Քոքոբելյանի օրենսդրական նախաձեռնությանը դեմ են իշխանության և ընդդիմության ներկայացուցիչները

Ազգային ժողովի արտաքին հարաբերությունների մշտական հանձնաժողովը մինչև մեկ տարի հետաձգեց Եվրասիական տնտեսական միությանը Հայաստանի անդամակցությունը դադարեցնելու մասին օրենքի նախագծի քննարկումները:

Օրենսդրական նախաձեռնության հեղինակ, ԱԺ անկախ պատգամավոր Խաչատուր Քոքոբելյանը, ներկայացնելով նախագիծը, նկատեց, որ ԵԱՏՄ-ին անդամակցումը Հայաստանի համար այս ընթացքում միայն մարտահրավեր է եղել: Պատգամավորը հիշեցրեց, որ խորհրդարանում ԵԱՏՄ-ին Հայաստանի անդամակցության հարցի քննարկման ժամանակ անդամակցության հիմնական հիմնավորումներից մեկն այն էր, որ դա բարձրացնելու է Հայաստանի անվտանգության մակարդակը: «Բայց քառօրյա պատերազմի ընթացքում մենք տեսանք, որ Եվրասիական տնտեսական միությանն անդամակցելու մեր անվտանգության մակարդակը չի բարձրացել: Մենք տնտեսական առումով ևս այս միությունից օգուտներ չենք ունեցել»,- կարծիք հայտնեց Քոքոբելյանը:

ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն ընդգծեց՝ եթե օրենսդրական նախաձեռնությունը հանձնաժողովում դրվելու է քվեարկության, ապա ինքը դեմ է քվեարկելու: «Ես կարծում եմ, որ ձեր հիմնավորումները բավարար չեն, որպեսզի մենք Եվրասիական տնտեսական միությանը Հայաստանի անդամակցությունը դադարեցնելու գործընթաց սկսենք: Ես չեմ կարծում, որ մենք այս խնդրին անդրադառնալու անհրաժեշտություն ունենք: Եվրասիական տնտեսական միությունը դեռևս գտնվում է կայացման փուլում, և մենք չենք կարող այդ միությանն անդամակցության ընդ ամենը մեկ տարվա արդյունքներով ինչ-որ եզրակացությունների հանգել և նման որոշում կայացնել: Իհարկե, կայացած միությունից էլ դուրս գալու հարց քննարկում են, սա բնական գործընթաց է՝ բոլոր պետություններն ունեն ինչպես մուտքի, այնպես էլ ելքի իրավունք, սակայն հիմա մենք չենք կարող մեզ համոզել, որ Եվրասիական տնտեսական միությունից դուրս գալը մեզ համար ավելի լավ կլինի: Հաստատ ավելի լավ չի լինի: Մենք պետք է մեր խնդիրները հաղթահարենք այս միության շրջանակներում, մեր շահերը պետք է առաջ տանենք այս միության շրջանակներում: Ես ասել եմ, որ առաջիկա 4 տարիների ընթացքում պետք է կարողանանք առավելագույն օգուտներ քաղել Եվրասիական տնտեսական միությունից: Եթե չենք կարողանում քաղել օգուտներ, ապա որևէ մեկը մեր ձեռքը չի բռնել, և մենք ցանկացած պահի կարող ենք դուրս գալ այդ միությունից»,- նշեց պատգամավորը:

ԱԺ ՀԱԿ խմբակցության պատգամավոր Նիկոլ Փաշինյանը նշեց, որ ինքը դեմ է, որպեսզի այս փուլում Հայաստանը Եվրասիական տնտեսական միությունից դուրս գալու գործընթաց սկսի: Պատգամավորը հիշեցրեց, որ ինքը դեմ է քվեարկել Եվրասիական տնտեսական միությանը Հայաստանի անդամակցությանը և ասել է, որ դա քաղաքական սխալ էր: Նրա խոսքով՝ ինքը հիմա էլ է դա քաղաքական սխալ համարում, սակայն նկատեց, որ քաղաքական սխալներն ուղղելու լավագույն տարբերակը չէ լրիվ հակառակ որոշումը կայացնելը: Փաշինյանը հավելեց, որ կողմ չէ, որպեսզի Հայաստանը դուրս գա ԵԱՏՄ-ից, քանի որ այդ կառույց ում որոշումները կայացվում են կոնսենսուսով: «Այսինքն, եթե Հայաստանը որևէ որոշման դեմ լինի, այդ որոշումը չի կարող ընդունվել: Չի բացառվում, որ Ադրբեջանը ցանկություն ունի անդամակցելու Եվրասիական տնտեսական միությանը: Հայաստանը կարող է դեմ արտահայտվել դրան, թույլ չտալ այդ անդամակցությունը՝ անհրաժեշտության դեպքում նաև բոյկոտելու եղանակով»,- ասաց Փաշինյանը:

ԱԺ ՀՀԿ խմբակցության ղեկավար Արտաշես Գեղամյանն էլ շնորհակալություն հայտնեց նախաձեռնության հեղինակ Խաչատուր Քոքոբելյանին՝ արդիական հարցադրմամբ հանդես գալու համար: «Սա նշանակում է, որ դուք այնքան մեծ սպասելիքներ եք ունեցել Եվրասիական տնտեսական միությանը Հայաստանի անդամակցությունից, որ ձեզ մոտ բողոքի ակցիա է բարձրացել նրանից, որ այդ սպասելիքները շուտ չեն արդարացել: Այո, մեր սպասլիքներն այդ անդամակցությունից մեծ են, և մենք քաղաքականության մեջ պետք է առաջնորդվենք Հիպոկրատի հայտնի սկզբունքով՝ «մի վնասիր»»,- նշեց Գեղամյանը:

Նախագծի հեղինակ, ԱԺ անկախ պատգամավոր Խաչատուր Քոքոբելյանը նշեց, որ ինքը երբեք չի ցանկանա, որ ԵԱՏՄ-ին Հայաստանի անդամակցությունը դադարեցնելու նախագծին դեմ քվեարկեն: Նա հայտարարեց, որ օգտվում է իր իրավունքից և մինչև մեկ տարի հետաձգում է նախագծի քննարկումները: 
Այնուհետև ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը քվեարկության դրեց «Եվրասիական տնտեսական միությանը Հայաստանի Հանրապետության անդամակցության դադարեցման գործընթաց սկսելու մասին» օրենքի նախագծի քննարկումները մինչև մեկ տարի հետաձգե լու առաջարկը, որին կողմ քվեարկեցին բոլոր պատգամավորները՝ բացի Թևան Պողոսյանից, ով ձեռնպահ քվեարկեց: