Past.am-ը մեկ տարեկան է. շնորհավորում են հասարակական, քաղաքական գործիչներն ու գործընկերները

Հունիսի 1-ը ոչ միայն ամռան առաջին օրն է և Երեխաների պաշտպանության միջազգային օրը: Այսօր նաև Past.am լրատվական կայքի ծննդյան օրն է: 2015 թվականի հունիսի 1-ից մենք սկսեցինք կանոնավոր աշխատանքը՝ նպատակ ունենալով ընթերցողին տրամադրել հավաստի տեղեկատվություն, խոսափող դառնալ անաչառ, բազմակողմանի տեսակետների համար:

Կարճ ժամանակահատվածում կայքը դարձավ հանրապետության առաջատար էլեկտրոնային լրատվամիջոցնորից մեկը: Similarweb.com կայքի վերջին ամսվա տվյալներով՝ Past.am-ը զբաղեցնում է երկրորդ տեղն իր դիտումների քանակով: Ձեզ ենք ներկայացնում հասարակական, քաղաքական գործիչների, լրագրողների բարեմաղթանքները, որոնց հետ բազմիցս մեր կայքը համագործակցել է:

Իրավաբան Տիգրան Սարգսյան. «Սրտանց շնորհավորում եմ Past.am լրատվական կայքի տարեդարձը: Ժողովրդավարական հասարակությունում անգնահատելի է ազատ և օբյեկտիվ լրատվամիջոցի դերն ու նշանակությունը: Past.am լրատվական կայքն ընդգծված առաջատարն է լրատվական դաշտում, վայելում է ընթերցողների վստահությունը:

Կայքի կոլեկտիվին ցանկանում եմ կամք, համառություն և համբերություն՝ սկսած արժեքավոր աշխատանքը մինչև վերջ հաջողելու և հայրենիքի զարգացմանը աջակցելու համար»:

Shabat.am կայքի տնօրեն Տաթև Այվազյան. «Շնորհավորում եմ Past.am լրատվական կայքի տարեդարձը: Բոլոր աշխատակիցներին ցանկանում եմ բեղում աշխատանքային տարիներ: Լինելով լրատվական կայքի խմբագիր՝ գլխավոր մաղթանքս, թերևս, կլինի այն, որ ամեն գնով փորձեք պահպանել օբյեկտիվությունը, երբեք չտրվեք սադրանքներին: Լրատվություն մատուցող կայքերի դերն ու նշանակությունը հայ հասարակության բավականին կարևոր է: Past.am-ն ունի հետևորդների զգալի քանակ, թող դրանք օրեցօր ավելանան»:

«Նոր ժամանակներ» կուսակցության նախագահ Արամ Կարապետյան. «Այսօրվա լրատվական դաշտի գլխավոր գործոնն անկախությունն է: Ցանկանում եմ, որ անկախ մնաք, քաղաքական պատվերներից զերծ: Ինչքան ես եմ հասցրել շփվել կայքի հետ, կարող եմ ասել, որ մասնագիտական առումով գրագետ, կայացած կայք է: Հաջողություն Ձեր աշխատանքներին»:

ՀՀ ԱԺ պատգամավոր, լրագրող Մարգարիտ Եսայան. «Սիրելի՛ լրագրողներ, շնորհավորում եմ , մեկ տարեկան լրատմիջոցը դեռ մանուկ է, դուք դեռ երկար և դժվարին ճանապարհ ունեք անցնելու, վստահ եմ, կանցնեք պատվով, քանի որ առիթներ եղել են աշխատելու, տեսել եմ, որ կա բարեխղճություն, գործին նվիրված եք և գրագետ, ուրեմն՝ առաջ, մեծացեք և դարձեք առաջատար հայաստանյան լրատվական դաշտում, այս դաշտին պրոֆեսիենալները օդու ջրի պես են անհրաժեշտ»։

ԱԺ լրատվության և հասարակայնության հետ կապերի վարչության պետ Արսեն Բաբայան. «Մեկ տարի առաջ «Փաստ» լրատվականը ոտք դրեց լրատվական աշխարհ խոստումնալից մեկնարկով։ Ճաշակով գույներ, թեմաների արդյունավետ բաժանում և, որ ամենակարևորն է, ճիշտ բովանդակություն։

Մեկ տարում Փաստն ապացուցեց, որ մեկ տարի առաջ ստացածս առաջին տպավորությունս ճիշտ էր ու մեկ տարում Փաստն ավելի առաջ գնաց։ Լրատվամիջոցի համար ամենագլխավոր պայմանն անկախությունն է, որն էլ կապահովի օբյեկտիվություն, Փաստում ես հենց դա եմ տեսնում։

Մաղթում եմ, որ Փաստը շարունակի մնալ անկախ ու երբեք չիջեցնի իր մակարդակը ու չհավասարվի քաղաքական միավորի։ Ինձ համար անկախ մեդիան վերքաղաքական է»:

Հ.Գ. Այսօր իր ծննդյան տարեդարձն է նշում նաև Արսեն Բաբայանը; Մեր խմբագրակազմը նրան մաղթում է մասնագիտական և անձական մեծ նվաճումներ:

Լևոն Փանոսյան