Հրանուշ Հակոբյանը հորդորում է ՌԱԿ-ին ԼՂ ճանաչման հարցը բարձրացնել տարբեր երկրներում

Սփյուռքի նախարար Հրանուշ Հակոբյանը ընդունեց Ռամկավար ազատական կուսակցության ատենապետների ժողովի նորընտիր անդամներին՝ ՌԱԿ-ի Հարավային Ամերիկայի մասնաճյուղի ատենապետ Սերխիո Նահապետյանի գլխավորությամբ:  

Նախարարը այս հանդիպմանը եւս կարեւորեց Հայաստանի առջեւ ծառացած  խնդիրները, որոնք նա հորդորեց դարձնել կուսակցության գլխավոր խնդիրներից:

«Այսօր մեր թիվ մեկ խնդիրը մնում է ղարաբաղյան հարցի խաղաղ ճանապարհով կարգավորումը: Այս ապրիլյան չորս օրերին ազգովի շունչներս պահած հետեւում էինք այս գործընթացներին՝ աշխարհի որ ծայրում էլ ապրելիս լինեինք: Դուք գիտեիք, որ մեր հերոս տղաները կարողացան մարտնչել , հակահարված տալ եւ թույլ չտալ, որ նրանց ծրագիրը իրագործվի: Հակառակորդը նպատակ ուներ հարցը ռազմական ճանապարհով լուծելու, ավարտելու բոլոր տեսակի բանակցությունները եւ Ղարաբաղը Հայաստանից պոկելու: Իսկ երկրորդ ավելի կարճ խնդիրն այն էր, որ  նրանք մտածում էին, որ հանկարծակի բերելոÕ ¾ բանակին՝ կկարողանան բավականին շատ դիրքեր գրավել, այնպիսի կարգավիճակի հասնել, որ բանակցությունների սեղանին մեզ թելադրեին. նրանց երկու ծրագիրն էլ չիրականացավ, քանի որ հայկական բանակի կողքին կանգնեց նաեւ սփյուռքը, հայկական բանակը զգաց հայերի միասնության ուժը»,- «Արմենպրես»-ի փոխանցմամբ՝ ընդգծեց նախարարը:

Նա նշեց, որ Ղարաբաղի ճանաչման ուղղությամբ աշխատանք պետք է տանել բոլոր ուղղություններով՝  համագործակցելով նաեւ Հայ դատի գրասենյակների, Հայկական համագումարի հետ:  

«Յուրաքանչյուրդ շատ լավ գիտեք, թե յուրաքանչյուր երկրում  պետությունը,  համայնքը ինչքանով է հայամետ իր կեցվածքով եւ գործունեությամբ, ինչքանով է հայ համայնքը նպաստում այդ երկրի գործունեությանը, եւ կկարողանաք համոզել բացատրել, ապացուցել, որ միջազգային իրավունքի սահմաններում Ղարաբաղի ժողովուրդը ճիշտ է կողմնորոշվել, եւ պետք է հարգել նրա ինքնորոշման իրավունքը: Դուք միայն  պատկերացրեք Ադրբեջանի անհանգստությունը, երբ այն լսում է, որ թեկուզ փոքր մի քաղաք ճանաչել է ԼՂՀ անկախությունը»,- ասաց Հրանուշ Հակոբյանը:

Նախարարը խնդիրների շարքում առանձնացրեց նաեւ ցեղասպանության ճանաչման հարցում պայքարը շարունակելու, Հայաստանի հզորացման, ինչպես նաեւ սփյուռքի ուծացման, հայ երիտասարդների՝ հայությունից հեռանալու, հայերեն չխոսելու խնդիրները:

«Մեզ հետ համագործակցելով՝ դուք պետք է շատ երիտասարդների հայրենիք բերեք, սրանով կկարողանանք երիտասարդի մեջ սեր արթնացնել դեպի հայկական արժեքները: Սա մեր կարեւոր հարցն է, որպեսզի հայ երիտասարդը հայրենիքը տեսնի, ճանաչի, սիրի»,- եզրափակեց նախարարը: