Իտալիայի չորս խոշորագույն քաղաքների բնակիչները չկարողացան քաղաքագլուխ ընտրել առաջին փուլում

 Իտալիայի չորս խոշորագույն քաղաքներում՝ Հռոմում, Միլանում, Նեապոլում եւ Թուրինում, որտեղ հունիսի 5-ին տեղի են ունեցել քաղաքագլուխների ընտություններ, թեկնածուներից ոչ մեկը չի հավաքել առաջին փուլում հաղթանակի հասնելու համար անհրաժեշտ թվով ձայներ: Այդ մասին, ինչպես տեղեկացնում Է «Արմենպրես»-ը, վկայում են երկրի ներքին գործերի նախարարության կայքում հրապարակված տվյալները,

Բացի նշված քաղաքներում քվեարկությունից, մասնակի վարչական ընտրություններ են անցկացվել երկրի 1300-ից ավելի մունիցիպալիտետներում, որոնց ընթացքում բնակիչներն ընտրում են իրենց նոր քաղաքապետերին եւ քաղաքային խորհուրդների անդամներին: Ընտրություններին մասնակցությունը կազմել Է 62,14 տոկոս:

Իտալիայի օրենսդրության համաձայն՝ առաջին փուլում քաղաքագլուխ ընտրվելու համար թեկնածուին անհրաժեշտ Է ստանալ ընտրողների ձայների ավելի քան 50 տոկոսը: Սակայն Հռոմում, որտեղ քաղաքագլխի աթոռի համար պայքարում Էր 13 մարդ, քվեաթերթիկների 86,5 տոկոսի հաշվումից հետո առաջատարը ընդդիմադիր «5 աստղերի շարժում» կուսակցության ներկայացուցչուհի Վիրջինիա Ռաջին Է՝ 35,46 տոկոս ձայներով: Երկրորդ տեղում ազգային խորհրդարանի Պատգամավորների պալատի փոխնախագահ Ռոբերտո Ջակետին (Դեմոկրատական կուսակցությունից) Է՝ 24,75 տոկոս ձայներով:

Միլանում նախնական արդյունքներով առաջատարը ձախ կենտրոնամետ ուժերի ներկայացուցիչ Ջուզեպե Սալան Է, որին աջակցել Է ընտրողների 41,67 տոկոսը: Նեապոլում վստահորեն առջեւից Է ընթանում գործող քաղաքագլուխ Լուիջի դե Մաջիստրիսը, որը հավաքում Է ձայների 42,38 տոկոսը: Թուրինում նույնպես առաջատարը գործող քաղաքագլուխն Է՝ Պիեռո Ֆասինոն, որը ներկայացնում Է ձախ կենտրոնամետ կոալիցիան՝ Դեմոկրատական կուսակցության ղեկավարությամբ:

Մեկնաբանելով Հռոմում եւ Թուրինում կայացած քվեարկության արդյունքները՝ «5 աստղերի շարժման» հիմնադիր, հայտնի բլոգեր եւ երգիծաբան Բեպե Գրիլոն դրանք համարել Է «պատմական արդյունք»: «Հինգ աստղերի շարժումը» շարժվում Է դանդաղ, բայց անկասելի: Մենք կփոխենք ամեն ինչ»,-գրել Է նա:

Բացի այդ, առաջին փուլում չի հաջողվել քաղաքագլուխ ընտրել նաեւ Բոլոնիա եւ Թրիեստ քաղաքներում: Միայն Սարդինիայի գլխավոր քաղաքում՝ Կալիարիում Է նոր քաղաքագլուխը որոշվել կայացած քվեարկության արդյունքում. պաշտոնը պահպանել Է գործող քաղաքագլուխ Մասիմո Ձեդան, որը հավաքում Է ձայների ավելի քան 51 տոկոսը: Ապենիններում վարչական ընտրությունների երկրորդ փուլը տեղի կունենա հունիսի 19-ին, հաղորդել Է ՌԻԱ Նովոստին: