Գեղարքունիքի մարզը պատրաստ կլինի հեղեղային իրավիճակի հաղթահարմանը եւ ոռոգման շրջանի մեկնարկին

Գեղարքունիքի մարզում գարնանային վարարումներից սպասվող հեղեղավտանգ իրավիճակի հաղթահարման եւ ոռոգման շրջանին նախապատրաստվելու համար տարվող աշխատանքների հետ ծանոթանալու նպատակով աշխատանքային այցով Գեղարքունիքի մարզում էր ՀՀ գյուղատնտեսության նախարարության ջրտնտպետկոմի նախագահ Արամ Հարությունյանը: «Արմենպրես»-ի տեղեկացմամբ՝ Գեղարքունիքի մարզպետ Ռաֆիկ Գրիգորյանի մոտ կայացած հանդիպմանը համատեղ քննության առնվեցին ինչպես հակահեղեղային միջոցառումների, այնպես էլ ոռոգման  նախապատրաստական շրջանի հետ կապված խնդիրները:

Արամ Հարությունյանի ներկայացմամբ՝ հակահեղեղային միջոցառումների իրականացման համար պետբյուջեից հատկացված գումարի չափը Գեղարքունիքի մարզում կազմել է մոտ 80 միլիոն դրամ, որն ուղղվել է բնակավայրերով հոսող առավել խոցելի ու վտանգավոր տեղերի մաքրման ու ափերի ամրացման աշխատանքների իրականացմանը: «Առավել վտանգավոր ու խոցելի են դիտվել Գավառագետը Գավառ քաղաքում եւ Մարտունի գետը Գեղհովիտ գյուղում: Մաքրման աշխատանքներն արդեն մեկնարկային փուլում են եւ կավարտվեն առաջիկա 1 ամսվա ընթացքում՝ մինչեւ գարնանային վարարումների սկիզբը: Ոռոգման շրջանը կմեկնարկի երկու-երկուսուկես ամսից, ինչին նախապատրաստվելու համար մարզի 3 ջրօգտագործող ընկերություններին տրամադրվել է մոտ 90 միլիոն դրամ, որի շրջանակներում կնորոգվեն պոմպակայանները, ջրատարների վնասված հատվածները: Կարծում եմ, որ տրամադրված միջոցները բավարար են՝ ոռոգման շրջանին կազմ ու պատրաստ լինելու համար: Իսկ եթե հաշվի ենք առնում այն, որ փոխհատուցվում է նաեւ պոմպակայանների ծախսած էլեկտրաէներգիայի սակագինը, ստացվում է, որ պետությունը տարեկան Գեղարքունիքի մարզի ոռոգման համակարգի պահպանման ու շահագործման համար ծախսում է մինչեւ 300-3 50 միլիոն դրամ»,-նշեց Արամ Հարությունյանը:

Համակարգում առկա մի շարք հրատապ խնդիրների քննարկման ավարտից հետո Գեղարքունիքի մարզպետ Ռաֆիկ Գրիգորյանը, ջրտնտպետկոմի նախագահ Արամ Հարությունյանը եւ Գավառի քաղաքապետ Գուրգեն Մարտիրոսյանն այցելեցին Գավառ քաղաքի  թաղամասեր՝ դիտարկելու պետբյուջեի միջոցներով  Գավառագետի 1,8 կիլոմետր երկարության հունի մաքրման աշխատանքների ընթացքը եւ լրացուցիչ հատվածների մաքրման ու ափապաշտպան գոտիների ամրացման աշխատանքների ընդգրկման հետագա հնարավորությունները:

«Արծվաքար թաղամասում մոտ 2 կլիոմետր երկարությամբ Գավառագետի հունը մաքրելու եւ խոցելի տեղերում ափերի ամրացման աշխատանքներ իրականացնելու խնդիր է ներկայացվել բնակչության եւ Գեղարքունիքի մարզպետարանի ու Գավառի քաղաքապետարանի կողմից: Վերջին տարիների ընթացքում այստեղ թե՛ գետի հունը չի մաքրվել, թե՛ որոշ հատվածներում խոցելի են դարձել ափապաշտպան կառույցները: Խնդիրն արմատապես լուծելու համար հարկավոր է նախ կազմել նախագիծ, նոր հասկանալ, թե ինչ գումարների հետ գործ կունենանք: Բայց հաստատ է, որ առաջիկայում այս խնդրի լուծման համար կտրամ ադրվեն միջոցներ եւ կիրականացվեն պահանջվող աշխատանքները: Միջոցներ կգտնենք նաեւ Արծվաքար թաղամասի ոռոգման պոմպակայանի եւ ջրատարի վերագործարկման համար, ինչի արդյունքում այստեղ այս տարի բնակիչները հնարավորություն կունենան ոռոգելի դարձնել մինչե 40 հեկտար հողամաս»,-նշեց Արամ Հարությունյանը: Տեղում Արծվաքարի բնակիչները եւս կարեւորեցին թե՛ գետի հունի մաքրման, թե՛ ոռոգման համակարգի վերագործարկման խնդիրների լուծումը՝ իրենց գոհունակությունը հայտնելով կառավարությանը:

«Գարնանային վարարումներին ու ոռոգման շրջանի նախապատրաստմանն ընդառաջ՝ ՀՀ կառավարության միջոցներով իրականացվում են անչափ կարեւոր ու հրատապ աշխատանքներ: Մեր կողմից մանրակրկիտ ուսումնասիրվում են տեղերից բարձրացված հիմնահարցերը, որոնց փորձում ենք լուծում տալ հնարավորության սահմաններում: Կարեւորն այն է, որ միջոցները գտնված են, իսկ հեղեղավտանգ իրավիճակի հաղթահարմանն ու ոռոգման շրջանի սկզբին մեր համայնքները կլինեն լիովին պատրաստ»,-նշեց Գեղարքունիքի մարզպետ Ռաֆիկ Գրիգորյանը:

Գավառագետի հունի մաքրման աշխատանքը պետբյուջեից հատկացված մոտ 30 միլիոն դրամի շրջանակներում մեկնարկել է ապրիլի 5-ից եւ կավարտվի մեկ ամսվա ընթացքում: Մաքրման աշխատանքերն իրականացվում է «Ճամբարակի ՃՇՇՁ» ՓԲԸ շինարարների կողմից:Հացառատի կամրջից մինչեւ քաղաքի հրապարակի կամուրջ ձգվող երկու  հատվածներում պետք է գետի հունը մաքրվի 1,8 կլիոմետր երկարությամբ: «Հունի մեջ կուտակված տիղմի հաստությունը հասնում է 50-60, որոշ տեղերում՝ մինչեւ 1 մետրի»,-հավաստեց շինարարության տեխհսկիչ Թաթուլ Մելքոնյանը: 

Խոսրով Խլղաթյան