Ստեփանակերտի հրապարակում կանգնածների շարքում կարևոր չէ, թե ով է օլիգարխ, ով ոչ, բոլորն այդ ժամանակ հավասար են

Life.panorama.am-ը գրում է․

Ղարաբաղա-ադրբեջանական սահմանագծում երբեմն դադարում է կրակը, երբեմն կրկին ակտիվանում: Չնայած առաջին օրերի լարվածությունն արդեն անցյալում է, բայց մարդկանց պատրաստակամությունը՝ լինել մեր զինվորների կողքին, շարունակվում է օր օրի ավելանալ:

Ազատամարտիկ, ՀՀ վաստակավոր արտիստ, երգիչ եւ երգահան Դավիթ Ամալյանը, ում ստեղծագործությունների մեծ մասը նվիրված է Հայոց բանակին ու հայ զինվորին,Life.panorama.am-ի հետ զրույցում պատմեց, որ ապրիլի 1-ի լույս 2-ի գիշերը Ղարաբաղա-ադրբեջանական սահմանում ստեղծված լարված իրավիճակի մասին լսելուց հետո անմիջապես մեկնել է Արցախ, որից հետո Երեւանում կիսատ թողած գործերի պատճառով վերադարձել է այստեղ.

«Երբ լսեցինք այս դժբախռության մասին, անմիջապես մեկնեցինք Ղարաբաղ, բայց էստեղ կիսատ թողնված գործեր կային, էստեղ էլ մեր անհրաժեշտությունը կար, ուստի վերադարձանք Երեւան՝ կրկին հետ գնալու նպատակով: Ի ուրախություն մեզ՝ հիմա կարծես թե առաջին օրերի լարվածությունը չկա ու մեր վերադառնալու կարիքն էլ դեռ չկա: Իհարկե, շատ խորը կսկիծով ցավ եմ զգում մեր զոհված տղերքի համար, ինձ համար մեծ կորուստը եղավ այն, որ ինքս չհասցրեցի կռվել, գնացի Ղարաբաղ, բայց չհասցրի դիրքերում լինել: Միաժամանակ պետք է նկատեմ, որ ընկերներս, ովքեր եղել են դիրքերում, ուղղակի հիացած են մեր երիտասարդ զինվորներով, նրանք էլ հիացած են իրենց ավագներով. Ես երկուսի ցավն էլ տանեմ»,- նշեց նա:

Հայ ժողովրդի համախմբվածության վերաբերյալ Դավիթ Ամալյանը շեշտեց.

«Ես միշտ եմ ասել, եթե Աստված չանի պատերազմ լինի, մեր ժողովուրդը կհամախմբվի: Իհարկե, այս դժվարին իրավիճակում երջանկություն է, որ մեր սպասվածից ավելի մեծ ծավալ կրեց այդ համախմբվածությունը: Գիտեք, հայ զինվորը միշտ էլ օժտված է եղել մարտական ոգով, այս պարագայում մեր ամենամեծ հաղթանակը հայ ժողովրդի համախմբվածությունն էր, ինչում ես միշտ եմ վստահ եղել: Ստեփանակերտի հրապարակում կանգնածների շարքում կարեւոր չէ, թե ո՞վ է օլիգարխ, ո՞վ ոչ, բոլորն այդ ժամանակ հավասար են, եթե մինչեւ կռիվն էլ այդպես հավասար լինենք, կռիվ անելու կարիք չենք ունենա. տա Աստված, որ մենք միշտ միասնական լինենք, հենց դրա մեջ  է մեր հաղթանակը»:

Այս օրերին Արցախում է գտնվում նաեւ ՀՀ վաստակավոր արտիստ Արսեն Գրիգորյանը՝ Մրոն: Մեզ հետ զրույցում երգիչը երկար խոսել չկարողացավ, քանի որ ուղեւորվում էր Մարտակերտ.

«Արդեն մի քանի օր է ընկերներիս հետ Ղարաբաղում եմ, այստեղ ենք հատուկ առաջադրանքով, որի մասին չեմ կարող մանրամասնել. զինվորների համար անհրաժեշտ պարագաներ ենք մատակարարում: Այս պահին Մկրտիչ Մկրտչյանի հետ Քարվաճառից ուղեւորվում ենք Մարտակերտ, փորձում ենք մեր հնարավորության սահմաններում օգտակար լինել եւ կշարունակենք մնալ այստեղ այնքան, որքան անհրաժեշտ կլինի»,- նշեց Արսեն Գրիգորյանն ու ավելացրեց.

«Վերջին օրերը մեր ժողովրդի համար իսկապես շատ ծանր են, ուզում եմ խաղաղություն մաղթել բոլորիս ու շնորհակալությունս հայտնել մեր տղաներին, ովքեր կյանքի գնով պահպանում են մի ամբողջ ժողովրդի խաղաղությունը»:

Հեղինակ՝ Անուշիկ Մելքոնյան