Ապարանցին հարբած վարել է իր նորոգմանը հանձնված մեքենան, բախվել է ծառին. տեղում մահացել է անչափահաս դուստրը

Blognews.am-ը գրում է.

Արագածոտնի մարզի ընդհանուր իրավասության դատարանում Սերգեյ Մարաբյանի նախագահությամբ ավարտվել է Զաքար Ս.-ի գործի դատական քննությունը:

Արագածոտնի մարզի 39-ամյա բնակիչ Զաքար Ս.-ն մեղադրվում էր մահվան ելքով ավտովթարի համար՝ ՀՀ քրեական օրենսգրքի 242 հոդվածի 2-րդ մասով:

Վթարի հետևանքով մահացածը Զաքար Ս.-ի անչափահաս դուստրն է…

Ըստ մեղադրանքի՝ 2015 թվականի սեպտեմբերի 1-ին, ժամը 23-ի սահմաններում գտնվելով ալկոհոլային խմածության վիճակում, «փոխանակ ձեռնպահ մնալու ավտոմեքենա վարելուց»՝ Զաքար Ս.-ն վարել է վերանորոգման նպատակով իր մոտ գտնվող «Ֆոլքսվագեն» ավտոմեքենան, որի սեփականատերը Սօսսի Գ.-ն է:

Զաքար Ս.-ն ոչ միայն ինքը ձեռնպահ չի մնացել խմած վիճակում մեքենա վարելուց, այլև մեքենա է նստեցրել նաև իր 15-ամյա դստերը:

Զաքարը ուրիշի մեքենայի ղեկին նստած՝ երթևեկել է Արագածոտնի մարզի Արագած-Ծաղկաշեն միջհամայնքային ավտոճանապարհով՝ Ծաղկաշեն գյուղի ուղղությամբ:

Ժամը 23-ն անց 30-ի սահմաններում հասնելով Ծաղկաշենի սկզբնամասին հարող ճանապարհահատվածին, հաշվի չառնելով առկա ճանապարհային պայմանները, մասնավորապես՝ շրջադարձի առկայությունը, և չընտրելով երթևեկության համապատասխան անվտանգ ռեժիմ՝ Զաքար Ս.-ն իրականացրել է իր վարած մեքենայի ընթացքի ոչ պատշաճ կառավարում, թույլ է տվել ՃԵԿ մի քանի կետերի պահանջներին հակասող գործողություններ:

Արդյունքում մեքենան կորցրել է կառավարելիությունը, դուրս է եկել ճանապարհի երթևեկելի մասի սահմաններից, ընկել է ճանապարհի ձախ կողմում գտնվող առուն, որից հետո բախվել է ճամփեզրի ծառին:

Վթարի հետևանքով Զաքարի 15-ամյա դուստրը տեղում մահացել է, իսկ ինքը՝ Զաքարը, ծանր վիճակում տեղափոխվել է հիվանդանոց:

Ընդհանուր իրավասության դատարանում Զաքար Ս.-ն իրեն լիովին մեղավոր է ճանաչել, միջնորդել է գործը քննել արագացված կարգով:

Տուժողի իրավահաջորդը՝ մահացած երեխայի հորեղբայրը, հայտնել է, թե եղբոր նկատմամբ բողոք, պահանջ չունի:

Դատարանը հաշվի է առել, որ Զաքար Ս.-ն ֆիզիկապես վատառողջ է՝ վթարի հետևանքով նրա առողջությանը պատճառվել է ծանր վնաս՝ կյանքին վտանգ սպառնացող:

Ըստ հիվանդանոցային տեղեկանքի՝ Զաքար Ս.-ն կարիք ունի հետագա ամբուլատոր բուժման:

Նա ընտանիքի միակ կերակրողն է: Նրա խնամքին են չաշխատող կինը, անչափահաս որդին, թոշակառու ծնողները՝ հայրը 2-րդ խմբի հաշմանդամ է:

Զաքար Ս.-ն նախկինում դատված չի նեղել, բնութագրվում է դրական:

Վթարի ենթարկված «Ֆոլքսվագեն» մեքենայի սեփականատեր Սօսսի Գ.-ն դատարանին ուղղված իր դիմումով հայտնել է, թե Զաքարի դեմ բողոք, պահանջ չունի, քանի որ նա հատուցել է իրեն պատճառված գույքային վնասը:

Դատարանը արձանագրել է, որ իր որոշման համար «վճռական նշանակություն ունի այն հանգամանքը, որ 15-ամյա տուժողը ամբաստանյալի դուստրն է»:

Վթարի պահին ամբաստանյալի՝ ալկոհոլի ազդեցության տակ գտնվելը դատարանը գնահատել է, որպես Զաքար Ս.-ի արարքի «հանրային վտանգավորության բնույթն ու աստիճանը բարձրացնող հանգամանք»:

Զաքար Ս.-ն մեղավոր է ճանաչվել ՀՀ քրեական օրենսգրքի 242 հոդվածի 2-րդ մասով:

Նա դատապարտվել է 1 տարի ազատազրկման՝ 3 տարի ժամկետով զրկվելով տրանսպորտային միջոցներ վարելու իրավունքից:

Զաքար Ս.-ի նկատմամբ՝ հիմնական պատժի մասով, դատարանը կիրառել է պայմանական դատապարտություն և սահմանել է 2 տարի փորձաշրջան: