Համայնքային զարգացման ծրագիրը կօժանդակի Տավուշի մարզի 45 սահմանամերձ գյուղերին

ՌԴ ֆինանսավորմամբ համայնքային զարգացման ծրագիրը կօժանդակի Տավուշի մարզի 45 սահմանամերձ գյուղերին:

Առաջիկա հինգ տարիների ընթացքում Տավուշի մարզի 45 սահմանամերձ համայնքների 62 հազար բնակիչներ հնարավորություն կունենան մշակելու իրենց համայնքային ծրագրերը՝ թիրախավորելով ֆինանսավորման համար այնպիսի ոլորտներ, ինչպիսիք են ենթակառուցվածքների վերականգնումը եւ եկամուտ ստեղծող ծրագրերը: Այս ամենը հնարավոր կդառնա Ռուսաստանի Դաշնության կառավարության կողմից ֆինանսավորվող «Ինտեգրված աջակցություն գյուղական համայնքների զարգացմանը. համայնքների դիմակայունության ամրապնդում» ծրագրի շրջանակներում: Ծրագիրն իրականացվում է ՄԱԿ-ի Զարգացման ծրագրի (ՄԱԶԾ) հայաստանյան գրասենյակի կողմից՝ ՀՀ տարածքային կառավարման եւ արտակարգ իրավիճակների նախարարության հետ սերտ համագործակցությամբ: Ծրագրի բյուջեն կազմում է ավելի քան 5 միլիոն ԱՄՆ դոլար: 

Այսօր, Հայաստանում ՄԱԿ մշտական համակարգող, ՄԱԶԾ մշտական ներկայացուցիչ Բրեդլի Բուզետտոն, ՀՀ տարածքային կառավարման եւ արտակարգ իրավիճակների նախարար Արմեն Երիցյանը, եւ Հայաստանում Ռուսաստանի Դաշնության դեսպան Իվան Վոլինկինը ստորագրեցին ծրագրի մեկնարկը հավաստող փաստաթղթերը:  Միջոցառմանը ներկա էին գյուղական եւ համայնքային զարգացման համար պատասխանատու պետական մարմինների, ինչպես նաեւ միջազգային կազմակերպությունների, դիվանագիտական առաքելությունների եւ լրատվամիջոցների ներկայացուցիչներ:

«ՄԱԶԾ-ն, որպես համաշխարհային զարգացման ոլորտում գործող կազմակեպություն, փորձում է Հայաստանի հեռավոր համայնքների համար ապահովել ոչ թե կարճաժամկետ, իրավիճակային օգնություն, այլ աջակցություն ցուցաբերել ուղղված կայուն զարգացմանը: Մեր առավելություններն են չեզոքությունը, անկողմնակալությունը, ճկունությունը, ինչպես նաեւ նորարարությունը: Այս ամենի շնորհիվ է, որ ՄԱԶԾ-ն հանդիսանում է Հայաստանի զարգացման հատուկ գործընկեր: Ավելի քան երկու տասնամյակ ԱԱԶԾ-ն սերտորեն համագործակցում է կառավարության եւ այլ գործընկերների հետ՝ Հայաստանը բնակվելու եւ աշխատելու առավել նպաստավոր վայր դարձնելու  համար: Այս համատեքստում է, որ ես ցանկանում եմ երախտագիտություն հայտնել ՌԴ եւ Հայաստանի կառավարություններին գերազանց համագործակցության եւ այս կարեւոր գործընկերության համար՝ աջակցելու խոցելի համայնքներին: Համագործակցելով է, որ մենք փոփոխություն ենք բերում մարդկանց կյանքում»,- իր ողջույնի խոսքում նշեց Հայաստանում ՄԱԿ մշտական համակարգող, ՄԱԶԾ մշտական ներկայացուցիչ Բրեդլի Բուզետտոն:

«Ռուսաստանը շարունակաբար ուղղորդում է իր ջանքերն աջակցելու միջազգային գործընկերներին՝ կայուն զարգացում ապահովելու նպատակով: Ռուսաստանի միջազգային զարգացման նպատակով տրամադրվող աջակցությունն առաջնահերթորեն  ստանում են ԱՊՀ երկրները եւ Եվրասիական ինտեգրման գործընկերները: ՄԱԶԾ ծրագրի կարեւորությունը նրա թիրախ հանդիսացող Տավուշի մարզի սահմանամերձ համայնքների բազմակողմ զարգացումն է եւ այն հանգամանքը, որ այս նպատակին ուղղված դրական փորձառությունը հնարավոր կլինի փոխանցել երկրի մյուս համայնքներին: Պետք է նշել, որ ՄԱԶԾ-ն Ռուսաստանի Դաշնության վստահելի գործընկերն է, որը  տարիների ընթացքում համաշխարհային գործունեության մեծ փորձ է կուտակել»,- նշեց Իվան Վոլինկինը, Հայաստանում Ռուսաստանի Դաշնության դեսպանը:

«Մեր հանրապետությունն ունի 915 համայնք, որոնցից յուրաքանչյուրի խնդիրներին ու մարտահրավերները տարբերվում են միմյանցից։ Երկրի տարածքային կառավարումն առավել արդյունավետ դարձնելու համար պետք է խորամուխ լինել յուրաքանչյուր համայնքի, գյուղի կյանքի մեջ եւ հատկապես դա վերաբերում է սահմանամերձ համանքներին։ Մշտապես ուշադրության  կենտրոնում պահելով սահմանամերձ համայնքները` ՀՀ կառավարությունը տարբեր միջոցառումներ է իրականացնում դրանց աջակցելու եւ զարգացմանը նպաստելու համար։ Վստահ ենք, որ այս ծրագիրը արժեքավոր ներդրում կլինի սահմանամերձ համայնքում ապրող գյուղացու հոգսը թեթեւացնելու հարցում», - նշեց ՀՀ տարածքային կառավարման եւ արտակարգ իրավիճակների նախարար Արմեն Երիցյանը։

2001թ.-ից ի վեր ՄԱԶԾ-ն աջակցել է Հայաստանի ավելի քան 150 համայնքների, ներառյալ գյուղական ենթակառուցվածքների վերականգնումը, եւ եկամուտ ստեղծող ծրագրերը, ինչպես նաեւ հզորացվել են տեղական համայնքների ինստիտուցիոնալ կարողությունները համատեղ մշակված համայնքային ծրագրերի միջոցով: