Հայաստանին սիրահարված Բունդեսթագի պատգամավորը ցանկանում է աշակերտների փոխանակման ծրագիրը շարունակական դարձնել

Գերմանիայի խորհրդարանի պատգամավոր, Գերմանա-հայկական ֆորումի նախագահ Ալբերտ Վայլերընախաձեռնել է աշակերտների միջմշակութային փոխանակման ծրագիր, որի շրջանակում գերմանացի 5 դպրոցական տասնօրյա այցով Հայաստանում է: Նրանք տեղավորվել են հայկական ընտանիքներում և մասնակցում են Երևանի թիվ 119 դպրոցում անցկացող դասընթացներին, տարբեր թեմաներով քննարկումների:

Ինչպես «Արմենպրես»-ի հետ զրույցում տեղեկացրեց պատգամավորը, այս նախաձեռնությունը նախորդ տարի Գերմանիայում` իր ընտրատարածքի դպրոցներից մեկում, Հայաստանի մասին անցկացված միջոցառման շարունակությունն է: Աշակերտների շրջանում, ովքեր մասնակցել էին Հայաստանին նվիրված միջոցառմանը, հետաքրքրություն կար ավելին իմանալու այս երկրի մասին: Այդ փաստը հաշվի առնելով էլ պատգամավորը հանդես եկավ  հիշյալ նախաձեռնությամբ: «Ես խորհրդակցեցի այդ դպրոցի տնօրենի հետ: Սկզբում աշակերտները գրավոր դիմում ներկայացրեցին, թե ին չու են ցանկանում այցելել Հայաստան, ինչ գիտեն երկրի մասին, հետո կարճ զրույցից հետո ընտրեցինք 5 աշակերտների, որ գան այստեղ ու հայկական դպրոցում, ուր գերմաներենն օտար լեզու է, դասընթացների մասնակցեն»,-հայտնեց մեր զրուցակիցը:

Պատգամավորը հույս հայտնեց, որ երիտասարդների միջև փոխանակումը շարունակական կդառնա, և իրենք կկարողանան հայ դպրոցականների հրավիրել Գերմանիա:«Փոխադարձ այց կազմակերպելով` հաղորդակցությունը տևական կդառնա»,-ասաց պատգամավորը:

Ալբերտ Վայլերի դիտարկմամբ` վերջին շրջանում Հայաստանի մասին շատ է խոսվում գերմանական մամուլում, հատկապես ցեղասպանության բանաձևի ու այդ խնդրի շուրջ: Դա նպաստում է, որ պոտենցիալ զբոսաշրջիկները տեղեկանան երկրի մասին և այցելեն: «Ապրիլի 17-ին իմ ընտրատարածքում խաչքար բացվեց` ի հիշատակ Հայոց ցեղասպանության անմեղ զոհերի, փոքրիկ արարողություն եղավ: Անընդհատ ինչ-որ զարգացումներ կան, ու ես շա ուրախ եմ դրա համար, քանի որ դա որոշակի հետաքրքրություն է առաջացնում պոտենցիալ զբոսաշրջիկների մոտ, ովքեր, բազմիցս լսելով երկրի մասին, ուզում են գալ ու տե սնել այն: Իսկ նրանք, ովքեր մեկ անգամ տեսնում են Հայաստանը, ցանկանում են էլի գալ: Ես էլ, երբ առաջին անգամ եկա, սիրահարվեցի այս երկրին, սա խթան է, որ նորից ու նորից գամ»,-հավաստիացրեց Բունդեսթագի պատգամավորը: