Միասնական աղոթք Նորավանքում՝ նվիրված հայրենիքին (ֆոտոռեպորտաժ)

Հայաստանյաց առաքելական Սբ. եկեղեցին Քրիստոսի Հարությանը հաջորդող կիրակիներից մեկը անվանում է «Կանաչ կիրակի»:
Այդ տոնը շատ սիրելի է հատկապես վայոցձորցիների համար, քանի որ տարիներ շարունակ փակ լինելուց հետո` 1999 թ-ին, հիմնովին վերանորոգվեց և Գարեգին Ա Ամենայն հայոց կաթողիկոսի ձեռամբ օծվեց Նորավանքը: Այդ հիշարժան օրվանից սկսած «Կանաչ կիրակին» դարձավ Նորավանքի ուխտի օրը:
Տոնի օրը Նորավանքում, հանդիսապետությամբ Վայոց ձորի թեմի Առաջնորդ Տ. Աբրահամ արքեպիսկոպոս Մկրտչյանի և մասնկացությամբ թեմի ողջ հոգևորականաց դասի,  թեմի փոխառաջնորդ Տ. Զարեհ վարդապետ Կաբաղյանը մատուցեց Սուրբ և Անմահ Պատարագ, որի ընթացքում Հայր Սուրբը ոգեշունչ քարոզով ներկայացրեց տոնի խորհուրդը, ինչպես նաև խոսեց մեր պատմության և ներկա ժամանակահատվածներում Հայ Առաքելական Սուրբ Եկեղեցու ունեցած անգնահատելի հոգևոր, բարոյական և ազգային գաղափարների իրագործման դերի մասին,անդրադարձավ այսօրվա Արցախ աշխարհի փորձություններին ու կարևորեց այսօրվա համահայկական միասնականությունը:
Ուրախալի է, որ տարեցտարի պատարագի մասնակիցներից շատերը երիտասարդներ են: Սա իրոք խոսում է այն մասին, որ մենք ունենք առողջ, իրենց հոգևոր արժեքները ճանաչող և գնահատող երիտասարդ սերունդ:
Ամեն տարի «Կանաչ կիրակին» Նորավանքում հավաքում է ոչ միայն վայոցձորցիներին, այլև հանրապետության տարբեր քաղաքներից և գյուղերից ժամանած այցելուներին: Տոնը շատ սիրված է հատկապես զբոսաշրջիկների կողմից, որոնց համար այս սրբավայրն անկրկնելի տպավորությունների ու հիշողությունների աղբյուր է: 
Տոնի մասնակից էին դարձել նաեւ, առողջարանային Ջերմուկ քաղաքի Սուրբ Գայանե եկեղեցու հավատացյալները, ովքեր եկեղեցու հոգեւոր հովիվ Տեր Գալուստ քահանա Սահակյանի ուղեկցությամբ, Նորավանքում ներկա գտնվեցին սուրբ պատարագին:

Նախագահությամբ Առաջնորդ Սրբազան Հոր Հոգեհանգստյան կարգ կատարվեց Արցախի սահմաններում զոհված մեր հերոս զինվորների և Նորավանքի բարերար պարոն Տիգրան Հաճեթյանի հոգիների հանգստության համար:
Պատարագի ավարտից հետո, օրհնվեց ավանդություն դարձած հարիսան և բաժանվեց ներկաներին և զբոսաշրջիկներին` որպես մատաղ:

 

Նարեկ Միրզոյան