Փառք բոլոր այն տղաներին, ովքեր անմահացան այս օրերին
БЛОГՏիգրան Ներսիսյանը ֆեյսբուքյան իր էջում գրում է.
Բոլոր հայերով այսօր պետք է մեկ բռունցք լինենք, և՛ կանք, կարծում եմ: Բոլորս մեր զինվորների հետ, նրանց կողքին ենք հոգով, սրտով, նաև ֆիզիկապես՝ եթե նման պահ գա: Նրանք դա միշտ պետք է հիշեն ու զգան: Ուժ ու կորով եմ մաղթում: Փառք բոլոր այն տղաներին, որոնք ընկան, անմահացան այս օրերին: Ի տարբերություն թշնամու, մերոնք հայրենիքի, հողի համար են իրենց կյանքը տվել: Աշխարհի հայերով պետք է հասկանանք, գիտակցենք, որ մեր ուժը մեր միասնականության, մեկ բռունցք լինելու մեջ է, միայն մենք կարող ենք փրկել մեզ:
Այսօր խրամատում գտնվող հայ զինվորը, որն ի՛մ եղբայրն է, ի՛մ զավակը, ի՛մ արյունակիցը, թո՛ղ իմանա, որ ամբողջ հայ ազգն իր կողքին է, իր հետ… Ես երբեք չեմ էլ կասկածել մեր ազգի միասնականության վրա: Կարող են տարաբնույթ հարցեր լինել մեր ներսում, բայց երբ խոսքը գնում է Հայաստանի անվտանգության մասին (երբ ասոմ ենք Արցախ, պետք է հասկանանք, որ ամբողջական Հայաստանը նկատի ունենք, և հակառակը՝ երբ ասում ենք Հայաստան, նշանակում է՝ Արցախ), անքակտելի ենք դառնում, մե՛կ միտք, մե՛կ ուժ ենք դառնում: Եթե նույնիսկ թիկունքում ունեցել ենք պարտություններ, դա եղել է ոչ թե ուժի պակասի, այլ ոչ միասնականության արդյունքում: Ելնելով այսօրվա աշխարհաքաղաքական մարտահրավերներից՝ պետք է հասկանանք, որ մեր աջակիցն ու բարեկամը առաջին հերթին միայն մենք ենք՝ մեր ուժով, բռունցքով, համախմբվածությամբ: Եթե որևէ մեկն էլ մեր կողքին կկանգնի ու կասի՝ այո՛, Ձեր ընկերն եմ, դաշնակիցը, ապա խնդրեմ, թող ասի, բայց ապավինել՝ կարող ենք միայն ու միայն մեզ:Եվ այո, այսօր կան պետություններ, որոնք պարտավոր են կանգնել ու ասել, որ հայի կողքին են…
Իրենց կյանքը մեզ համար տված երիտասարդների, հերոսների հիշատակին հավերժ փառք…