Թող մի քիչ աղոթեն, մոմ չվառեն, մինչև տեսնենք` ինչ կլինի. Տեր-Ավետիս (լուսանկարներ)

Երևանի Աբովյան փողոցի վրա գտնվող Սուրբ Աննա եկեղեցում էի: Վերջերս եկեղեցին վերանորոգվել է և շատ հաճելի տեսք ունի: Սակայն աղոթքն ավարտելուց հետո մոմ վառելու համար առաջացան որոշ խնդիրներ:

Նախ` շատ երկար ժամանակ ես և ևս մի քանի քաղաքացի փնտրում էինք մոմասեղանները: Մոմավաճառն ու նրա կողքին նստած տիկինը քաղաքացիներին ուղղորդում էին եկեղեցու բակ: Մոմասեղաններն այնտեղ էին, բայց քաղաքացիները վերադառնում էին: Մոտեցա մոմասեղաններին, դրանցում ոչ մի վառված մոմ չկար: Բնական է, քանի որ դրսում քամի է, քամին հանգցնում է մոմերը: Կարելի է կարծել, թե առանձնապես մեծ խնդիր չկա, բայց քաղաքացին գումար է վճարում իր քրիստոնեական իրավունքն իրացնելու համար, այնինչ արդյունք չի ստանում:

Պարզաբանումներ ստանալու նպատակով հարցրի մոմավաճառին, թե ինչու են մոմասեղանները տեղադրված դրսում: Տիկինը բարկացավ ու պատասխանեց, որ նման հարցերով դիմեմ քահանային` տեր Ավետիսին: Քահանայի սենյակում մի երիտասարդ տղա կար: Մինչ սենյակ հասնելը կարելի էր լսել նրան՝ հոգևոր երգեր երգելիս: Տղան ներկայացավ որպես ճեմարանցի, անունը՝ Ռոբերտ: Ասաց, որ արդեն 14 տարի է, ինչ այստեղ է: Հենց նա էլ պատասխանեց մեր հարցերին:

- Քաղաքացիները չեն կարողանում մոմ վառել, ինչո՞ւ:

- Ճիշտն ասած՝ մոմ վառելու համար տեղ սարքվում է, հանգանակություն է արվում, բայց դեռ ավարտին չի հասցվել: Բացի դրանից՝ Էջմիածնին ենք տվել, որ հաստատեն, դեռ հաստատվելու գործընթացի մեջ է:

-Ի՞նչը: Հաստատեն, թե նման մի բան պատրաստե՞նք, թե՞ ուրիշ բան:

(Ռոբերտը ցույց տվեց նախագծի նկարները): Սա քամուց պաշտպանվելու համար է, լինելու է ընդհանուր յոթտեղանոց սեղան:

- Առհասարակ մոմ վառելու խորհուրդն այն է, որ մեր աղոթքները մոմի ծխի հետ բարձրանան վեր: Քանի դեռ մոմատեղի չի պատրաստվել, քաղաքացիների աղոթքներն ինչպե՞ս տեղ հասնեն:

- Կարևորը սիրտն է, եթե հավատքով աղոթես, կլինի:

-Այսինքն՝ մոմը գնում ենք, բայց սրտո՞վ աղոթում:

-Տեր հայրն այս դեպքում ասում է, որ կարող եք մոմը գնել, տանը վառել:

-Իսկ հիմա ինչո՞ւ եկեղեցու ներսում չեն տեղադրվում սեղաններ:

-Հիմնական պատճառը եկեղեցու փոքր լինելն է, չնայած նորակառույցը մեծ է, բայց եթե ներսում լինի մոմ վառելու տեղ, պատերը կսևանան, բացի այդ էլ այս շոգին, եթե մոմերն էլ վառեն, պատկերացնու՞մ եք` ինչ կլնի, և հետո, երբ մոմերը թափվում են ահավոր վիճակ է լինում:

Ռոբերտի հետ զրույցն ավարտելուց հետո մոմավաճառ կինը եկավ իմ հետևից և ասաց, որ տեր հայրն այստեղ է ու կարող եմ նրա հետ զրուցել: Տեր Ավետիսը քաղաքացիական հագուստով, կոստյումով տղամարդ էր, ով բակում նստած ծխում էր: Իմ այն հարցին, թե ինչու են մոմասեղանները դրսում, և քաղաքացիները չեն կարողանում մոմ վառել, նա պատասխանեց. «Թող մի քիչ աղոթեն, մոմ չվառեն, մինչև տեսնենք՝ ինչ կլինի»:

 

Արուսիկ Տիգրանյան