Ջերմուկի կրթահամալիրում տեղի ունեցավ «Վերջին զանգ» միջոցառումը

Այսօր «Վերջին զանգն» է, ու ավարտական դասարանի աշակերտների շրջանում, ինչու չէ, նաև ուսուցիչների դեմքին ուրախ, տոնական ժպիտ է: Բոլոր նրանք, ովքեր անցել են այդ վերջինզանգյան փուլը, ամեն տարի այս օրն անպայման ընկնում են հիշողության գիրկն ու համեմատական կարգով, երևի թե ասում. «Մեր ժամանակ ուրիշ էր: Այո, ժամանակները փոխվում են, ու փոխվում է նաև տոնը տոնելու ձևերը»:

Առողջարանային Ջերմուկ քաղաք կրթահամալիրում «Վերջին զանգ»-ի միջոցառումը անցավ բարձր տրամադրությամբ, աշակերտները մեկը մյուսին հաջորդող գեղեցիկ կատարումներով հանդես եկան ծնողների, ուսուցիչների և բարձրաստիճան հրավիրյալների առաջ:

«Այսօր մեզ համար շատ հուզումնալից օր է, մենք ավարտում ենք մեր հարազատ դպրոցը, դպրոց, որը եղել է մեզ համար մեր երկրորդ տունը, դպրոց, որի պատերի ներսում անցել է մեր մանկությունը, որտեղ սովորել ենք հայերեն գրերը: Այսօր մենք հրաժեշտ ենք տալիս մեր սիրելի ուսուցիչներին, և ցանկանում ենք, որ նրանք մեզ հիշեն որպես իրենց փոքրիկ զավակների: Չէ՞ որ դպրոցը մեր երկրորդ տունն է, իսկ մենք` իրենց ուսումնատենչ զավակները»,- Past.am-ի հետ զրույցում անկեղծացան արցունքախառը աչքերով շրջանավարտները:

Սիրելի’ ուսուցիչներ, այսօր մենք մեր հոգու խորքում տանում ենք ձեր տված գիտելիքները, խոստանում ենք, ով էլ դառնանք, ուր էլ գնանք, մեր մայրենի լեզուն ու մեզ հարազատ դպրոցը՝ Ջերմուկի կրթահամալիրը երբեք չմոռանալ:

12 տարի սովորելուց հետո եկավ հրաժեշտի պահը: Պահ, երբ բոլորի հույզերն ու զգացմունքները միախառնվում են, երբ բոլորն ունենում են աննկարագրելի զգացողություններ, հոգիդ լցվում է ուրախությամբ և տխրությամբ, երբ միևնույն ժամանակ և’ ուրախ ես, և’ տխուր:

«Վերջին զանգ», այս բառերն արտաբերելիս շատերի մոտ են արթնանում քաղցր հուշեր, որոնք կապված են դպրոցական տարիների հետ: Այդ օրն ամեն ոք հետադարձ հայացք նետելով անցած տարիներին` մի ուրիշ սիրով է լցվում, եւ այդ երկար ու ձիգ տարիները նրան պատկերվում են վառ գույներով: Մտովի վերհիշում է իր բոլոր ապրումները` առաջին դասարան, առաջին ուսուցիչ, դպրոցական նստարան, դասարանական վեճեր, ընկերական արշավներ, առաջին սեր… եւ ակամայից ժպտում է: Անգին են այդ հուշերը եւ անկրկնելի: Անմոռանալի այդ տոնական օրվա բերկրանքը յուրաքանչյուրը զգում է ամբողջովին, ցանկանում լինել այդ օրվա հերոսը»,– Past.am-ի հետ զրույցում նշեցին Ջերմուկի կրթահամալիրի ուսուցիչները:

Միջոցառմանը ողջույնի խոսքով հանդես եկան, Ջերմուկի քաղաքապետ Վարդան Հովհաննիսյանը, Ջերմուկի ավագ դպրոցի տնօրեն Արմինե Արսենյանը, Ջերմուկի Սբ. Գայանե եկեղեցու հոգևոր հովիվ Տեր Գալուստ քահանա Սահակյանը:

Ընդամենը տասն օրից կսկսվեն բուհերի ընդունելության քննությունները, և այսօրվա շրջանավարտներից շատերը որևէ բուհի դռները թակելիս կհիշեն ու կգնահատեն իրենց սրտացավ ուսուցիչների այն աշխատանքը, որը տարիների պատմությունն է կերտել:

 

 

Նարեկ Միրզոյան / Past.am