Իրանի նկատմամբ պատժամիջոցների վերացումը նպաստավոր է նաեւ մեր երկրում զբոսաշրջության զարգացման համար

 Իրանի նկատմամբ պատժամիջոցների վերացումը նպաստավոր կլինի Հայաստանում զբոսաշրջության զարգացման համար, քանի որ ավելի շատ գումարներ վաստակելով՝ մեր երկիր որպես զբոսաշրջիկ ժամանող իրանցիներն ավելի շատ գումարներ կծախսեն այստեղ: Ինչպես հաղորդում է «Արմենպրես»-ը, Հանրային ռադիոյի պարսկերեն հաղորդումների ավագ խմբագիր Տիգրան Դավուդյանը մարտի 24-ի ասուլիսում նշեց, որ Նովրուզ ի օրերին զգալի չափով ավելանում է իրանցի զբոսաշրջիկների հոսքը դեպի Հայաստան:

«Տուրիզմը ՀՀ-ի գերակա ճյուղերից է համարվում: Ինչ վերաբերում է Իրանի Իսլամական Հանրապետությանը, այս օրերին Իրանի տուրիզմի վարչությունը հայտարարել է, որ Իրանի բնակչությունը կազմում է 80 մլն մարդ, որոնցից 60 միլիոնը այս օրերին տեղաշարժվել են երկրի մեջ կամ երկրից դուրս: Իրանցիների նոր տարին նույնպես տևում է երկու շաբաթ: Տարբեր հաշվարկներով, այս տարի միայն Իրանից Հայաստան մուտք կգործի մոտավորապես 10.000 մարդ, որոնց մենք պետք է պատրաստ լինենք ընդունել և սպասարկել» ,-ասաց Դավուդյանը:

Հաշվի առնելով, որ վերջերս Թուրքիայում տեղի էր ունեցել ահաբեկչական գործողություն, որի հետևանքով Իրանի քաղաքացի էր զոհվել, իրանցիները խուսափում են գնալ Թուրքիա, քանի դեռ կա ահաբեկչությունների վտանգը: Իսկ Հայաստանը այդ տեսանկյունից անվտանգ և ապահով է համարվում, ու դրա համար նրանք գալիս են Հայաստան:

«Զվարթնոց օդանավակայանում խնդիրներ չեն լինում, պատահել է, որ օրական երեք թռիչք ենք ունեցել: Այլ խնդիր է ցամաքային ճանապարհով Իրանից Հայաստան գալը, այդտեղ իրանցի զբոսաշրջիկները դժվարությունների են հանդիպում, հիմնականում Մեղրիի անցակետում, երբ տեղ հասնելով, պարզվում է, որ հերթափոխ է և մարդիկ 4-ից 6 ժամ սպասում են մինչև անցնեն Հայաստանի սահման: Եթե իրանից 10.000 զբոսաշրջիկ գա Հայաստան և ամեն մեկի մոտ լինի 1000 դոլար, որը կծախսեն մեր երկրում, ապա ընդհանուր հաշվարկով մեր երկիր մուտք կգործի 10 մլն դոլար միայն Իրանից: Հետևաբար, մենք պետք է լարված շխատենք և պատրաստ լինենք ընդունել ու սպասարկել այդ մարդկանց », - ասաց Դավուդյանը: