Պարգեւատրվեցին մարտական առաջադրանքը փայլուն կատարած գումարտակի զինծառայողները

ՀՀ ԶՈՒ սահմանապահ զորամաս այցելեցին եւ մարտական  առաջադրանքի փայլուն  կատարման  համար աչքի ընկած գումարտակի սպաներին ու զինվորներին պարգեւատրեցին Գեղարքունիքի մարզպետ Ռաֆիկ Գրիգորյանը, ՀՀ ԶՈՒ բանակային երկրորդ կորպուսի հրամանատար, գեներալ-մայոր Պողոս Պողոսյանը, Վարդենիսի քաղաքապետ Վոլոդյա Խլոյանը, Վարդենիսի եւ Սեւան ի տարածքի  մի շարք համայնքների ղեկավարներ:Հանդիսավոր  միտինգը բացվեց Տերունական աղոթքով եւ զորամասի հոգեւոր սպասավոր Էդուարդ սարկավագ  Սեփանյանի խոսքով: «Սիրելի հայ զինվորներ, հերոսները ծնվում են քաջասիրտ մարդկանց համարձակությունից: Դուք եք այսօրվա հերոսները: Ձեր մասին խոսելու են սերունդները, դուք աշխարհին ապացուցեցիք, թե ով է խիզախ հայը»,-մերօրյա քաջերին  դիմեց զորամասի հոգեւոր սպասավորը:

«Այսօր հաղթական օր է մեզ համար, մեր մարտական ընկերների համար, ովքեր պատվով ու փառքով ընդունեցին մարտահրավերը եւ հաղթանակած դուրս եկան կենաց-մահու գոտեմարտում: Գլուխ ենք խոնարհում մեր բոլոր մարտական ընկերների սխրանքների առաջ, ովքեր ընկան հայրենիքի պաշտպանության դիրքերում: Մենք, այո, կորցրեցինք մեր ընկերներին, բայց չկորցրեցինք ամենաթանկը՝ հայրենիքի սահմանները եւ պահպանեցինք մեր հողը, խոսքը եւ վճիռը: Շարունակենք լինել քաջ ու միաբան, որ կարողանանք ապահովել մեր սրբազան հողի տեւական խաղաղությունը»,-ասաց Հայոց բանակի կրտսեր սերժանտ Հովհաննես Սարդարյանը:

«Մեր ժողովրդի ստեղծագործ ուղին հոգեւոր լույսից է գոյացել: Թուրքը, ով դարեդար ձգտել ու ձգտում է մեր ոչնչացմանը, այս անգամ թերագնահատեց  մեր ուժը: Այսօր մեր բանակը մեր գոյության գլխավոր գրավականն է, որը պիտի շարունակենք փայփայել մեր ձեռքերով, կրել մեր հոգում, ուժ ու զորություն տանք նրան: Ապրիլյան քառօրյա պատերազմը ցույց տվեց, որ մենք ունենք քաջ ու հրաշալի սերունդ, անկոտրում կամքի տեր սպաներ ու զինվորներ, ովքեր կռեցին հերթական փայլուն հաղթանակները: Կրկին փառք ու պատիվ ձեզ»,-Հայոց բանակի մարտիկներին դիմեց Եղեգնուտի միջնակ արգ դպրոցի ուսուցչուհի Մարիամ Փիլաֆյանը:

«Սիրելի զինակից ընկերներ, մեր հավաքում ուզում ենք ոգեկոչել Տիգրան մեծին, ով ստեղծեց ծովից ծով Հայաստան, մենք ուզում ենք ոգեկոչել Վարդան Մամիկոնյանին, Սարդարապատի ճակատամարտի հերոսներին,Արցախյան գոյամարտի հաղթանակը կռողներին: Մենք պետք է արժանիորեն շարունակենք մեր հերոս հայրերի փառապանծ ուղին մեր քաջությամբ ու համախմբվածությամբ»,-ծառայակից ընկերներին դիմեց Հայոց բանակի կրտսեր սերժանտ Մուշեղ Սիմոնյանը:

Առավել հատու եւ հստակ էր Գումարտակի հրամանատար, փոխգնդապետ Կամսար Հարությունյանի խոսքը. «Մեր գումարտակն անթերի կատարեց իր մարտական հանձնարարությունը: Այսուհետ էլ մենք պատրաստ ենք մարտական ցանկացած հանձնարարության՝ հանուն մեր հայրենիքի պաշտպանության, հանուն խաղաղության, որը ձեռք է բերվում հայ զինվորի կռած հաղթանակներով»,-շեշտեց Կամսար Հարությունյանը:

«Սիրելի զինվորներ, բոլորիդ շնորհավորում եմ մարտական առաջադրանքի փայլուն կատարման  համար: Ապրիլյան հերոսամարտերից ու հաղթանակներից  հետո մենք մեկ անգամ եւս համոզվեցինք, որ Հայաստանի անկախության տարիների ամենաթանկ նվաճումը Հայոց բանակն է: Թե Արցախյան գոյամարտի տարիներին, թե այժմ կռած հաղթանակները բոլորիս մեջ ամրացրին հայրենի հողն անառիկ  պահելու գաղափարը: Դուք ապացուցեցիք, որ հայի ոգին հզոր է, հայ զինվորը՝ անպարտ: Նա սահմանի վրա անվրեպ խոցում է նավթադոլարներով ձեռք բերված ադրբեջանական տանկերն ու մարտական ուղղաթիռները եւ թշնամուն ապացուցում, որ իրեն ոչ մի ուժ չի կարող հաղթել: Թշնամու հարձակումն աշխարհով մեկ համախմբեց հայ ազգը, եւ ձեր թիկունքն այսօր ամուր է մեր համախմբմամբ: Ձեր կողքն են ողջ Գեղարքունիքի մարզը, Հայաստանն ու Սփյուռքը: Մենք հպարտանում ենք ձեզնով, խոնարհվում ձեր սխրանքների ու փառքի առաջ»,-իր խոսքը Հայոց բանակի մարտիկներին ուղղեց Գեղարքունիքի մարզպետ Ռաֆիկ Գրիգորյանը:

«Հայաստանի Հանրապետության Պաշտպանության նախարարի, գլխավոր շտաբի պետի անունից ձեզ եմ փոխանցում  շնորհակալական խոսքերը՝ մարտական առաջադրանքի փայլուն կատարման համար: Դուք եք այսօրվա հերոսները, որ անվեհեր մարտնչել եք թե գիշերային, թե ցերեկվա մարտերում: Ոչ մեկդ չի նահանջել ոչ մի քայլ, ոչ մեկդ չի թողել մարտի դաշտը: Դուք ձեր հաղթական ու քաջարի գործողություններով համախմբեցիք մեր ժողովրդին, եւ ձեր հաղթանակը ոչ միայն կայացել է ռազմի դաշտում, այլ նաեւ ազգի ոգին բարձրացնելու եւ հզորացնելու ուղղությամբ: Այսօր մնք շատ ավելի հզոր ենք, քան մեկ ամիս առաջ»,-հանդիսավոր միտինգը եզրափակեց ՀՀ ԶՈՒ բանակային երկրորդ կորպուսի հրամանատար գեներալ-մայոր Պողոս Պողոսյանը:

Միտինգի ավարտին զինծառայողները մարտական հանձնարարության ընթացքում ցուցաբերած արիության համար պարգեւատրվեցին շնորհակալագրերով, պատվոգրերով եւ դրամով: Գեղարքունիքի մարզպետ Ռաֆիկ Գրիգորյանը Գեղարքունիքի մարզպետի շնորհակալագրով պարգեւատրեց հինգ, դրամով՝ քսան զինծառայողի: ՀՀ ԶՈՒ բանակային երկրորդ կորպուսի հրամանատար գեներալ-մայոր Պողոս Պողոսյանը ՀՀ ԶՈՒ բանակային երկրորդ կորպուսի պատվոգրով պարգեւատրեց տասնհինգ եւ դրամով՝ քսան զինծառայողի: Վարդենիսի քաղաքապետ Վոլոդյա Խլոյանը քաղաքապետի պատվոգրով պարգեւատրեց  տասնհինգ եւ դրանով՝ հինգ զինծառայողի: Ծովակի գյողապետ Գարիկ Հակոբյանը Ծովակի, Մեծ Մասրիկի, Ախպրաձորի, Լճավանի, Վանեվանի, Տորֆավանի, Տրետուքի, Նորակերտի եւ Արփունքի գյուղապետարանների կողմից դրամական պարգեւներ հանձնեց տասներկու զինծառայողի: Գեղարքունիքի մարզի Զովաբեր, Դդմաշեն, Ծաղկունք, Գեղամավան, Վարսեր եւ Լճաշեն համայնքների կողմից աջակցության կարգով զորամասին տրվեց երկու հարյուր զույգ կոշիկ եւ երկու հազար տուփ ծխախոտ:

Հանդիսավոր միտինգն ավարտվեց Եղեգնուտի միջնակարգ դպրոցի աշակերտների կողմից կազմակերպված ռազմահայրենասիրական  համերգով, որի ժամանակ ռազմական պար բռնեցին գումարտակի հերոսացած զինվորները:

Խոսրով Խլղաթյան