Գյումրիում ազդարարվեց քաղաքային ծառատունկի ու շաբաթօրյակների մեկնարկը

 Գյումրիում ազդարարվեց քաղաքային ծառատունկի ու շաբաթօրյակների մեկնարկը: Ապրիլի 23-ին, Գյումրու քաղաքապետարանի բոլոր բաժինների ղեկավարները՝ քաղաքապետ Սամվել Բալասանյանի գլխավորությամբ Գյումրու Իսահակյանի պուրակում մասնակցեցին ծառատունկի աշխատանքներին: Աշխատանքներին միացել էին նաև Շիրակի մարզպետարանի վարչությունների ղեկավարներ ը՝ Շիրակի մարզպետ ՀովսեփՍիմոնյանի գլխավորությամբ, ավելին, պապիկին օգնելու էր եկել նաև մարզպետի թոռնիկը՝ 5-ամյա Հովսեփը, ով «Արմենպրես»-ին վստահեցրեց՝ ոչ միայն օգնելու է ծառը տնկել, այլ նաև խնամել: Տարածքում տնկվեց 182 ծառ:

«Անշուշտ, այսօր մենք լուրջ խնդիրներ ունենք կանաչ տարածքների առկայության առումով: Երկրաշարժը լուրջ հետևանքներ թողեց, բայց պետք է փորձենք վերականգնել դա: Փորձում ենք նոր ավանդույթ ձևավորել, որ բոլորն էլ մասնակցեն: Այս անգամ որոշեցինք տեղական ինքնակառավարման երկու մարմինների աշխատակիցների ջանքերով կազմակերպել, իսկ հաջորդ անգամ արդեն քաղաքային մասշտաբներով՝ հուսալով, որ շատ գյումրեցիներ կմիանան»,-»Արմենպրես»-ին նշեց Շիրակի մարզպետը՝ վստահեցնելով, որ իր թոռնիկի ծառատունկին մասնակցելը խորհրդանշական է: «Այս հասակից պետք Õ § սիրեն ու սովորեն պահպանել բնությունը: Հասարակությունը պետք է հասկանա, որ ինքը մեծ դեր ունի ոչ միայան կանաչ տարածքների ստեղծման, այլ նաև քաղաքի մաքրության հարցում ու դա պետք է սովորել փոքր հասակից»,-հավելեց Հովսեփ Սիմոնյանը:

Այն, որ վերջին տարիներին քաղաքում փորձ է արվում վերականգնել երբեմնի կանաչ տարածքները, փաստեց նաև Գյումրուքաղաքապետ Սամվել Բալասանյանը՝ նշելով, որ այդ աշխատանքները հիմնականում դժվարանում են հետագա խնամքի հետ կապված: «Քաղաքում ոռոգման համակարգ մենք չենք ունեցել: Խորհրդային տարիներին է եղել, բայց հետո ոչ: Այս ընթացքում հաջողվել է վերականգնել ոռոգման համակարգը մինչև Հայուհու հրապարակ, բայց մյուս տարածքներում ոռոգում չկա: Պետք է աշխատենք համակարգը վերականգնել կենտրոնական հատվածներում, փորձ ենք անում ծառա տունկ կազմակերպել այն տարածքներում, որտեղ հնարավո է հետագա պահպանության հարցը լուծել: Կփորձենք վերականգնել հին ոռոգման համակարգը, քանի որ նոր համակարգ կառուցել դժվար է, մեծ գումարների հետ է կապված»,-նշեց Սամվել Բալասանյանը՝ կոչ անելով գյումրեցիներին միանալ ու մասնակցել շաբաթօրյակներին:

Ընդհանուր առմամբ, քաղաքապետարանն այս տարի  ծրագրել է  ձեռք է բերել 2 հազար ծառ, 30 հազար թուփ և 50 հազար ծաղկասածիլ: Հիմնականում դեկորատիվ ծառեր են՝ բարդի, բոխի, թխկի, սոճի և հացենի:  Դրանք հիմանականում կտնկվեն քաղաքի զբոսայգիներում, պուրակներում, ինչպես նաև քաղաքի կենտրոնական փողոցների ծաղկանոցային հատվածներում:

Արմենուհի Մխոյան