Մկրտիչ Մինասյան. «Իսկ կարիք կա՞ անցնելու պառլամենտական կառավարմանը»

Այսօր՝ օգոստոսի 3-ին, լրագրողների հետ է հանդիպել ԱԺ ՀՀԿ խմբակցության պատգամավոր Մկրտիչ Մինասյանը,-հայտնում է Past.am-ը:

Մինասյանն անդրադարձել է սահմանադրական բարեփոխումների նախագծին: Ըստ նրա՝ այդ փոփոխությունները կնպաստեն երկրի արդյունավետ կառավարմանը: «25 տարի է՝ անկախ պետականություն ենք կառուցում, ունենք լուրջ հաջողություններ, որոշ դրվագներում՝ նաև բացթողումներ, այս ամենը թույլ են տալիս ասել, որ համակարգային բարեփոխումների կարիք կա: Իսկ կարիք կա՞ անցնելու պառլամենտական կառավարմանը: Կարծում եմ, որ կա, քանի որ կուսակցությունների դերակատարումը մեծանում է և գրեթե բոլոր համապետական նշանակության հարցերը լուծվելու են ոչ միայն իշխող, այլև ընդդիմադիր ուժերի կարծիքները լսելով»,- նշեց պատգամավորը:

Խոսելով սահմանադրության հայեցակարգի առաջին 7 կետերի շուրջ Վենետիկի հանձնաժողովի տրված գնահատականների մասին՝ բանախոսն ասաց, որ հայեցակարգը դոգմա չէ, և իրենք պատրաստ են լսել այն կարծիքներն ու առաջարկությունները, որոնք կնպաստեն սահմանադրության հայեցակարգը առավել կուռ դարձնելուն, իրենք պատրաստ են լսել:

Այն հարցին, թե ինչպե՞ս է վերաբերվում սահմանադրական բարեփոխումների դեմ պայքարող քաղաքացիներին, ՀՀԿ-ականն ասաց, որ նրանք իր խորհրդի կարիքը չունեն: «Կարծում եմ, որ երբ մարդիկ ձվի մեջ մազ են փնտրում, անիմաստ է նման մարդկանց խորհուրդ տալը: Ժամանակին բոլորը կրկնում էին, որ մեր ողբերգությունը մեծամասնական ընտրակարգն է, հիմա կա հնարավորություն որպեսզի քաղաքական ուժերը դրսևորվեն իրենց ամբողջ էությամբ: Ինչի՞ դեմ ենք բողոքում»,-  եզրափակեց բանախոսը:

Լևոն Փանոսյան