Աննախադեպ է այն խանդավառությունը, որ կա ժողովրդի մեջ. Գագիկ Գինոսյան

Աննախադեպ է այն խանդավառությունը, որ կա ժողովրդի մեջ, այն նման չէ արցախյան պատերազմիժամանակ եղած մթնոլորտին: Այս անգամ, կարծես, դրականորեն տարբերվում է: Այս մասին «Արմենպրես»-ի մամուլի սրահում հրավիրված ասուլիսում նշեց Արցախյան ազատամարտի մասնակից, «Կարին» ազգագրական երգի ու պարի համույթի գեղարվ եստական ղեկավար Գագիկ Գինոսյանը:

«Այն ժամանակ այնպիսի մթնոլորտ էր, որ երբ պատերազմը սկսվեց, շատերն արտագաղթեցին: Հիմա հակառակն է, թե մեր երկրի ներսում, թե նրա սահմաններից դուրս բազմաթիվ հայեր պատրաստակամ են մեկնել ռազմաճակատ: Տեսնում ենք, որ հասարակության շրջանում համատարած սեփական ճակատագրին տեր կանգնելու պատրաստակամություն կա»,-ասաց Գագիկ Գինոսյանը:

Արցախյան ազատամարտի մասնակիցը նշեց, թե այս 4 օրում պարզ դարձավ, որ սպառազինության տեսանկյունից որոշ բացեր ունենք, սակայն դա չխանգարեց հերթական անգամ հաղթանակ կերտելուն:

«Մենք հաղթեցինք, հակառակորդին պարտադրեցինք մեր մոտեցումը, և դա արվեց տղաների ոգու, մարտավարական հմտության շնորհիվ: Մենք տեսանք հակառակորդի տգետ մասնագետների կողմից լավագույն սպառազինության կիրառումը: Նրանց կրակի դիպուկությունը երբեմն ծիծաղի առարկա էր դառնում: Այո, նրանք տեխնիկայի, զինամթերքի տեսանկյունից գերազանցում են մեզ, բայց մի քանի անգամ զիջում մեզ մասագիտական որակով»,-ասաց Գագիկ Գինոսյանը:

Գագիկ Գինոսյանն արձանագրեց մի փաստ ևս: Եթե մինչ այս զարգացումները շատերը նշում էին, որ հասարակության շրջանում մթնոլորտ է փոխվել, պատերազմի դեպքում շատ քչերը կմեկնեն ռազմաճակատ, ապա վերջին 4 օրերը ցույց տվեցին, որ իրավիճակը բոլորովին այլ է:

«Իհարկե, կային հոռետեսներ… Տեսնում էինք, թե ինչպես էին քաղաքական հոսանքները միմյանց քարկոծում ու երկրում բացասական մթնոլորտ ձևավորում: Կյանքը ապացուցեց, որ մեր ազգը որևէ քաղաքական երևույթի կարիքը չունի: Տեղի ուեցածն այն դեպքն է, որն ակամայից համեմատում ես Սարդարապատի հերոսամարտի հետ: Հաղթեց ազգը` չունենալով լուրջ աջակցություն դրսից: Սա միայն հայ ժողովրդի հաղթանակն է»,-ավելացրեց նա` մեջբերելով Գարեգին Նժդեհի խոսքը, ըստ որի, ամեն մի սերունդ պետք է գերազանցի իր նախորդին ոգով և խիզախությամբ: «Նոր սերունդը  վաղուց գերազանցում է մեզ»,- ավելացրեց Գագիկ Գինոսյանը:

Արցախյան ազատամարտի վետերանը նշեց, որ մենք մեր շրջապատում ունենք բազում հերոսներ, որոնց սխրագործությամբ պետք է սերունդներ դաստիարակվեն: Նա ներկայացրեց վերջին օրերին հակառակորդի հետ մարտերում հերոսաբար աչքի ընկած Արմենակ Ուրֆանյանի և այլոց օրինակները: Մարդիկ, ովքեր իրենց անձը զոհում են հանուն հայրենքի: Գագիկ Գինոսյանն ընդգծեց, որ նրանք պարզապես անձինք չեն, այլ իսկական հայի ճիշտ նկարագիր մարմնավորողներեն:

Բանակը, զինվորները հերթական անգամ ամրագրեցին հաղթանակ, ինչը, ըստ Գագիկ Գինոսյանի, պետք է ամրագրվի դիվանագիտական հարթակում ևս: