Ադրբեջանը վերսկսել է ակտիվիստների հետապնդումները. Freedom House

 Ադրբեջանական NIDA երիտասարդական շարժման ակտվիստներ Բայրամ Մամեդովի եւ Գիյաս Իբրահիմովի ձերբակալությունից հետո Freedom House միջազգային իրավապաշտպան կազմակերպությունը հանդես է եկել հայտարարությամբ, որում նշել է, որ կարճատեւ դադարից հետո Ադրբեջանը վերսկսել է ակտվիստների հետապնդումները: Ինչպես հաղորդում է «Արմենպրես»-ը, Freedom House-ի փոխնախագահ Ռոբերտ Հերմանն այդ առնչ ությամբ ասել է. «24 քաղաքական եւ կրոնական բանտարկյալների ազատ արձակումից հետո ադրբեջանական իշխանություններն, ինչպես երեւում է` ձգտում են լցնել դատարկված բանտախցերն ազատության նոր պաշտպաններով»:

Նա նշել է, որ ժողովրդավարական երկրները պետք է պահանջեն, որպեսզի Ադրբեջանը հարգի հիմնարար ազատությունները եւ թույլատրի քաղաքացիական հասարակությանն ազատորեն իրագործի իր գործունեությունը:

Երիտասարդ ակտվիստներ Բայրամ Մամեդովը եւ Գիյաս Իբրահիմովը մայիսի 10-ին ձերբակալվել են թմրանյութերի ապօրինի պահման մեղադրանքով: Բաքվում դատարանը նրանց ձերբակալել է 4 ամիս ժամկետով եւ նրանց 12 տարվա ազատազրկում է սպասվում:

NIDA շարժումը հայտարարել է, որ ակտվիստների ձերբակալության իրական պատճառն այն է, որ նրանք կասկածվում են Բաքվում Ադրբեջանի կենտրոնական բանկի դիմաց Հեյդար Ալիեւի ծննդյան օրը նրա արձանի պատվանդանի կողերին ադրբեջաներենով եւ անգլերենով Qul Bayramınız MՖbarək (Շնորհավորում ենք ստրուկի օրվա առթիվ), իսկ առաջնակողմում` Fuck the system (Կորչի հասարակարգը) գրություններ կատարելու մեջ, ինչը մեծ արձագանք էր առաջացրել Ադրբեջանում:

Երիտասարդների փաստաբան Էլչին Սադըգովը լրագրողներին ասել է, որ դատարանի կողմից նրանց նկատմամբ թմրանյութի հետ կապված մեղադրանքի առաջադրումը կապված է Հեյդար Ալիեւի արձանի հարցի հետ: «Նրանց մեղադրեցին թմրանյութի հարցով: Ինքնագլուխ, բռնությամբ ներխուժեցին տուն: Խուզարկության ժամանակ տնեցիներց ոչ մեկը չի մասնակցել: Տղաները բոլորովին կապ չունեն թմրանյութի հետ», -ասել է նա: Փաստաբանն ասել է, որ Գիյաս Իբրահիմովը հրաժարվել է հարցաքննության ժամանակ խոշտանգումներով տված իր ցուցմունքներից:

«Նրանք համառում են, որ հենց այդ տղաներն են արձանի վրա գրության հեղինակները: Դատարանում նրանցից պահանջել են արձանի առաջ ներողություն խնդրել: Ասել են, որ համաձայնեք ներողություն խնդրելու ժամանակ AzTv-ն նկարահանի, ազատ թողնենք ձեզ», -լրագրողներին հայտնել է փաստաբանը:

Ադրբեջանի ներքին գործերի նախարարությունը միջադեպի հետ կապված հայտարարության մեջ նշել է, որ Բայրամ Մեմմեդովի մոտից 2,904 գ հերոին տեսակի թմրանյութ է հայտնաբերվել, իսկ նրա տանից` 1 կ 150 գ հերոին: Գիյաս Իբրահիմովի մոտից` 2,607 գ հերոին, իսկ նրա տանից` 1 կգ 10 գ հերոին:

Ադրբեջանի կենտրոնական բանկի դիմացի այգում գտնվող Հեյդար Ալիեւի` այդ գրություններով արձանի լուսանկարը հայտնվել էր Facebook սոցցանցում, ինչը մեծ արձագանք էր առաջացրել Ադրբեջանում:

Այդ երկրում ավանդույթ է դարձել իշխանություններին, կառավարությանը քննադատաող ակտիվիստներին, ընդդիմադիրներին եւ քաղաքական-հասարակական գործիչներին, անգամ կրոնականներին թմրանյութերի հետ կապված հոդվածներով մեղադրանքներ ներկայացնելն ու բանտեր նետելը:

Ադրբեջանը մնում է անազատ մամուլ ունեցող երկրների թվում:

Միջազգային եւ ադրբեջանական իրավապաշտպան կազմակերպությունների տվյալներով` Ադրբեջանում ներկայում մոտ 100 քաղաքական բանտարկյալներ կան, որոնցից 28-ը ճանաչվել է խղճի բանտարկյալ: