Հունաստանի դեսպանը վստահ է՝ շուտով Հայաստանը կդառնա զբոսաշրջային երկիր

 Երևանում անցկացվեց «Պատուհան դեպի Հունաստան» խորագրով  միջոցառումը, որի նպատակն է հայ ժողովրդին ներկայացնել հունական մշակույթը, Հունաստանի պատմությունը, խթանել հայ-հունական զբոսաշրջային փոխայցերը:

ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը նշեց, որ միջոցառման նպատակը Հայաստանի և Հունաստանի միջև զբոսաշրջության ոլորտում համագործակցության ամրապնդումն ու զարգացումն է: «Մենք ունենք շատ էական նախադրյալներ Հայաստանի և Հունաստանի միջև զբոսաշրջության ոլորտում համագործակցության խորացման առումով: Սրա նշանակությունը միայն տնտեսական չէ: Բացի այն, որ զբոսաշրջային փոխայցելությւնները էապես նպաստելու են երկու երկրների տնտեսական աճին, աշխատատեղերի ստեղծմանը, օգնելու են ներդրումների ներգրավմանը, շատ արևորվում է նաև երկու երկրների ժողովուրդների միջև բարեկամության ամրապնդումը,  միջմշակութային երկխոսությունը, դարավոր բարեկամության զարգացումն  ու ամրապնդումը: Այս միջոցառումն այս առումով շատ կարևոր է»,- «Արմենպրես»-ի հաղորդմամբ՝ նշեց Ապրեսյանը:

Նա հավելեց, որ Հունաստանից Հայաստանի զբոսաշրջիկների այցի դրական դինամիկա կա, սակայն բացարձակ թվով այնքան էլ էական չէ: «Շատ կարևորվում են նման միջոցասռումները երկու երկրներում զբոսաշրջանի արդյունքների խթանման, ավելի ակտիվ մարքեթինգային քաղաքականության առումով, որպեսզի երկու երկրների միջև փոխայցելություններն ավելի ակտիվ լինեն և զարգանան»,- եզրափակեց Մեխակ Ապրեսյանը:

Հայաստանում Հունաստանի արտակարգ և լիազոր դեսպան Իոաննիս Տայիսն ընդգծեց, որ միջոցառումը նվիրված է Հունաստանի զբոսաշրջային գրավչությանը: «Հունաստանը շատ հայտնի տուրիստական երկիր է, և շատ երկրներից են զբոսաշրջիկներ այցելում Հունաստան: Ես ուրախ եմ նշել, որ Հայաստանից էլ շատ են սկսել Հունաստան այցելել: Հայաստանը և Հունաստանը շատ գեղեցիկ երկրներ են, և ես համոզված եմ, որ Հայաստանն էլ շուտով կդառնա տուրիզմի երկիր: Հայաստանը և Հունաստանը շատ սերտ բարեկամական կապեր ունեն և հայերի համար Հունաստանում հաստատ հաճելի կլինի»,- ասաց դեսպանը:

Իոաննիս Տայիսն այն կարծիքին է, որ Հայաստանում հույն զբոսաշրջիկների համար շատ հետաքրքիր կլինեն հայկական վանքերը: «Հաշվի առնելով այն հանգամանքը, որ երկու ժողովուրդները շատ մոտ են իրար, հույների համար շատ հետաքրքրիր կլինի բացի տեսարժան վայրեր այցելելուց շփվել հայերի հետ, քանի որ երկու ժողովուրդներն ունեն պատմական ընդհանրություններ»,- հավելեց նա:

Hot Tours տուրիստական գործակալության գլխավոր տնօրեն Մխիթար Մելիք-Շահնազարյանը լրագրողների հետ զրույցում հայտնեց, որ միջացառումն անցկացվում է Հայաստանում Հունաստանի դեսպանատան և մի շարք հայկական կազմակերպությունների նախաձեռնությամբ: «Այս տարի աշխարհի շատ երկրներում կազմակերպվել է նմանատիպ միջոցառում, և, հաշվի առնելով հայ և հույն ժողովուրդների բարեկամական կապերը, մենք չէին կարող զերծ մնալ նման նախաձեռնությունից  և որոշեցինք ֆինանսավորել այս միջոցառումը: Միջոցառման նպատակն է հայ ժողովրդին ճիշտ ներկայացնել հունական մշակույթը, Հ ունաստանի պատմությունը, Հունաստանի զբոսաշրջային գրավչությունը, ամրապնդել հայ և հույն ժողովուրդների բարեկամական կապերը»,- «Արմենպրես»-ի հաղորդմամբ՝ նշեց Մելիք-Շահնազարյանը: