Վերագործարկելն ավելի շահավետ է, քան փակելը. Նաիրիտցիները սեպտեմբերից կպայքարեն վերագործարկման համար

Նաիրիտցիների պայքարը միայն աշխատավարձերի փոխանցումով չի ավարտվում. նրանք սեպտեմբերից կպայքարեն գործարանի վերագործարկման համար:Այս մասին այսօր՝ օգոստոսի 5-ին, լրագրողներին հայտարարեցին «Նաիրիտ» գործարանի նախկին մամուլի քարտուղար Անուշ Հարությունյանը եւ գործարանի  արհմիության ղեկավար Հրաչ Թադեւոսյանը:

«Մենք միայն մեր պայքարի շնորհիվ ենք այսօր հաղթանակ տոնում։ Ուզում եմ շնորհավորել բոլոր նաիրիտցիներին ու շնորհակալություն հայտնել լրագրողներին, այս բոլոր ամիսներին ընթացքում մեզ հետ լինելու ու ակտիվորեն լուսաբանելու համար»,- ասաց Անուշ Հարությունյանը։

Անուշ Հարությունյանը նշեց, որ շատերի աշխատավարձերը հազիվ բավականացնելու է այս ամիսների ընթացքում կուտակած պարտքերը մարելուն եւ ընդգծեց, որ եթե չվերագործարկվի գործարանը, շատերը կարտագաղթեն:

«Նաիրիտի մի շարք աշխատողներ, օրինակ՝ քիմիական մասնագետները, Հայաստանում այլ տեղ չեն կարող աշխատել, ոչ մեկ նրանց աշխատանք չի առաջարկում, նա չի կարող գնալ աշխատել սպասարկման ոլորտում։ Դրսում իրենց շատ մեծ աշխատավարձեր են խոստանում, ու մարդը գայթակղությանը մի օր չի դիմանալու, եթե այստեղ ոչինչ չեն առաջարկում իրեն»,- ասաց նա։

Անուշ Հարությունյանը չհամաձայնեց համաշխարհային բանկի կողմից անցկացված աուդիտի արդյունքներին, ըստ որի, գործարանը ենթակա է լուծարման:

«Գործարանը վերագործարկելն այսօր ավելի շահավետ է, քան փակելը: Երկրի տնտեսությունը վերականգնելու համար «Նաիրիտը» պետք է անպայման վերագործարկվի»,-ասաց նա՝ նշելով, որ վերագործարկման համար ընդամենը 57 միլիոն դոլար է անհրաժեշտ, այլ ոչ թե 350 միլիոն դոլար, ինչպես ներկայացնում են աուդիտի արդյունքներով։

Հրաչ Թադեւոսյանի խոսքով՝ գործարանի բոլոր սարքավորումները սարքին վիճակում են եւ դեռ երկար տարիներ կարող են աշխատել։

«Պետք է գտնեն ներդրողների ու այնպիսի կազմակերպության տրվի, որը կկարողանա լավ կառավարում իրականացնել։ Խնդիրը հետեւանք է վատ կառավարման»,- ասաց նա։

Նշենք, որ օգոստոսի 4-ին ամբողջությամբ մարվել է բոլոր նաիրիտցիների աշխատավարձերային պարտքը:

Հիշեցնենք, որ գործարանի աշխատակիցների աշխատավարձը հատկացնում է պետությունը՝ էներգետիկայի ոլորտի պետական ընկերությունների շահույթի հաշվին:

Նաիրիտցիները բազմիցս բողոքի ակցիաներ են կազմակերպել կառավարության ու նախագահի նստավայրի մոտ՝ պահանջելով լուծում տալ իրենց խնդրին: Ձեռնարկությունը չի աշխատում 2010 թվականի ապրիլից: