7 հայտնի գրողներ ու նրանց սիրելի գրքերը

Լավ գրող լինելու գլխավոր գաղտնիքներից մեկը շատ ընթերցնելն է և գիրքդ տպագրելուց հետո ընթերցանությունը չդադարեցնելը։ Ստորև ներկայացնում ենք աշխարհի ամենահայտնի գրողների ամենասիրելի գրքերը։ Ո՞վ գիտի, միգուցե սրանցից որոշներն իրենց տեղը գրավեն նաև Ձեր սիրած գրքերի ցանկում։

 7  Էռնեստ Հեմինգուեյ

Հեմինգուեյը մի անգամ ասել է.

Չկա ավելի հավատարիմ ընկեր, քան գիրքն է։

1935թ․-ին նա իր մի քանի «ընկերների» մասին «Esquire» ամսագրին տված հարցազրույցւմ նշել է.

Ավելի լավ է դրանք նորից կարդամ... քան տարեկան միլիոնավոր դոլարների կայուն եկամուտ ունենամ։

«Աննա Կարենինա», «Մադամ Բովարի», «Պատերազմ և խաղաղություն», «Կարամազով եղբայրները», «Հեքելբերի Ֆինը», «Թագուհի Մարգոն» «Դուբլինցիները», «Ստրկություն մարդկային». ահա այն գրքերից մի քանիսը, որոնց մասին այդպես է արտահայտվել գրողը։

1934թ․-ի գարնանը մի երիտասարդ տղամարդ, ով ցանկանում էր գրող դառնալ, Ֆլորիդա էր այցելել իր կուռքին հանդիպելու համար։ Էռնեստ Հեմինգուեյը նրա համար գրի առավ այն գրքերի ցանկը, որոնք կոգեշնչեին երիտասարդ գրողին։ 

 6  Ռեյ Բրեդբերի

Գիտագեղարվեստական գրականության ամենավառ ներկայացուցիչներից մեկի՝ Ռեյ Բրեդբերիի սիրած գրքերի ցանկը, որը քննարկվեց «Barnes & Noble»-ի հետ 2003թ․-ին, երբ նա 83 տարեկան էր, բավականին անսպասելի էր։ Դրանց շարքում էր, ինչպես նշում էր Բրեդբերին, «Ջորջ Բերնարդ Շոուի էսեների հավաքածուն, որն իր մեջ բովանդակում է մարդկության վերջին հարյուր կամ ավելի շատ տարիների ամբողջ իմաստությունը», Լորեն Այզլիի գրքերը, «ով վերջին 40 տարիների լավագույն բանաստեղծն ու էսեիստն է» և Հերման Մելվիլի «Մոբի Դիկը», որը, գրողի պնդմամբ, ազդել է նրա կյանքի ավելի քան 50 տարիների վրա։ 
Գրքերը, որոնք ազդել են նրա կարիերայի վրա, ամենայն հավանականությամբ նաև նրա ամենասիրելի գրքերն են, դրանցից են Էդգար Րայս Բյորոուսի «Ջոն Քարտեր», «Մարսի զորավարը»։

Դրանք իմ կյանք մտան, երբ ես 10 տարեկան էի, և ստիպեցին ինձ դուրս գալ ամառային սիզամարգերի վրա, բարձրացնել ձեռքերս ու Մարսին խնդրել ինձ տուն տանել։ Կարճ ժամանակ անց ես սկսեցի գրել ու շարունակեցի այս գործընթացը դրանից ի վեր։ Եվ այս ամենը՝ պարոն Բյորոուսի շնորհիվ։ 

 5  Ջորջ Մարտին

Թերևս զարմանալի չէ, որ «Գահերի խաղի» հեղինակի սիրելի գիրքը Թոլքինի «Մատանիների տիրակալը» ստեղծագործությունն է, որը նա առաջին անգամ կարդացել է դպրոցական հասակում։ Իսկ 2014թ.-ին «Live Journal»-ին տրված հարցազրույցի ժամանակ գրողը խորհուրդ տվեց Էմիլի Սեյնթ Ջոն Մանդելի «11-րդ կայարան» գիրքը, որը պատմում է մի խումբ դերասանների մասին, ովքեր ապրում են հետապոկալիպտիկ հասարակությունում՝ նշելով. «Ես շուտ չեմ մոռանա այս գիրքը։ Սա խորը մելանխոլիայով վեպ է, որը, սակայն, անչափ գեղեցիկ է գրված ու եղերերգական է. գիրք, որը ես երկար կհիշեմ ու որին դեռ կանդրադառնամ»։

 4  Վլադիմիր Նաբուկով

1950-ականներին ֆրանսիական հեռուստաընկերություններից մեկի հետ հարցազրույցի ժամանակ «Լոլիտայի» հեղինակը, ով իր բոլոր գրքերը գրել է նոթաքարտերի վրա, խոստովանել է, որ իր համար լավագույն գրքերն են Ջեյմս Ջոյսի «Ուլիսեսը», Կաֆկայի «Փոխակերպումը», Անդրեյ Բելիի «Սանկտ Պետերբուրգը» և Պրուստի հեքիաթի առաջին հատվածը՝ «Կորուսյալ ժամանակի փնտրտուքների հետևից»։

 3  Ջեյն Օսթին

Դասական «Հպարտություն և նախապաշարմունքներ», «Էմման» ստեղծագործությունների հեղինակ Ջեյն Օսթինն ինքն էլ մեծ ընթերցասեր էր։ Նրա սիրելի գրքերից էին Բայրոնի «Ծովահենը» և Էնն Ռեդքլիֆի «Ուդոլֆոյի առեղծվածները»։ Ինչևէ, ամենից շատ Օսթինը Սեմյուել Ռիչարդսոնի «Սըր Չարլզ Գրանդիսոնի պատմությունը» գիրքն էր սիրում։

 2  Մարկ Տվեն

1887թ․-ին Տվենը պատասխանեց Մեյնի հովիվ Չարլզ Քրեյնի նամակին, որում ամենայն հավանականությամբ հարց էր ուղղված Տվենին, թե ինչ գրքեր խորհուրդ կտա կարդալ երիտասարդ տղաներին ու աղջիկներին։ Նամակում ամենայն հավանականությամբ հարց էր ուղղված նաև, թե որ գիրքն է գրողի սիրելի գիրքը (Քրեյնի նամակը, ցավոք, կորել է)։ Իր սիրելի գրքերի ցանկում ներառված են Կարլիլի «Ֆրանսիական հեղափոխությունը», Թոմաս Մալորիի «Արթուր արքան», «Արաբական գիշերները»։ Նա նաև ներառել էր «B.B.» վերնագրով մի գիրք, որը, նրա պնդմամբ, գրվել էր մի քանի տարի առաջ իր սեփական ընթերցանության, ոչ թե տպագրության համար։

 1  Ֆ. Սքոթ Ֆիցջերալդ

1936թ․-ին՝ մահվանից 4 տարի առաջ, Ֆիցջերալդն ապրում էր Հյուսիսային Կարոլինայի Գրուվ Պարկ հյուրանոցում: Այն բանից հետո, երբ նա հրազենով փորձեց ինքնասպան լինել, հյուրանոցում պնդեցին, որ նրան որևէ բուժքույր հետևի։ Դորոտի Ռիչարդսոնի խնամքի տակ գտնվելու ընթացքում նա նրան 22 գրքերի անուններով ցանկ տվեց, որոնք, Ֆիցջերալդի պնդմամբ, ամենակարևոր գրքերն են, որոնք անհրաժեշտ է կարդալ։ Գրքերի ցանկը ներառում էր Թեոդոր Դրայզերի «Քույր Քերին», Էռնեստ Ռենանի «Հիսուսի կյանքը», Հենրիկ Իբսենի «Դոլիի տունը», Շերվուդ Անդերսոնի «Օհայոն» և այլն։

Աղբյուրը՝ Blognews.am