Բյուրականցիները կբուժվեն նորակառույց ամբուլատորիայում

ՀՀ առողջապահության նախարար Արմեն Մուրադյանն Արագածոտնի մարզպետ Գաբրիել Գյոզալյանի հետ մասնակցել է Բյուրականի բժշկական ամբուլատորիայի բացմանը։ Այն «Առողջապահական համակարգի արդիականացում» ծրագրի երկրորդ փուլի լրացուցիչ ֆինանսավորման ընթացքում անցկացված շինարարական մրցույթների արդյունքում տնտեսված միջոցներով 2016 թվականին կառւցվող 5 ամբուլատորիաներից մեկն է։

Ինչպես «Արմենպրես»-ին տեղեկացրին ՀՀ առողջապահության նախարարության հասարակայնության հետ կապերի բաժնից, միջոցառումը մեկնարկել է Բյուրականի Սուրբ Հովհաննես եկեղեցու հոգևոր հովիվ Տեր Մամբրե քահանա  Պատուրյանի օրհնության կարգով:

Բացի համայնքի 5 տոկոս ներդրումից, անձնական մասնակցություն է ունեցել նաև Բյուրական համայնքի նախկին բնակիչ, արդեն շուրջ 20 տարի Մոսկվայում ապրող «Արմգրուպ» շինարարական ընկերության տնօրեն Տարիել Մարգարյանը։ Հավատարիմ մնալով իր խոստմանը` նա շտապօգնության մեքենա է նվիրաբերել համայնքին: Ժամանակակից որոշ սարքավորումներով հագեցած մեքենայի աշխատանքն էականորեն կնպաստի բժշկական օգնության և սպասարկման բարելավման գործընթացին` նաև այլ համայնքների բնակչության համար հնարավորություն ընձեռելով ժամանակակից չափանիշներին համապատասխան առանային բուժօգնություն ստանալ:   

«Հերթական գյուղական ամբուլատորիայի բացումն է, որը հաստատում է ՀՀ կառավարության մոտեցումները.  այն է` շեշտադրել  բուժօգնությունն առաջնային օղակը և իրականացնել  բնակչությանն առողջ պահելու  ծրագրեր»,- նշել է ՀՀ առողջապահության նախարար Արմեն Մուրադյանը: Նրա գնահատմամբ` ամբուլատորիան պետության, միջազգային  կազմակերպության, համայնքի, ինչպես նաև անհատ ներդրողի փայլուն    համագործակցության արդյունք է:

Նախարարը ողջունել և օրինակելի է համարել  նաև բարերարի` հետագայում շտապօգնության մեքենան,  ինչպես նաև  ամբուլատորիան անհրաժեշտ բժշկական սարքավորումներով հագեցնելու  ցանկությունը:  

1950-ականներին կառուցված անհարմարավետ, վատթար վիճակում գտնվող  շենքից հետո անհրաժեշտ սարքավորումներով ու պարագաներով հագեցած նորակառույց, ժամանակակից  ամբուլատորիան բարձր է գնահատվել ներկա գտնվող բազմաթիվ բնակիչների կողմից։

«Ցանկանում եմ բնակչության անունից շնորհակալություն հայտնել Հայաստանի Հանրապետության Նախագահին, ՀՀ կառավարությանը, ինչպես նաև ՀՀ առողջապահության նախարարին, ով անձնական  մեծ ներդրում ունի այս գործում»,- ասել է Արագածոտնի մարզպետ Գաբրիել Գյոզալյանը:

Բյուրական համայնքում նոր ամբուլատորիայի կառուցման և հագեցման նպատակով ներդրվել է շուրջ 73.7 մլն ՀՀ դրամ։ «Հայաստանի առողջապահական համակարգի արդիականացում ծրագիր-2» հավելյալ ֆինանասավորման վարկային ծրագրի շրջանակում ԲԱ-ի  երեք բժիշկ և երկու բուժքույր մասնագիտացել են որպես ընտանեկան բժիշկ և բուժքույր: Ամբուլատորիան սպասարկում է Բյուրական, Անտառուտ և  Օրգով  համայնքների շուրջ 5200 բնակիչներին։

ՀՀ առողջապահության նախարարը մարզային այցը եզրափակել է Աշտարակի բժշկական կենտրոնում, ուր մարզպետի մասնակցությամբ բուժանձնակազմի հետ  քննարկվել են բժշկական հաստատության զարգացման հնարավորությունները: