եվրամիության տարածք, որովհետև շատ հաճախ և տարբեր անձնագրերով մուտք են գործում հենց ահաբեկիչները: Եթե խաղաքարտին դրված է մեկին վիրավորել, ահաբեկչության կասկածանքով ավելի ուժեղ ստուգման ենթարկել, բայց դրա փոխարեն ունենալ ավելի ուժեղ Եվրոպա, ապա կարելի է դա զոհաբերել: Նման վերաբերմունքը չի կարող համարվել Եվրոպայում մարդու իրավունքների խախտում, բայց դա կարող է փրկել բազմաթիվ մարդկային կյանքեր»:

Ըստ Սեդրակյանի՝ եվրոպական քաղաքակրթության հետևորդների երկու ճամբար կա, որոնցից առաջինը հետամուտ է արժեքներին, մյուսը՝ անվտանգությանն ու տնտեսական զարգացման համակարգերին: Վերլուծաբանի խոսքով՝ դրանք հակադիր ճամբարներ չեն, այդ երկու ճամբարները կարելի է հաշտեցնել՝ պայմանով,որ Եվրոպան աշխատի նոր տեսլականով:

Այդ տեսլականը, Սեդրակյանի կարծիքով, հետևյալն է. «Եվրոպային պետք է լրացուցիչ անվտանգություն, որպեսզի պաշտպանի իր արժեքային համակարգը: Խոսքը չի գնում զուտ եվրոպական տարածքի անվտանգության մասին, խոսքն այն մասին է, որ վտանգված են ավանդական եվրոպական արժեքները: Այս ճգնաժամը պետք է հաղթահարել ժամ առաջ»:

Հիշեցնենք, որ երեկ՝ մարտի 22-ին, Բրյուսելի օդանավակայանում և մետրոյում մի քանի պայթյուն որոտաց: Ահաբեկչության պատասխանատվությունն ստանձնել է «Իսլամական պետություն» խմբավորումը:

Լևոն Փանոսյան