Գագիկ Աթասյանը՝ իրեն ուղղված սպառնալիքների և Հրազդանի ընտրություններում չառաջադրվելու մասին

Past.am-ը զրուցել է Հրազդանի քաղաքացի, 2011թվականին «Տարվա քաղաքացի» մրցանակին արժանացած Գագիկ Աթասյանի հետ:

Մեզ հետ զրույցում նա մանրամասնեց՝ ինչո՞ւ վերջին պահին չառաջադրվեց Հրազդանի քաղաքապետի ընտրություններում, խոսեց իր հասարակական գործունեության և սպառնալիքների մասին, որոնք ինքը ստացել է այդ ամենի հետևանքով: Պարոն Աթասյանը պատմեց, որ 2011 թվականից պայքարում է իր խախտված իրավունքը վերականգնելու համար: Նա մի քանի ամիս հաղորդավար և ծրագրերի բաժնի ղեկավար է եղել Հրազդանի «Սիրակ ՍՊԸ » հեռուստաընկերությունում: Աշխատանքի դիմաց, նրա պնդմամբ, չի վարձատրվել: Գագիկ Աթասյանը դիմել է դատարան, բայց դատարանը, նրա խոսքով, հեռուստաընկերության շահերն է սպասարկել: Աթասյանը նշեց, որ ինքն ապացուցող փաստեր ունի՝ կապված որոշ պաշտոնյաների և դատավորների կոռումպացվածության հետ: Մեր զրուցակիցը պատրաստվում է շարունակել իր պայքարը նախագահական նստավայրի առաջ:

Գ.Աթասյանն ասաց, որ չի վախենում հրապարակել իր փաստերն անվանական: «Դատարանի առաջ հացադուլի ժամանակ և իմ ֆեյսբուքյան էջում հնչեցրել եմ այդ մասին»,- հավելեց նա: «Կոտայքի մարզի ընդհանուր իրավասության դատարանի կոռումպացված դատավորների դեմ պայքարեցի 2015թ.սեպտեմբերից, Հրազդանի դատարանի մոտ, քաղաքապետարանի դիմաց և ՀՀ Նախագահականի դիմաց հացադուլներ և նստացույցեր արեցի: Ունեցա առողջական ծանր խնդիրներ ( ինֆարկտ, ստամոքսի խոցի 5 անգամ արյունահոսություն): Այսօր, Աստծո շնորհքով, կատարյալ առողջ եմ, նպատակասլաց, որպեսզի սկզբունքային և սուրբ պայքարում հասնեմ արդարության՝ իրականացնելով մահացած մայրիկիս վերջին կամքը: 2016թ. ապրիլի 15-ին՝ ժամը 10:00-ից, ինքնաբուխ վերսկսեցի սկզբունքային պայքարը, որովհետև դատավոր Գ.Հեբոյանը հակասահմանադրական, հակահայկական, ՀՀ քաղաքացիներին վիրավորող վճիռ կայացրեց: Քանի որ դիմացը Հրազդանի քաղաքապետի ընտություններն էին, չքաղաքակացնելու և լարված վիճակ չստեղծելու համար ժամը 18:30-ին պայքարս դադարեցրի՝ ընտրություններից հետո վերսկսելու որոշմամբ», -ասաց պարոն Աթասյանը:

Բողոքի ակցիաներ իրականացնելիս մեր զրուցակիցը ցուցապաստառներ է բարձրացրել, որոնցում պատկերված են դատավորներ և Հրազդանի քաղաքապետ Արամ Դանիելյանը: Գագիկ Աթասյանը մանրամասնում է. «Կոռուպցիայի դեմ պայքարի ցուցապաստառի վրա Արամի նկարն էի դրել, որից հետո ինձ վրա հարձակվեցին և սպառնացին, նրանք ասում էին՝ ես Սասուն Միքայելյանի մարդն եմ: Բայց ես արդեն 5 տարի է՝ Սասունին չեմ տեսել»: Խոսելով քաղաքապետի ընտրությունների մասին՝ Գագիկ Աթասյանն ընդգծեց, որ իր համար կարևոր չէ, թե ով կլինի քաղաքապետը: Ըստ նրա՝ կարևոր է, որ քաղաքացին իր համոզմունքներով ընտրի քաղաքապետին, ընտրակաշառք չվերցնի: Գագիկ Աթասյանը մեկնաբանեց նաև իր թեկնածության հարցը՝ շեշտելով, որ Հրազդանում կար մեծ հասարակական պահանջ այդ հարցում:

Անդրադառնալով չառաջադրման պատճառներին՝ նա նշեց հետևյալը. «Եղել է ինձ սպանելու սպառնալիք, իսկ հարձակումները դեռ շարունակվում են: Ես ո՛չ ընդդիմություն եմ, ո՛չ էլ իշխանություն, ես օրինապաշտ, պետականամետ քաղաքացի եմ: Ես կարող եմ մատնանշել թե՛ իշխանության, թե՛ընդդիմության ճիշտ և սխալ քայլերը: Ինձ ճանաչողները գիտեն, որ սկզբունքային եմ: Բայց կար վախ, որ կարող է հարազատներիս վնասեն: Այն բանից հետո, որ չառաջադրվեցի, հայտարարեցի չեզոքությանս մասին, նշեցի, որ որևէ մեկի թիմում չեմ աշխատելու: Չառաջադրմանս պատճառներից մեկն էլ այն է, որ հին Ընտրական օրենսգիրքը թույլ չի տալիս անցկացնել արդար, թափանցիկ ընտրություններ: Քանի որ հիմա նոր օրենսգիրք են քննարկում, ցանկալի է, որպեսզի այն ընդունվի կոնսենսուսով: Այսօր հրազդանցիները շատ վատ են ապրում: Կանխատեսելի էր, որ շատերն ընտրակաշառք պիտի վերցնեն: Բայց ,կարծես, դրա դեմ պայքարի միջոցներ կան: Ընտրակաշառք տվողները հայհոյանքի պես կընդունեն, երբ նրանց կոչեն «թուրք»: Մամուլում կարդացած կլինեք, որ Արամ Դանիելյանի կողմնակիցները ծեծի են ենթարկել Սասուն Միքայելյանի կողմնակիցներին:

Ըստ հրապարակումների՝ հարբած հարձակվողներն ասել են՝ «փող բաժանողներին բա՞ն եք ասում»: Ստացվում է, որ այսպես նաև խոստովանում են, որ կաշառք են տվել: Ըստ իս՝ արդյունավետ է ազդում, քանի որ թասիբի հարց է: Մնացածով, կարծում եմ, պետք է իրավապահները զբաղվեն»: Եվ վերջում Գագիկ Աթասյանն ասաց. «Ես 40 տարվա օրինապաշտ հրազդանցի եմ: Ես չեմ ընդունում, որ Արամ Դանիելյանը քաղաքապետ է: Քաղաքապետ չեն դառնում, քաղաքապետ ընտրվում են: Քաղաքապետ չեն լինում սպառնալիքներով և ավազակային հարձակումներով»:

Լևոն Փանոսյան