Արտոնություններ առաջնագծում զինծառայություն կրելու համար
БЛОГՏիգրան Աբրահամյանը ֆեյսբուքյան իր էջում գրում է.
Արտոնություններ առաջնագծում զինծառայություն կրելու համար
Կառավարության այսօրվա նիստում հաստատվեց «Պետական կենսաթոշակների մասին» Հայաստանի Հանրապետության օրենքում լրացում կատարելու մասին» Հայաստանի Հանրապետության օրենքի նախագիծը:
Վերոնշյալ փոփոխությունը սահմանում է, որ առաջնագծում մարտական հերթապահություն իրականացնող ՀՀ զինված ուժերի սպայական, ենթասպայական և պայմանագրային շարքային կազմի զինծառայողների թոշակը կլինի կրկնակի:
Առավել պարզ ասած, եթե սպան զինվորական ծառայություն է կրել 20 տարի, որոնցից 15 տարին առաջին գծում, ապա վերջինիս կենսաթոշակը սահմանելիս, այդ 15 տարին կրկնապատկվում է, ինչը էականորեն կավելացնի վերջինիս կենսաթոշակը:
Առաջնագծում մեր զինծառայողների գործադրած ջանքերի ու բացառիկ ծառայությունների շնորհիվ է, որ այսօր սահմանին պահպանվում է հարաբերական խաղաղությունը, իսկ հակառակորդի ցանկացած սադրանքին հայկական ստորաբաժանումները համարժեք պատասխան են տալիս:
Այս իրավիճակում պետք է արժանին մատուցել բոլոր զինծառայողներին, հատկապես նրանց, ովքեր տարիներով, բառիս բուն իմաստով, խրամատում են ապրում:
Մարտական դիրքերում արելի է հանդիպել սպաների, պայմանագրային զինծառայողների, ովքեր 10 տարուց ավելի ծառայություն են կրում մարտական դիրքերում:
Ի դեպ, Վազգեն Սարգսյանի անվան ռազմական ինստիտուտի շրջանավարտների գերակշռող մասը, ավարտական քննություններից հետո, կամավոր մեկնում են առաջնագիծ:
Զինծառայողների խնդիրները պետք է մշտապես գտնվեն կառավարության ուշադրության կենտրոնում են և կառավարությունը հնարավորության սահմաններում պետք է փորձի քայլ առ քայլ լուծումներ տալ դրանց:
Տրվող արտոնություններով պետությունը նաև իր գնահատականն է արտահայտում սեփական կյանքը հայրենիքին ու բանակին նվիրաբերած մարդկանց: