Ինձ համար իրականությունը չունի «սուր», «երևակայական» կամ «ցանկալի» հատկանիշներ. նկարչուհի Նազիկ Ասլանյան

Ժամանակակից արվեստի թանգարանում օրերս բացվեց նկարչուհի Նազիկ Ասլանյանի անհատական ցուցահանդեսը: Ցուցահանդեսում ներկայացված են նկարչուհու վերջին չորս-հինգ տարվա աշխատանքները:

«Քանի որ այսօրվա նկարներս արդյունք են կրթության և տասնյակ տարիների ստեղծագործական աշխատանքի, ինչպես նաև մտքերիս և գաղափարներիս, կարող եմ ասել, որ պատրաստվել եմ ամբողջ ստեղծագործական կյանքում»,- Past.am-ի հետ զրույցում նշեց Նազիկ Ասլանյանը:

Մեր զրուցակցի խոսքով՝ ինքը փնտրում է էությունը և խորհուրդը (կյանքի խորհուրդը) բնության մասնիկներում: Բնության փոքր մասնիկները մեծացնելով` արվեստագետը ցույց է տալիս թաքնված ազդեցիկ հզորությունը, պարզությանը, խորությունը: Նկարչուհին դժվարացավ պատասխանել՝ իրեն համարո՞ւմ է բնության պես հախուռն:

«Ես չեմ կարծում, որ մարդու հանգիստ կամ անհանգիստ տեսակը կապ ունի արվեստագետ լինելու հետ: Կան ավելի կարևոր հատկանիշներ: Արվեստագետ լինելու համար, ստեղծագործական ձիրքից և տաղանդից բացի, կարևոր է ասելիք , գաղափար, միտք ունենալ, ինչպես նաև ունենալ ձեռագիր, որը կառանձնացնի գործերը, ստեղծագործությունը պետք է լինի ժամանակի հետ համահունչ, այսինքն՝ լինի իր ժամանակաշրջանի մեջ»,- ընդգծեց նա:

Անդրադառնալով իր նկարների «Արև» շարքին՝ նկարչուհին ասաց, որ այն առանցքային է իր արվեստում: Նրա խոսքով՝ այդ շարքում խտացված է լույսի և հավերժության գաղափարը:

Նազիկ Ասլանյանին հարց ուղղեցինք՝ իր գործերում ավելի շատ պատկերում է իրականությո՞ւնը, որն ունի նաև սուր կողմեր, թե՞ երևակայականն ու ցանկալին։ Արվեստագետը պատասխանեց. ««Իրականություն» կոչվող շարքումս մտքերի, զգացմունքների, էմոցիաների կերպարներ են: Բովանդակությունն եմ պատկերել առանց կաղապարի: «Ռեալիզմ» եմ կոչել շարքս, քանզի գտնում եմ, որ այս ամենը իրականության մեջ ուղղորդիչ դեր է խաղում: Ցանկացած իրողություն պարունակում է ուղղորդիչ անտեսանելի երևույթներ: Հենց դա եմ պատկերել՝ այն, ինչ անտեսանելի է: Ինձ համար իրականությունը չունի «սուր», «երևակայական» կամ «ցանկալի» հատկանիշներ: Իրականության ուղղորդիչը մտքերն և զգացմունքներն են՝ բոլոր հատկանիշներով կամ առանց հատկանիշների»:

Տեղեկացնենք, որ ցուցահանդեսը բաց է մինչև հունիսի 5-ը:

Լևոն Փանոսյան