Ստեփանակերտի հիվանդանոցում գտնվող վիրավորների վիճակը շարունակում է մնալ կայուն ծանր

News.am-ը գրում է.

Ստեփանակերտի Հանրապետական բժշկական կենտրոն  տեղափոխված վիրավորների վիճակը կայուն ծանր է: Այս մասին NEWS.am-ի հետ զրույցում  հայտնեց հիվանդանոցի տնօրեն Կարեն Բազյանը:

Նշենք, որ  երեկ հիվանդանոց են տեղափոխվել չորս վիրավոր` Մարտակերտի շրջանի գ. Թալիշից Ծովինար Աղաջանյանը (ծն. 1961թ.) աջ բազկի վ/3 հրազենային, բազուկոսկրի կոտրվածք եւ հոդի վնասվածքով, ձախ բազկի փափուկ հյուսվածքների վնասվածքներով: Թալիշից Գարեգին Աղաջանյանը (ծն. 1973թ.) որովայնի կույր թափանցող հրազենային վիրավորումով եւ բարակ աղու վնասումով, Մադաղիսից Զավեն Ավանեսյանը (ծն. 1985թ.) իրանի բազմաթիվ հրազենային վիրավորումներ ներթափանցված որովայնի խոռոչ, լյարդի վնասումով եւ Հայկ Թորոսյանը (ծն. 1997թ. զինծառայող) գլխուղեղի բաց թափանցող հրազենային կույր վիրավորումով:

ԼՂՀ առողջապահության նախարարության Հանրապետական բժշկական կենտրոնում Ծովինար Աղաջանյանի մոտ կատարվել է վերքի առաջնային մշակում, Գարեգին Աղաջանյանի մոտ` լապարատոմիա, բարակ աղու կարում, Զավեն Ավանեսյանի մոտ` լապարատոմիա, լյարդի վնասվածքի կարում, Հայկ Թորոսյանի մոտ`գանգի դեկոմպրեսիոն տրեպանացիա: Հայկ Թորոսյանը ավելի ուշ տեղափոխվել է Երեւան:

Նրանք գտնվում են վերակենդանացման բաժանմունքում:

Նշենք, որ Ադրբեջանի նախաձեռնած արդեն երկրորդ օրը շարունակվող Լեռնային Ղարաբաղի դեմ լայնամասշտաբ ռազմական գործողությունների հետեւանքով զոհեր կան երկու կողմերից։ Վերջին տվյալներով, ադրբեջանական կողմը կորցրել է ավելի քան 200 մարդ։ Ոչնչացվել է հակառակորդի երկու ուղղաթիռ, 3 տանկ, 2 անօդաչու թռչող սարք։ Բացի այդ, արդեն ապրիլի 3-ին հայկական կողմը կարեւոր հենակետից հետ է շպրտել հակառակորդին՝ խոցելով եւս երկու տանկ։

Ղարաբաղյան կողմից զոհվել է 18, վիրավորվել 35 մարդ։ Զոհեր կան նաեւ քաղաքացիական բնակչության շրջանում։ «Գրադ» կայաքից արձակած կրակոցից 12-ամյա երեխա է մահացել, եւս երկու երեխա վիրավորվել են։