Նիկոլ Փաշինյանը հեգնեց կառավարությանը՝ այն համեմատելով «Կարգին հաղորդման» հերոս Պետոյի հետ

Ինչպես հայտնում է Past.am-ը, Ազգային ժողովում քննարկվում է բյուջեի նախորդ տարվա կատարողականը: Պատգամավոր Նիկոլ Փաշինյանը հեգնեց կառավարությանը՝ այն համեմատելով «Կարգին հաղորդման» մանրապատումներից մեկի հերոս Պետոյի հետ:

«Վերանորոգվող տան սեփականատերը մեկ ամիս հետո գալիս է, մտնում է տուն և արձանագրում, որ նորոգող վարպետը՝ Պետո անունով, բան չի արել: Հարցնում է՝ ի՞նչ ես արել մեկ ամսվա ընթացքում: Պետոն ասում է՝ շեֆ ջան, բա եղա՞վ, լուսամուտը դրիմ: Ասում ա՝ բա հետո, Պետոն նորից ասում ա՝ լուսամուտը դրիմ: Ասում ա՝ դնելուց առաջ գյաջ-մյաջ էր թափվել պատագոննիկին, էտի սիրուն հավքիմ, լվացիմ, պլպլցրիմ ու պատուհանը փակիմ: Հիմա նայում ես՝ վախ»,- ասում է Փաշինյանը՝ հարցնելով, թե ի՞նչ է արել կառավարությունը վերջին չորս տարիներին:

«Բյուջեի կատարողականները, որ նայում ենք, կառավարությունն ասում է՝ նախագիծը գծիմ, մրցույթ հայտարարիմ, էլ ոչ մի բան: Հաջորդը՝ ջրամբարաշինության մեծ ծրագիրը, ուզում ենք հասկանալ՝ ինչ է արել կառավարությունը: Էլի գալիս ենք՝ նախագիծը ուսումնասիրիմ, միջազգային մրցույթ հայտարարիմ, միջազգային խորհրդատուներ հրավիրիմ: Հետո՝ Իրան-Հայաստան երկաթուղու կառուցում: Ի՞նչ արիր, կառավարություն ջան: Դե, հուշագիրը ստորագրիմ, գնացիմ, եկամ, էլի գնացիմ, էլի եկամ: Հիմա մի կոնկրետ բան կա, որ գրված է՝ դեկտեմբերի 29-ին բացվեց Հյուսիս-հարավ ճանապարհի մի հատվածը: Բայց ուզում եմ տեղյակ պահել, որ մեկ ամիս հետո այդ ճանապարհի մի կողմը փակվել է ու մինչև հիմա էլ փակված է: Էս էլ՝ ճանապարհը բացիմ»,- հավելում է Փաշինյանը:

Պատասխանելով հարցադրումներին՝ ֆինանսների փոխնախարար Ատոմ Ջանջուղազյանը նշեց, որ Փաշինյանի բարձրացրած հարցերը, հավանաբար, ամբողջը չեն, ցանկն ավելի երկար կարող էր լինել: Ըստ փոխնախարարի՝ այդ հարցերի պատասխանները տրված են համապատասխանող մարմինների կողմից, սակայն այլ հարց է, որ այդ պատասխանները կարող են չբավարարել: Նիկոլ Փաշինյանը կրկին հիշեց Պետոյին՝ պատմելով մանրապատման ավարտը:

«Իրավիճակն այլ կերպ է հանգուցալուծվում, երբ տանտերը քայլեր է ձեռնարկում: Հետո Պետոն ամեն ինչ արագացրեց, ասեց՝ շեֆ ջան, դե մինչև հիմա կարգին չէիր ասում: Իմ կարծիքով՝ եթե լիներ կառավարությանը կարգին ասող խորհրդարան, որը ոչ թե կիսաերեկոյան ոճով բյուջեի քննարկում անցկացներ, այլ նորմալ ձևով, գուցե այս ծրագրերի առումով այս վիճակը չլիներ: Մեր կառավարությանն ուղղակի կարգին ասող չկա, որ պարտավորությունները պետք է ճշգրիտ իրականացնեն»,- ասաց պատգամավորը:

Լևոն Փանոսյան