Ինչպես տարբերել իսկական կոսմետիկան կեղծից

Կոսմետիկան համարվում է կանանց ամենազդեցիկ գործիքներից մեկը և գեղեցիկ սեռի ներկայացուցիչների կյանքում կարևոր դեր է խաղում: Մեզանից շատերը կոսմետիկա ընտրելիս բավականին զգուշություն են ցուցաբերում և ճիշտ էլ անում են: Չէ՞ որ մեր օրերում անգամ թանկարժեք մասնագիտացված խանութներում կարելի է հանդիպել կեղծ ապրանքի:

Ճանաչել կեղծ արտադրանքը կարելի է մի քանի չափորոշիչներով.

Փաթեթավորման արտաքին տեքստը

Առաջին հերթին պետք է ուշադրություն դարձնել փաթեթավորմանը. կոսմետիկ միջոցը պետք է լավ ամրակայված լինի տուփի մեջ: Բացի այդ` փաթեթավորման վրա չպետք է լինի և ոչ մի արատ` պատռվածքները, ճմռթված կամ անհամաչափ պատրաստված տուփը, նախևառաջ խոսում են այն մասին, որ ձեր առջև կեղծ արտադրանք է: Ստվարաթուղթը, պոլիէթիլային թաղանթը կամ սովորական թուղթը, որոնցից պատրաստված է փաթեթավորումը, պետք է որակյալ լինեն` ոչ մի անհարթություն, կտրվածք, սոսնձի մնացորդներ կամ կպչուն ժապավեններ դրա վրա չպետք է լինեն:

Տուփի վրայի գրությունները

Տուփը ձեռքն առնելով` ուշադիր ուսումնասիրեք դրա վրայի գրությունները: Կեղծ ապրանքների վրա ապրանքանիշի անունը փոփոխված է` դրանում բացակայում կամ փոխված են լինում մեկ կամ մի քանի տառեր: Իրական կոսմետիկ արտադրանքի վրա անպայման պետք է լինեն ոչ միայն ապրանքի անվանումը, այլև տեղեկություններ արտադրողի, բաղադրության, պահպանման եղանակների ու ժամկետների մասին: Տուփի վրայի բոլոր տառերը պետք է հստակ երևան, իսկ ներկը չպետք է մաքրվի կամ մատների վրա հետքեր թողնի:

Հրահանգներ

Իրական արտադրանքի հետ սովորաբար լինում են հրահանգներ` մի քանի լեզուներով: Եթե տուփի միջի թուղթն ավելի շատ հիշեցնում է կարճ հուշաթերթիկ, քան հրահանգ, ապա նշանակում է, որ ձեր ձեռքինը կեղծ է:

Բույրը և բաղադրությունը

Իրական կոսմետիկան, որպես կանոն, ունի թույլ, հաճելի բույր կամ ընդհանրապես հոտ չի թողնում: Եթե փաթեթը բացելուց հետո տարածվում է ուժեղ, սինթետիկ հոտ, ապա ապրանքը իրական կոսմետիկայի հետ որևէ առնչություն չունի: Որակյալ կոսմետիկ միջոցներն առանձնանում են համասեռ բաղադրությամբ, մաշկի վրա տեղակայվում են հարթ և դրա մակերեսին որևէ խորդուբորդություն չեն թողնում:

Գինը

Կոսմետիկ միջոցի ընտրության հարցում կարևոր դեր է խաղում գինը: Խնայելու ցանկությունը լիովին հասկանալի է, սակայն պետք է հիշել, որ համաշխարհային համբավ ունեցող ապրանքանիշի արտադրանքը չի կարող մի քանի դրամ արժենալ: Եվ ինքնըստինքյան հասկանալի է, որ կոսմետիկա չի կարելի գնել շուկաներում կամ գետնանցումներում: