Վայոցձորցիները կանգնած են Արցախցիների կողքին

ОБЩЕСТВО 6 Апрель, 2016 22:39

Վայոցձորիցիները կանգնած են հայ զինվորի կողքին` առաջնագծում հայրենիքի սահմանները անառիկ պահելու համար, և հարկ եղած դեպքում հակահարված տալու թշնամու առաջխաղացմանը:

Ապրիլի 2-ից համազգային ինքնաբուխ զորահավաքին արձագանքելով Արցախ են մեկնում նաև Վայոցձորցի կամավորները, Վայքից, Ջերմուկից և մարզի այլ բնակավայրերից: Մեկնում են առաջագիծ, իրենց զինակից ընկերների և իրեց որդիների հետ պաշտպանելու հայկական երկրորդ հանրապետության սահմանները:

Իսկ որպես նյութական օգնություն, իրենց հետ տանում են «Սյունիք-Զարգացում» ՀԿ-ի և Վայոց Ձորի թեմի նախաձեռնած «ԱՋԱԿՑԵՆՔ ՍԱՀՄԱՆՈՒՄ ԳՏՆՎՈՂ ՄԵՐ ՀԵՐՈՍՆԵՐԻՆ» ակցիայի շրջանակներում հավաքված առաջին օգնության համար անհրաժեշտ սնունդը, դեղորայքը և այլն:

Արցախ մեկնող վայոցձորցի կամավորները, Past.am-ի հետ զրույցում նշեցին, որ պատերազմական այս օրերի ընթացքում իրենց պարտքն է, որպեսզի իրենք կանգնած լինեն հայ զինվորների կողքին: Սատարելու, ինչու չէ նաև մարտական ոգին բարձրացնելու համար:

Տեղեկացնենք նաև, որ այսօր Ջերմուկից ևս մեկ ջոկատ մեկնեց Արցախ, սատար կանգնելու իր եղբայրներին: Նրանք հավաքվեցին Սրբ. Գայանե եկեղեցում և Տեր Գալուստ քահանա Սահակյանի հետ միասին աղոթք հնչեցրեցին առ Աստված, իրենց մահացած հերոս եղբայրների հոգիների հանգստության և կռվող եղբայրների տոկուն կամքի ու անկոտրում ոգու համար:

Տեր Գալուստ Սահակյանը քաջալերեց մեր հերոսներին և պատվիրեց` պաշտպանել ՀԱՅՐԵՆԻՔԸ և դառնալ Մոնթեի արժանի հետնորդները:

Չթողնել, այդքան հերոսների արյան գնով վերադարձված, անգամ մի թիզ հող գերության մեջ:

Այս գիշեր ղարաբաղա-ադրբեջանական հակամարտ զորքերի շփման գոտում հիմնականում պահպանվել է ապրիլի 5-ի կեսօրին ձեռք բերված կրակի դադարեցման պայմանավորվածությունը:

Հիշեցնենք, որ ապրիլի 2-ի գիշերը իրավիճակը Լեռնային Ղարաբաղի հակամարտության գոտում կտրուկ լարվել է։ Խրոնիկ բնույթ կրող կրակոցներից եւ մասնակի դիվերսիոն հետախուզական փորձերից Ադրբեջանն անցում է կատարել մասշտաբային հարձակման շփման գծի ողջ երկայնքով՝ օգտագործելով հրետանի, ծանր տեխնիկա եւ ավիացիա։ Սա ամենախոշոր գործողություններն են 1994 թվականին հաստատված հրադադարի ռեժիմից հետո, որոնք ձեռնարկել է Ադրբեջանի զինուժը: Երկու կողմերից էլ կան զոհեր։

Նարեկ Միրզոյան