Կանանց տոների մեկամսյակի, նվերների ու անակնկալների, ինչպես եւ ինքնաբավ կին լինելու մասին Life.panorama.am-ը խոսել է «Ռեինկարնացիա» խմբի մեներգիչ Ռոլանդ Գասպարյանի կնոջ՝ «Գոհար» համույթի պարուհի Գայանե Հովհաննիսյանի հետ:
Մեզ հետ զրույցը Գոհարը նախ շնորհավորեց բոլոր կանանց տոնական մեկամսյակի կապակցությամբ, ապա պատմեց իրենց տանն անցնող մեկամսյակից.
«Նախ շնորհավորում եմ բոլոր կանանց եւ մաղթում շատ ժպիտներ եւ գունավոր օրեր: Պետք է ասեմ, որ մեր փոքրիկ ընտանիքում սիրում ենք նշել անխտիր բոլոր տոները, իսկ կանանց մեկամսյակը բացառություն չէ: Ռոլանդը մի հետաքրքիր սովորություն ունի՝ կապ չունի, թե ինչ տոն է, նա սիրում է նվերները մատուցել ուղիղ կեսգիշերին, երբ օրը փոխվում է»,- նշեց Գայանեն ու թեմայի շուրջ պատմեց բոլորովին վերջերս ամուսնու մատուցած անակնկալի մասին.
«Այն, որ Ռոլանդը սիրում է անակնկալներ ու նվերներ մատուցել, վաղուց գիտեմ, բայց երբեմն նա գերազանցում է իմ պատկերացումները: Օրինակ սիրահարների տոնին կրկին ուղիղ կեսգիշերին իր ուրախ դեմքով նա տուն եկավ եւ անակնկալ կերպով հանձնեց մեր ճանապարհորդության տոմսերը, որին բացարձակ չէի սպասում»:
Գայանեն չգիտի ամուսնուն ռոմանտիկ մարդ համարի, թե չէ, բայց մի բան հաստատ է.
«Թե որքանով դա ռոմանտիկ տեսակի հետ կապ ունի, չգիտեմ, բայց որ նա սիրում է անպատճառ նվերներ ու ծաղիկներ ինձ մատուցել, դա հաստատ է»:
Ի դեպ, Գայանեն այն կանանցից չէ, ով հուշում է ամուսնուն, թե ինչ նվերներ ստանա.
«Նվերների առումով աշխատում եմ ամուսնուս շատ չմիջամտել, քանի որ նա ինձ շատ լավ է ճանաչում ու գիտի, թե այդ պահին ինձ ինչ է հարկավոր, կամ թե ինչ կուզենայի ունենալ: Միշտ հիացել եմ Ռոլանդի ճաշակով, նրան շատ եմ վստահում»,- նկատեց պարուհին:
Գայանեի համար կնոջ կատարյալ կարգավիճակը մայրանալն է.
«Երբ կինը մայր է դառնում, նա իսկապես կատարյալ է դառնում, հենց այդ ժամանակ էլ ընտանիքը դառնում է լիարժեք, այդ թվում կինն էլ այդ ժամանակ է իրեն լիարժեք կին զգում. Մեր ընտանիքում դեռեւս սպասում ենք այդ լիարժեքությանը, հուսամ Աստված շուտով մեզ էլ կպարգեւի այդ երջանկությունը»,- նշեց նա:
Չնայած նրան, որ Գայանեն ու Ռոլանդը համարվում են հայտնի ժամանակակից զույգերից մեկը, միեւնույն է, Գայանեի համար շատ կարեւոր է պահպանել հայ կնոջ կերպարը, իսկ հայ կնոջ վերաբերյալ իր պատկերացումները կոնկրետ են.
«Իմ պատկերացումների հայ կինը պետք է լինի առաքինի, հոգատար ու նվիրված իր ընտանիքին: Իրականում այս երեք հատկանիշների մեջ ներառված են շատ կարեւոր մանրուքներ, որոնցով հայ կինը մշտապես տարբերվել եւ իր կայուն տեղն է ունեցել»,- նշեց նա:
Գայանե Գովհաննիսյանը մեզ հետ զրույցում անկեղծորեն պատմեց իր թուլությունների եւ առավելությունների մասին.
«Չգիտեմ՝ որքանով է դա մարդկանց համար թուլություն դիտարկվում, բայց ես շատ հուզվող մարդ եմ, կարող եմ մի փոքր բանից անմիջապես հուզվել, ուզում եմ ամեն կերպ օգտակար դառնալ տվյալ իրավիճակում, կամ տվյալ մարդու համար, իսկ այ առավելություններիս մասին դժվար է խոսել, չեմ կարող ինքս իմ մասին խոսել ու պարծենալ ինձնով»,- անկեղծորեն պատմեց Գայանեն:
Նա չթաքցրեց նաեւ, որ չափավոր կամակոր ու խորամանկ է.
«Կարծում եմ յուրաքանչյուր կին պետք է չափավոր կամակոր ու խորամանկ լինի, քանի որ դա կնոջը բնորոշ հատկանիշներ են»:
Մշտապես խնամված տեսքով հանդես եկող պարուհին շեշտեց նաեւ, որ գեղեցկությունը ունի շատ ավելի կարեւոր գաղտնիք, քան շպարն ու դիետաները.
«Կնոջ խնամված լինելը կախված չէ շպարից, գլխավորը անգամ տանը լինել խնամված ու կոկիկ: Իսկ այ կատարյալ գեղեցկության համար գլխավորը սերն է թե տղամարդուդ նկատմամբ, թե աշխատանքիդ, դրանք կնոջը առանձնահատուկ ոգեւորություն ու հմայք են հաղորդում»,- նշեց նա:
Իսկ վերջում Գայանեն կիսվեց իր ներդաշնակի ընտանիքի օրինակով.
«Ընտանիքում ներդաշնակություն ստեղծելու համար նախ հարկավոր է երկկողմանի հարգանք եւ վստահություն: Միայն կինը, կամ միայն տղամարդը չի կարող պահել այդ ներդաշնակությունը: Ժամանակի ընթացքում զույգերը կամ հասնում են դրան կամ չի ստացվում. Մեր զույգի միջեւ ամեն բան փոխադարձ է»,- ավարտեց Գոհար Հովհաննիսյանը:
